ឯកឧត្តម ទេសរដ្ឋមន្ត្រី គន់ គីម ៖ ទោះក្នុងកាលៈទេសៈណា រាជរដ្ឋាភិបាលគិតដល់សុខទុក្ខជនភៀសសឹកជានិច្ច
- ពោធិ៍សាត់
ខេត្តពោធិ៍សាត់៖ នៅថ្ងៃទី១៥ ខែធ្នូ ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី គន់ គីម…
ខេត្តពោធិ៍សាត់៖ នៅថ្ងៃទី១៥ ខែធ្នូ ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញចុះពិនិត្យតាមបណ្តាមណ្ឌលសុវត្ថិភាពជនភៀសសឹក ក្នុងឃុំប្រមោយ ស្រុកវាលវែង។ស
អំឡុងចុះពិនិត្យតាមបណ្តាមណ្ឌលសុវត្ថិភាព ឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍ថា ក្នុងគ្រាដ៏លំបាកដោយសារការឈ្លានពានពីកងទ័ពនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ បានណែនាំដល់ក្រសួង-ស្ថាប័ន និងអាជ្ញាធរគ្រប់ជាន់ថ្នាក់ត្រូវមានការយកចិត្តទុកដាក់ពីសុខទុក្ខប្រជាជនភៀសសឹកដែលបន្តជម្លៀសមកពីព្រំដែន។
ឯកឧត្តម ទេសរដ្ឋមន្ត្រី បញ្ជាក់ថា រាជរដ្ឋាភិបាល ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី មានគោលជំហរច្បាស់លាស់ក្នុងការការពារអធិបតេយ្យភាពជាតិ ជាពិសេសការពារអាយុជីវិតប្រជាពលរដ្ឋស៊ីវិលស្លូតត្រង់ទោះក្នុងតម្លៃណាក៏ដោយ រាជរដ្ឋាភិបាល និងកងកម្លាំងប្រដាប់នៅជាមួយប្រជាពលរដ្ឋជានិច្ច។
អំឡុងពេលចុះពិនិត្យ ឯកឧត្តម ទេសរដ្ឋមន្ត្រី ពិនិត្យឃើញថា ទោះបីកំណើននៃការជម្លៀសតាមបណ្តោយព្រំដែន ក្នុងពេលកងទ័ពថៃបន្តវាយប្រហារឥតឈប់ឈរ ជាពិសេសតំបន់ដែលមានប្រជាពលរដ្ឋស្លូតត្រង់រស់នៅនោះ ត្រូវបានអាជ្ញាធរគ្រប់ជាន់ថ្នាក់របស់រដ្ឋបាលខេត្តខិតខំប្រឹងប្រែងដោះស្រាយ និងរៀបចំយ៉ាងយកចិត្តទុកដាក់ជូនជនភៀសសឹក ដើម្បីឱ្យប្រជាពលរដ្ឋមានទីតាំងស្នាក់នៅបណ្តោះអាសន្នមួយប្រកបដោយសុវត្ថិភាព និងទទួលបានស្បៀងគ្រប់គ្រាន់។
ជាមួយគ្នានេះ ឯកឧត្តម ទេសរដ្ឋមន្ត្រី បានថ្លែងអំណរគុណដល់អាជ្ញាធរខេត្ត ក្នុងការឆ្លើយតប អន្តរាគមន៍ទាន់ពេលវេលា និងមានការទទួលខុសត្រូវខ្ពស់ចំពោះសុខទុក្ខប្រជាពលរដ្ឋក្នុងពេលវេលាដែលជាតិ និងប្រជាជនប្រឈមដោយសង្គ្រាមឈ្លានពានពីកងទ័ពថៃ។
បន្ថែមលើនេះ ឯកឧត្តម ទេសរដ្ឋមន្ដ្រី សំណូមពរដល់បងប្អូនប្រជាពលរដ្ឋភៀសសឹកត្រូវស្ដាប់ការណែនាំរបស់អាជ្ញាធរ និងត្រូវជឿជាក់លើការដឹកនាំរបស់រាជរដ្ឋាភិបាលកម្ពុជា ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដែលតែងតែគិតពីសុខទុក្ខប្រជាពលរដ្ឋគ្រប់ពេលវេលា និងគ្រប់ដំណាក់កាល។
សូមជម្រាបថា ខេត្តពោធិ៍សាត់ជាខេត្តមួយក្នុងចំណោមខេត្តទាំង៧ដែលរងការឈ្លានពានពីកងទ័ពថៃ ហើយធ្វើឱ្យប្រជាជនខ្មែរជម្លៀសទៅមណ្ឌលសុវត្ថិភាពសរុបចំនួនប្រមាណ៨០០គ្រួសារ៕
ចែករំលែកព័តមាននេះ