សម្តេចតេជោ ហ៊ុន សែន ជួបសំណេះសំណាលជាមួយក្រុមការងារគណបក្សប្រជាជនកម្ពុជា ប្រចាំរដ្ឋអូរីហ្គិន
រាជធានីភ្នំពេញ ៖ នៅវិមាន៧មករា នាព្រឹកថ្ងៃចន្ទ ទី២០ ខែតុលា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន…
រាជធានីភ្នំពេញ ៖ នៅវិមាន៧មករា នាព្រឹកថ្ងៃចន្ទ ទី២០ ខែតុលា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បានអញ្ជើញជួបសំណេះសំណាលជាមួយក្រុមការងារគណបក្សប្រជាជនកម្ពុជា ប្រចាំរដ្ឋអូរីហ្គិន ដឹកនាំដោយលោក សេង សំអុន ប្រធានគណៈកម្មាធិការសាខាបក្សប្រចាំរដ្ឋអូរីហ្គិន និងក្រុមការងារលោក ម៉ក់ ហឺន សម្របសម្រួលដោយលោកឧកញ៉ា ស្រី ចាន់ថន អនុប្រធានតំបន់ឆ្នេរខាងលិចនៃសហរដ្ឋអាមេរិក ។
តាមការឱ្យដឹងពី ឯកឧត្តម ជា ធីរិទ្ធ អ្នកនាំពាក្យគណបក្សប្រជាជនកម្ពុជា បានឱ្យដឹងថា នៅក្នុងពិធីសំណេះសំណាលនោះ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានសម្តែងនូវការស្វាគមន៍ និងរីករាយ ដែលបានជួបក្រុមការងារគណបក្សប្រជាជនកម្ពុជានៅក្រៅប្រទេសនាឱកាសនេះ។ សម្តេចតេជោ បានមានប្រសាសន៍ចែករំលែកអំពីទិដ្ឋភាពទូទៅ ពីស្ថានភាពរបស់ព្រះរាជាណាចក្រកម្ពុជាពីអតីតកាល ជាពិសេសប្រវត្តិសាស្ត្រ នៃពលិកម្មរបស់សម្តេច ក្នុងការតស៊ូរំដោះប្រទេសជាតិចេញពីរបបប្រល័យពូជសាសន៍ និងការដឹកនាំរបស់សម្តេចពេលនៅជានាយករដ្ឋមន្ត្រី ។
សម្តេចតេជោប្រធានគណបក្ស ក៏បានបង្ហាញអំពីដំណើរការអភិវឌ្ឍរបស់ប្រទេសជាតិ នាពេលបច្ចុប្បន្ន ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលកំពុងដឹកនាំប្រទេសយ៉ាងស្វាហាប់ និងបន្តការខិតខំប្រឹងប្រែងអភិវឌ្ឍប្រទេសជាតិឱ្យមានការរីកចម្រើនជាបន្តបន្ទាប់ ។
នាឱកាស នៃពិធីសំណេះសំណាលនេះដែរ សម្តេចតេជោក៏បានមានប្រសាសន៍អំពីស្ថានភាពបញ្ហាព្រំដែន កម្ពុជា-ថៃ ដែលរាជរដ្ឋាភិបាលយើងកំពុងតែខិតខំប្រឹងប្រែងក្នុងការដោះស្រាយបញ្ហាជាបន្តបន្ទាប់ ដើម្បីធ្វើយ៉ាងណាឱ្យបានវិលទៅរកភាពប្រក្រតីឡើងវិញ។ សម្តេចតេជោក៏បានមានប្រសាសន៍អំពីស្ថានភាពនយោបាយមួយចំនួនទៀត ដល់សកម្មជនរបស់គណបក្សប្រជាជនកម្ពុជា បានឈ្វេងយល់ និងស្ថានភាពពិតរបស់កម្ពុជា ជាពិសេសសម្រាប់បងប្អូនសកម្មជននៅក្រៅប្រទេស បានដឹង និងបានឃើញពីការអភិវឌ្ឍរីកចម្រើនរបស់ប្រទេសកម្ពុជានាពេលបច្ចុប្បន្ននេះ ។
សម្តេចតេជោ ហ៊ុន សែន បានជូនពរឱ្យក្រុមការងារគណបក្សនៅក្រៅប្រទេសទទួលបាននូវភាពជោគជ័យជាបន្តបន្ទាប់ទៀត៕
ចែករំលែកព័តមាននេះ