ទីក្រុងតូក្យូ៖ ប្រធានគណបក្សកាន់អំណាចនៅជប៉ុន លោកស្រីសាណាអិ តាកាអ៊ីឈិ (Sanae Takaichi) សឹងតែច្បាស់១០០%ថានឹងទទួលបានសំឡេងគាំទ្រគ្រប់គ្រាន់ពីសភាដើម្បីក្លាយជានាយករដ្ឋមន្ត្រីថ្មីបន្ទាប់ពីគណបក្សនវានុវត្តន៍ដែលគេច្រើនស្គាល់ថាគណបក្សអ៊ីស៊ីន (Ishin) យល់ព្រមបោះឆ្នោតគាំទ្របេក្ខភាពរបស់លោកស្រី។ តាមគម្រោង…
ទីក្រុងតូក្យូ៖ ប្រធានគណបក្សកាន់អំណាចនៅជប៉ុន លោកស្រីសាណាអិ តាកាអ៊ីឈិ (Sanae Takaichi) សឹងតែច្បាស់១០០%ថានឹងទទួលបានសំឡេងគាំទ្រគ្រប់គ្រាន់ពីសភាដើម្បីក្លាយជានាយករដ្ឋមន្ត្រីថ្មីបន្ទាប់ពីគណបក្សនវានុវត្តន៍ដែលគេច្រើនស្គាល់ថាគណបក្សអ៊ីស៊ីន (Ishin) យល់ព្រមបោះឆ្នោតគាំទ្របេក្ខភាពរបស់លោកស្រី។ តាមគម្រោង សភានឹងកោះប្រជុំនៅថ្ងៃទី២១ ខែតុលាដើម្បីបោះឆ្នោតផ្ដល់សេចក្ដីទុកចិត្ត។ គណបក្សអ៊ីស៊ីនមាននិន្នាការស្ដាំនិយមដូចលោកស្រីតាកាអ៊ីឈិដែរ។
ដូច្នេះ បូកសរុបចូលគ្នាទៅ បើគ្មានអ្វីប្រែប្រួលទេ លោកស្រីតាកាអ៊ីឈិនឹងទទួលបានសំឡេងគាំទ្រពីអ្នកតំណាងរាស្ត្រ២៣១រូបនៅក្នុងរដ្ឋសភា។ ទោះបីគណបក្សទាំង២សហការគ្នា ប៉ុន្តែនៅខ្វះ២អាសនៈទៀតទើបគ្រប់សំឡេងភាគច្រើនដាច់ខាត។ ទោះជាយ៉ាងណាក្ដី គេសង្ឃឹមថាលោកស្រីនឹងទទួលបានសំឡេងគ្រប់គ្រាន់នៅក្នុងការបោះឆ្នោតនៅសភា។ ក្រោយពេលចុះកិច្ចព្រមព្រៀងជាមួយគណបក្សអ៊ីស៊ីនរួច លោកស្រីឆ្លៀតផ្ដល់បទសម្ភាសជាមួយអ្នកសារព័ត៌មាន។
លោកស្រីថ្លែងថាលោកស្រីត្រៀមខ្លួនរួចជាស្រេចដើម្បីសហការគ្នាពង្រឹងសេដ្ឋកិច្ចជាតិរបស់ជប៉ុន និងគិតទៅដល់អ្នកជំនាន់ក្រោយៗទៀត។ ជាការតបស្នងចំពោះការសន្យាបោះឆ្នោតគាំទ្រលោកស្រីតាកាអ៊ីឈិនៅរដ្ឋសភា គណបក្សអ៊ីស៊ីនទទួលបានការសន្យាពីលោកស្រីតាកាអ៊ីឈិថារដ្ឋាភិបាលនឹងកាត់បន្ថយចំនួនអ្នកតំណាងរាស្ត្រ១០% និងព្យួរទុកការយកពន្ធទៅលើចំណីអាហាររយៈពេល២ឆ្នាំ។
ប្រធានគណបក្សអ៊ីស៊ីន លោកហ៊ីរ៉ូហ៊្វូមី យ៉ូស៊ីមូរ៉ា (Hirofumi Yoshimura) ថ្លែងថាប្រទេសជាតិកំពុងតែប្រឈមយ៉ាងខ្លាំងនឹងបញ្ហាបរិស្ថានជាសាកល។ ចំណែកស្ថានភាពនៅក្នុងប្រទេសក៏មានសភាពស្រួចស្រាល់ផងដែរ។ នៅក្នុងស្ថានភាពទាំងនេះ លោកជឿជាក់ថាវាជារឿងដ៏សំខាន់ជាទីបំផុតដែលយើងត្រូវតែមានប្រព័ន្ធអភិបាលកិច្ចដ៏រឹងមាំមួយដើម្បីជាប្រយោជន៍សម្រាប់ប្រទេសជាតិ និងប្រជាជន៕
ចែករំលែកព័តមាននេះ