ខេត្តមណ្ឌលគិរី ៖ តាមអនុសាសន៍ និងការណែនាំដ៏ខ្ពង់ខ្ពស់របស់នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសដែលតែងតែផ្តាំផ្ញើ និងជំរុញឲ្យមេបញ្ជាការកងរាជអាវុធហត្ថតាមបណ្តារាជធានី-ខេត្តទាំងអស់ ត្រូវយកចិត្តទុកដាក់ខ្ពស់…
ខេត្តមណ្ឌលគិរី ៖ តាមអនុសាសន៍ និងការណែនាំដ៏ខ្ពង់ខ្ពស់របស់នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសដែលតែងតែផ្តាំផ្ញើ និងជំរុញឲ្យមេបញ្ជាការកងរាជអាវុធហត្ថតាមបណ្តារាជធានី-ខេត្តទាំងអស់ ត្រូវយកចិត្តទុកដាក់ខ្ពស់ ដល់នាយ-នាយរងអាវុធហត្ថក្រោមឱវាទទាំងអស់ ជាពិសេស គ្រួសារយោធិន និងនគរបាលជួរមុខ ដែលកំពុងជាប់ភារកិច្ចការពារបូរណភាពទឹកដី ។
ជាក់ស្តែង នៅរសៀលថ្ងៃទី១៩ ខែតុលា ឆ្នាំ២០២៥ លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី បានដឹកនាំមន្ត្រីក្រោមឱវាទ នាំយកគ្រឿងឧបភោគបរិភោគ និងថវិកាមួយចំនួន ចែកជូនដល់ក្រុមគ្រួសារវីរកងទ័ពនិងវីរនគរបាល ដែលកំពុងបំពេញភារកិច្ចការពារបូរណភាពទឹកដី នៅខ្សែបន្ទាត់ព្រំដែនកម្ពុជា-ថៃ ។
ក្រុមគ្រួសារវីរកងទ័ពចំនួន៣គ្រួសារ ដែលរស់នៅស្រុកពេជ្រាដា ទទួលបានការសួរសុខទុក្ខរួមមាន ១-គ្រួសារលោកពលបាលឯក ម៉ន ភក្ដី ដែលជាយោធិននៃកងពលតូចថ្មើរជើងលេខ ២១ ចំណុះយោធភូមិភាគទី២ ហើយកំពុងឈរជើងការពារនៅតំបន់ (ប្រាសាទតាមាន់ធំ) ស្នាក់នៅវរសេនាតូច ២១២។ ២-គ្រួសារលោកពលបាលឯក យ៉ូត ញ៉ាម ដែលជាយោធិននៃកងពលតូចលេខ១២៨ ចំណុះយោធភូមិភាគទី១ កំពុងឈរជើងនៅតំបន់ (មុំបី) ហើយក្រុមគ្រួសាររស់នៅភូមិប៊ូស្រា ឃុំប៊ូស្រា ស្រុកពេជ្រាដា ខេត្តមណ្ឌលគិរី។ ៣-គ្រួសារលោកពលទោ ខែន សុខមៀង ដែលជាយោធិននៃកងពលតូចលេខ ១២៨ ចំណុះយោធភូមិភាគទី១ កំពុងឈរជើងនៅតំបន់ (អានសេះ) ហើយក្រុមគ្រួសាររស់នៅភូមិពូរាំង ឃុំប៊ូស្រា ស្រុកពេជ្រាដា ខេត្តមណ្ឌលគិរី។
ក្នុងឱកាសនោះ លោកឧត្តមសេនីយ៍ត្រី មេបញ្ជាការ បាននាំនូវការផ្តាំផ្ញើសាកសួរសុខទុក្ខ និងក្តីនឹករលឹកពីសំណាក់នាយឧត្តមសេនីយ៍មេបញ្ជាការ សៅ សុខា ព្រមទាំងបានថ្លែងនូវពាក្យលើកទឹកចិត្ត ដល់គ្រួសារវីរកងទ័ពទាំងអស់ «សូមបងប្អូនជាភរិយា មាតាបិតា របស់វីរកងទ័ពជួរមុខទាំងអស់ មានមោទកភាព និងជឿជាក់ថា កងទ័ពដែលកំពុងឈរជើងការពារជាតិ មិននៅឯកោឡើយ។ កងរាជអាវុធហត្ថខេត្តមណ្ឌលគិរី នឹងបន្តយកចិត្តទុកដាក់ខ្ពស់ចំពោះសុខុមាលភាពរបស់ក្រុមគ្រួសារទាំងអស់។
សូមបងប្អូនបន្តជាកម្លាំងចិត្ត និងបង្អែកដ៏រឹងមាំពីក្រោយខ្នងដើម្បីឲ្យស្វាមី និងកូនៗ របស់ខ្លួនមានកម្លាំងចិត្តកាន់តែមោះមុតក្នុងការបំពេញភារកិច្ចការពារជាតិមាតុភូមិប្រកបដោយជោគជ័យ»។
ចំពោះគ្រឿងឧបភោគបរិភោគ និងថវិកាឧបត្ថម្ភផ្តល់ជូនក្នុងមួយគ្រួសារៗរួមមាន៖ មី០២កេះ ទឹកសុទ្ធ០៣ កេះទឹកស៊ីអ៊ីវ០២យួរ ទឹកត្រី០២យួរ ទឹកផ្លែឈើ០២កេះ ប៊ីចេង០១កញ្ចប់ អង្ករ៥០គីឡូក្រាម ថវិកា៤០ម៉ឺរៀល ។
ក្រុមគ្រួសារវីរកងទ័ពដែលទទួលបានការជួយឧបត្ថម្ភលើកទឹកចិត្តពីនាយឧត្តមសេនីយ៍ សៅ សុខា បានថ្លែងអំណរគុណនិងជូនពរដល់ឯកឧត្តមមេបញ្ជាការនិងសហការីទាំងអស់ ទទួលបាននូវសេចក្តីសុខ សុភមង្គល និងសម្រេចបានជោគជ័យគ្រប់ភារកិច្ច ៕
ចែករំលែកព័តមាននេះ