ទីក្រុងវ៉ាស៊ីនតោន៖ លោកត្រាំប្ដេជ្ញាថានឹងបន្តដាក់សម្ពាធផ្នែកពន្ធគយទៅលើទំនិញរបស់ឥណ្ឌារហូតដល់ប្រទេសនេះលែងទិញប្រេងឆៅពីរុស្ស៊ីតទៅទៀត។ លោកត្រាំបញ្ជាក់ឡើងវិញកាលពីយប់មិញថានាយករដ្ឋមន្ត្រីឥណ្ឌា លោកម៉ូឌី បានសន្យាជាមួយលោកដោយប្រាកដប្រជាថាឈប់ទិញប្រេងឆៅពីរុស្ស៊ី។ ដូច្នេះបើឥណ្ឌាក្បត់សន្យារបស់ខ្លួន ពួកគេនឹងបង់នូវតម្លៃដ៏ខ្ពស់។
នៅពេលអ្នកសារព័ត៌មានសួរថាឥណ្ឌាមិនទទួលស្គាល់ថាមានការសន្ទនាគ្នារវាងលោកត្រាំ និងលោកម៉ូឌីនោះទេ តើលោកធ្វើអត្ថាធិប្បាយយ៉ាងដូចម្ដេច? លោកត្រាំឆ្លើយតបថាឱ្យតែពួកគេហ៊ានប្រើសម្ដីអីចឹង ពួកគេរង់ចាំតែបង់ពន្ធគយឱ្យណាណីទៅ។ ប៉ុន្តែលោកយល់ថាពួកគេមិនចង់បានរបៀបនេះទេ។ បញ្ហាប្រេងឆៅរបស់រុស្ស៊ីជាចំណុចដែលធ្វើឱ្យលោកត្រាំរកាំចិត្តជាខ្លាំង។ អីចឹងហើយបានជាប្រទេសទាំង២ចរចាពាណិជ្ជកម្មគ្នាយូរហើយនៅត្រាំត្រែងមិនចេះមានដំណោះស្រាយ។
មុនដំបូង លោកត្រាំដំឡើងពន្ធគយ២៥%ទៅលើទំនិញឥណ្ឌា។ នៅពេលឥណ្ឌាមិនព្រមបញ្ឈប់ការទិញប្រេងពីរុស្ស៊ី លោកដំឡើងថែម២៥%ទៀត។ ដូច្នេះសរុបទាំងមុនទាំងក្រោយស្មើនឹង៥០%។ រដ្ឋាភិបាលអាមេរិកអះអាងថារុស្ស៊ីអាចមានលុយធ្វើសង្គ្រាមនៅអ៊ុយក្រែនដោយសារបានចំណូលពីការលក់ប្រេង។ ចាប់តាំងពីក្រុមបស្ចិមប្រទេសផ្អាកទិញប្រេងរុស្ស៊ីដើម្បីជាការបញ្ចេញប្រតិកម្មទៅនឹងសង្គ្រាមអ៊ុយក្រែន ឥណ្ឌាចូលទៅជំនួសតំណែងពួកគេ និងក្លាយជាម៉ូយដុំរបស់រុស្ស៊ីវិញម្ដង។
តាមពិត អាមេរិក និងឥណ្ឌានៅតែបន្តចរចាគ្នានៅឡើយទេដើម្បីឱ្យមានកិច្ចព្រមព្រៀងពាណិជ្ជកម្ម។ កាលពីសប្ដាហ៍មុន ឥណ្ឌាបានបញ្ជូនគណៈប្រតិភូទៅអាមេរិក ហើយឥឡូវនេះបានវិលត្រឡប់មកវិញហើយ។ លទ្ធផលចរចាគ្នាយ៉ាងណាគ្មាននរណាដឹងទេ។ កាលពីថ្ងៃពុធសប្ដាហ៍មុន លោកត្រាំអះអាងថាលោកម៉ូឌីបានថ្លែងប្រាប់លោកតាមទូរស័ព្ទនៅថ្ងៃដដែលនោះថាលោកឈប់ទិញប្រេងរុស្ស៊ីតទៅទៀតហើយ។
ក្រសួងការបរទេសឥណ្ឌាអះអាងថាខ្លួនមិនបានដឹងអំពីការសន្ទនាគ្នា ឬការសន្យានោះទេ។ ប៉ុន្តែក្រសួងថាអ្វីដែលប្រទេសរបស់ខ្លួនយកចិត្តទុកដាក់ជាសំខាន់នោះគឺការការពារផលប្រយោជន៍របស់ប្រជាជនឥណ្ឌាដែលជាអ្នកប្រើប្រាស់ទំនិញ។ ចង់មានន័យថាអាមេរិកដំឡើងពន្ធគយខ្ពស់ក៏ដំឡើងចុះ។ ប៉ុន្តែឥណ្ឌានៅតែទិញប្រេងរុស្ស៊ីព្រោះរុស្ស៊ីលក់ធូរថ្លៃ។ ដូច្នេះអាចជួយសម្រួលជីវភាពរស់នៅរបស់ប្រជាជនឥណ្ឌា។
មន្ត្រីសេតវិមានម្នាក់ប្រាប់ថាឥណ្ឌាបានកាត់បន្ថយការទិញប្រេងពីរុស្ស៊ីពាក់កណ្ដាល។ ប៉ុន្តែប្រភពផ្ទៃក្នុងឥណ្ឌាអះអាងថាបរិមាណទិញចូលនៅដដែល។ ជាក់ស្ដែង ម្ចាស់រោងចក្រចម្រាញ់ប្រេងឆៅបានកុម្ម៉ង់ទិញប្រេងរួចហើយសម្រាប់ខែវិច្ឆិកា ហើយរោងចក្រខ្លះកក់ទុករហូតដល់ខែធ្នូឯណោះ។ ដូច្នេះបើត្រូវកាត់បន្ថយ ឬយ៉ាងណាត្រូវរង់ចាំយ៉ាងហោចណាស់ដល់ខែធ្នូឆ្នាំនេះ ឬខែមករាឆ្នាំក្រោយ។
បរិមាណនាំប្រេងឆៅពីរុស្ស៊ីចូលឥណ្ឌានឹងកើនឡើង២០%។ ពោលគឺកើនឡើងដល់១,៩លានបារ៉ែលក្នុងមួយថ្ងៃ។ នេះបើយោងតាមការប៉ាន់ស្មានរបស់ក្រុមហ៊ុនតាមដានការទិញ-លក់ទំនិញប្រភេទវត្ថុធាតុដើម។ រុស្ស៊ីក៏កំពុងពង្រីកការនាំចេញប្រេងរបស់ខ្លួនសម្បើមណាស់ដែរបន្ទាប់ពីអ៊ុយក្រែនបញ្ជូនដ្រូនទៅវាយប្រហាររោងចក្រចម្រាញ់ប្រេងរបស់ខ្លួន៕
ចែករំលែកព័តមាននេះ