រាជធានីភ្នំពេញ ៖ សពបុរសម្នាក់ដែលធ្លាក់ពីលើម៉ូតូទឹកចូលទន្លេកាលពី៣ថ្ងៃមុន ត្រូវបានរកឃើញហើយនាវេលាម៉ោង៤ទៀបភ្លឺថ្ងៃទី៣០ កញ្ញា ឆ្នាំ២០២៥ នៅចំណុចក្រោមស្ពានព្រះមុន្នីវង្សថ្មី (ស្ពានច្បារអំពៅ) ស្ថិតក្នុងសង្កាត់ច្បារអំពៅទី២ ខណ្ឌច្បារអំពៅ…
រាជធានីភ្នំពេញ ៖ សពបុរសម្នាក់ដែលធ្លាក់ពីលើម៉ូតូទឹកចូលទន្លេកាលពី៣ថ្ងៃមុន ត្រូវបានរកឃើញហើយនាវេលាម៉ោង៤ទៀបភ្លឺថ្ងៃទី៣០ កញ្ញា ឆ្នាំ២០២៥ នៅចំណុចក្រោមស្ពានព្រះមុន្នីវង្សថ្មី (ស្ពានច្បារអំពៅ) ស្ថិតក្នុងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។
ជនរងគ្រោះឈ្មោះ ផល សុផេង អាយុ៤៥ឆ្នាំ មានទីលំនៅ បុរីប៉េងហួត បឹងស្នោ ។
បើតាមការបញ្ជាក់ពីមន្ត្រីមូលដ្ឋាន បានអោយដឹងថា ចាប់តាំងពីថ្ងៃកើតហេតុវេលាម៉ោង៤រសៀល ថ្ងៃទី២៧ ខែកញ្ញា ឆ្នាំ២០២៥ រហូតមកដល់វេលាម៉ោង៤ទៀបភ្លឺថ្ងៃទី៣០ កញ្ញា ឆ្នាំ២០២៥នេះ មានរយៈពេល៧២ម៉ោង សពបុរសខាងលើ ទើបតែរកឃើញនៅក្រោមស្ពានច្បារអំពៅ រួចស្រង់យកមកតម្កល់ទុកនៅវត្តចាក់អង្រែក្រោម ដើម្បីប្រគល់ជូនក្រុមគ្រួសារសាច់ញាតិធ្វើបុណ្យតាមប្រពៃណី ។
បច្ចុប្បន្ន សពជនរងគ្រោះត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី នៅឯវត្តជ្រោយអំពិលស ស្ថិតក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
សូមរំលឹកឡើងវិញថា មានករណីបុរសវ័យ៤០ឆ្នាំម្នាក់ បានបើករថយន្ត១គ្រឿង និងមានសណ្ដោងម៉ូតូទឹកពីខាងក្រោយរថយន្ត បើកមកកំពង់ដរកោះពេជ្រចាស់ ក្នុងគោលបំណងយកម៉ូតូទឹកនោះមកជិះលេងនៅទន្លេបាសាក់ លុះជិះបានបន្តិច មិនដឹងមានមូលហេតុអ្វីនោះទេ ស្រាប់តែបុរសរូបនោះធ្លាក់ពីលើម៉ូតូទឹក ហែលលើកដៃអោយគេជួយបានបន្តិចក៏លិចបាត់អស់ច្រើនម៉ោង ហើយម៉ូតូទឹករសាត់ទៅដល់ស្ពានព្រះមុនីវង្សចាស់ ។ ចំណែកបុរសរងគ្រោះ ត្រូវបានគេសង្ស័យថា អាចហូរទៅដល់ក្រុងតាខ្មៅ ដោយសារទឹកហូរខ្លាំងពេក ។
ហេតុការណ៍ខាងលើនេះបង្កការភ្ញាក់ផ្អើល កាលវេលាម៉ោង៤រសៀលថ្ងៃទី២៧ ខែកញ្ញា ឆ្នាំ២០២៥ នៅចំណុចក្បែរស្ពានកោះនរាបរិវេនកោះពេជ្រ ក្រុម៧៨ ស្ថិតនៅភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
គិតចាប់តាំងពីថ្ងៃកើតហេតុ កាលពីវេលាម៉ោង ៤រសៀល ថ្ងៃទី២៧ ខែ កញ្ញា ឆ្នាំ ២០២៥ រហូតមកដល់វេលាម៉ោង៤ទៀបភ្លឺថ្ងៃទី៣០ ខែកញ្ញា ឆ្នាំ២០២៥នេះ មានរយៈពេល៧២ម៉ោង ទើបរកឃើញសពជនរងគ្រោះខាងលើ និងប្រគល់ជូនក្រុមគ្រួសារសាច់ញាតិ ដើម្បីរៀបចំធ្វើបុណ្យតាមប្រពៃណី ៕
ខាងក្រោមនេះជាអត្ថបទពាក់ព័ន្ធ ៖
ចែករំលែកព័តមាននេះ