ខេត្តកណ្តាល ៖ មានករណីក្មេងប្រុសអាយុ៣ឆ្នាំម្នាក់ មកតាមម្តាយមីង និងជីដូន មកលក់ខោអាវនៅច្រមុះជ្រូកសួនច្បារមាត់ទន្លេ ក្រុងតាខ្មៅ បន្ទាប់មកកុមាររងគ្រោះក៏បានរត់លេង ហើយបានយកដៃទៅប៉ះបង្គោលភ្លើងដែកបំភ្លឺផ្លូវសាធារណ: បណ្តាលអោយឆក់ដួលប្រកាច់ភ្លាមៗតែម្តង…
ខេត្តកណ្តាល ៖ មានករណីក្មេងប្រុសអាយុ៣ឆ្នាំម្នាក់ មកតាមម្តាយមីង និងជីដូន មកលក់ខោអាវនៅច្រមុះជ្រូកសួនច្បារមាត់ទន្លេ ក្រុងតាខ្មៅ បន្ទាប់មកកុមាររងគ្រោះក៏បានរត់លេង ហើយបានយកដៃទៅប៉ះបង្គោលភ្លើងដែកបំភ្លឺផ្លូវសាធារណ: បណ្តាលអោយឆក់ដួលប្រកាច់ភ្លាមៗតែម្តង ហើយក៏ស្លាប់ក្រោយបញ្ជូនទៅដល់មន្ទីរពេទ្យ ។
ហេតុការណ៍ដ៏គួរអោយរន្ធត់នេះបានកើតឡើងកាលពីវេលាម៉ោង ០៨ និង ៣០នាទីយប់ថ្ងៃទី១៩ ខែតុលា ឆ្នាំ២០២៥ នៅចំណុចកន្លែងលក់ខោអាវច្រមុះជ្រូកសួនច្បារតាខ្មៅ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល ។
លោកវរសេនីយ៍ឯក យី វណ្ណដា អធិការក្រុងតាខ្មៅ បានឲ្យដឹងថា កុមាររងគ្រោះឈ្មោះ កាណាន់ គីមហេង ភេទប្រុស អាយុ៣ឆ្នាំ ស្នាក់នៅភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាល រស់នៅជាមួយយាយ ឈ្មោះ សៀម ឡេងស្នាក់នៅទីតាំងខាងលើ ។
ក្នុងនោះបើតាមសម្តីរបស់លោកយាយរបស់កុមាររងគ្រោះឈ្មោះសៀម ឡេង បានអោយដឹងថាកុមាររងគ្រោះបានមកតាមម្តាយមីងនិងយាយ មកលក់ខោអាវនៅច្រមុះជ្រូកសួនច្បារមាត់ទន្លេ ក្រុងតាខ្មៅ បន្ទាប់មកកុមាររងគ្រោះក៏បានរត់លេងហើយបានយកដៃទៅប៉ះបង្គោលភ្លើងបំភ្លឺផ្លូវសាធារណៈដែលមានភ្លើង បណ្តាលអោយឆក់ដួលភ្លាមតែម្តង បន្ទាប់មកម្តាយមីងនិងយាយ បានដឹកកុមាររងគ្រោះទៅមន្ទីពេទ្យបង្អែកជ័យជំនះដើម្បីអោយគ្រូពេទ្យសង្គ្រោះ ពេលដល់មន្ទីពេទ្យគ្រូពេទ្យបានពិនិត្យ វាស់ចង្វាក់បេះដូង ធ្វើចលនា ប៉ុន្តែកុមាររងគ្រោះបានដាច់ខ្យល់ស្លាប់បាត់ទៅហើយ ។ ទើបប្រញាប់ប្រញាល់រាយការណ៍ទៅអាជ្ញាធរនិងសមត្ថកិច្ចចុះមកធ្វើការត្រួតពិនិត្យ ។
ក្រោយកើតហេតុ សមត្ថកិច្ចបានធ្វើការពិនិត្យសពកុមាររងគ្រោះយ៉ាងយកចិត្តទុកដាក់ បញ្ជាក់ថា សពពិតជាស្លាប់ដោយសារឆក់ខ្សែភ្លើងស្លាប់ពិតមែន និងប្រគល់សពឲ្យសាច់ញាតិធ្វើបុណ្យតាមប្រពៃណី ។
ក្នុងនោះដែលប្រជាពលរដ្ឋនៅនៅក្នុងមូលដ្ឋានខាងលើ សូមស្នើសុំទៅកាន់ក្រសួងសាធារណការក្រុងតាខ្មៅ មេត្តាជួយត្រួតពិនិត្យចំពោះបញ្ហា បង្គោលភ្លើងបំភ្លឺផ្លូវសាធារណៈនេះផង ចៀសវាងប្រជាពលរដ្ឋដែលមិនដឹង ដើរមកប៉ះអាចនឹងប្រឈមគ្រោះថ្នាក់ដល់អាយុជីវិតដូចករណីខាងលើទៀត ៕
ចែករំលែកព័តមាននេះ