ខេត្តមណ្ឌលគិរី ៖ ក្នុងស្មារតីទទួលខុសត្រូវខ្ពស់ចំពោះសុខុមាលភាពរបស់ប្រជាពលរដ្ឋក្នុងមូលដ្ឋាន មិនថាក្នុងកាលៈទេសៈណានោះទេ កាលពីព្រឹកថ្ងៃទី១៦ ខែធ្នូ ឆ្នាំ២០២៥ ក្រុមប្រឹក្សាសង្កាត់ស្ពានមានជ័យ និងកម្លាំងប៉ុស្តិ៍នគរបាលរដ្ឋបាលស្ពានមានជ័យ បាននាំយកអំណោយមនុស្សធម៌ជាគ្រឿងឧបភោគ…
ខេត្តមណ្ឌលគិរី ៖ ក្នុងស្មារតីទទួលខុសត្រូវខ្ពស់ចំពោះសុខុមាលភាពរបស់ប្រជាពលរដ្ឋក្នុងមូលដ្ឋាន មិនថាក្នុងកាលៈទេសៈណានោះទេ កាលពីព្រឹកថ្ងៃទី១៦ ខែធ្នូ ឆ្នាំ២០២៥ ក្រុមប្រឹក្សាសង្កាត់ស្ពានមានជ័យ និងកម្លាំងប៉ុស្តិ៍នគរបាលរដ្ឋបាលស្ពានមានជ័យ បាននាំយកអំណោយមនុស្សធម៌ជាគ្រឿងឧបភោគ និងបរិភោគជូនដល់ជនភៀសសឹកចំនួន ០៧ គ្រួសារ មកពីខេត្តបាត់ដំបង និងខេត្តបន្ទាយមានជ័យ ដែលបច្ចុប្បន្នមកស្នាក់នៅក្នុងមូលដ្ឋានសង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។
លោក គុជ ម៉េងធូ ចៅសង្កាត់ បានគូសបញ្ជាក់ថា អំណោយមនុស្សធម៌ដែលយើងបាននាំយកមកចែកជូននៅពេលនេះ គឺបានមកពីការគៀងគរដោយសាលាសង្កាត់ និងប៉ុស្តិ៍នគរបាលរដ្ឋបាលស្ពានមានជ័យ ពីសំណាក់សប្បុរសជននានា។ នេះគឺជាកាយវិការបង្ហាញពីការទទួលខុសត្រូវរបស់អាជ្ញាធរមូលដ្ឋានក្នុងការដោះស្រាយបញ្ហាប្រឈមរបស់ប្រជាពលរដ្ឋ ទោះបីពួកគាត់ជាជនភៀសសឹកក៏ដោយ ឲ្យតែស្នាក់នៅក្នុងដែនសមត្ថកិច្ចរបស់យើង។ យើងចង់ឲ្យពួកគាត់មានភាពកក់ក្តៅ និងមានជំនឿទុកចិត្តលើការគាំពាររបស់អាជ្ញាធរ។
លោក គុជ ម៉េងធូ ក៏បានបន្ថែមថា អាជ្ញាធរនិងកម្លាំងប៉ុស្តិ៍របស់យើង មិនត្រឹមតែបំពេញភារកិច្ចការពារសន្តិសុខ សណ្តាប់ធ្នាប់ប៉ុណ្ណោះទេ ប៉ុន្តែយើងក៏ចូលរួមយ៉ាងសកម្មក្នុងកិច្ចការមនុស្សធម៌ និងការងារសង្គមផងដែរ។ យើងចាត់ទុកការផ្តល់ជំនួយនេះ ជាការងារស្នូលមួយក្នុងការពង្រឹងទំនាក់ទំនងរវាងនគរបាល និងប្រជាពលរដ្ឋ ស្របតាមទិសស្លោករបស់ក្រសួងមហាផ្ទៃ។អំណោយដែលបានចែកជូនជនភៀសសឹកទាំង ០៧ គ្រួសារ បានទទួលនូវគ្រឿងឧបភោគ និងបរិភោគមួយចំនួនធំ ដើម្បីជួយសម្រួលដល់ការរស់នៅប្រចាំថ្ងៃ៕
ចែករំលែកព័តមាននេះ