រាជធានីភ្នំពេញ ៖ បុរសវ័យ៤០ឆ្នាំម្នាក់ បានបើករថយន្ត១គ្រឿង និងមានសណ្ដោងម៉ូតូទឹកពីខាងក្រោយរថយន្ត បើកមកកំពង់ដរកោះពេជ្រចាស់ ក្នុងគោលបំណងយកម៉ូតូទឹកនោះមកជិះលេងនៅទន្លេបាសាក់ លុះជិះបានបន្តិច មិនដឹងមានមូលហេតុអ្វីនោះទេ ស្រាប់តែបុរសរូបនោះធ្លាក់ពីលើម៉ូតូទឹក…
រាជធានីភ្នំពេញ ៖ បុរសវ័យ៤០ឆ្នាំម្នាក់ បានបើករថយន្ត១គ្រឿង និងមានសណ្ដោងម៉ូតូទឹកពីខាងក្រោយរថយន្ត បើកមកកំពង់ដរកោះពេជ្រចាស់ ក្នុងគោលបំណងយកម៉ូតូទឹកនោះមកជិះលេងនៅទន្លេបាសាក់ លុះជិះបានបន្តិច មិនដឹងមានមូលហេតុអ្វីនោះទេ ស្រាប់តែបុរសរូបនោះធ្លាក់ពីលើម៉ូតូទឹក ហែលលើកដៃអោយគេជួយបានបន្តិចក៏លិចបាត់អស់ច្រើនម៉ោង ហើយម៉ូតូទឹករសាត់ទៅដល់ស្ពានព្រះមុនីវង្សចាស់ ។ ចំណែកបុរសរងគ្រោះ ត្រូវបានគេសង្ស័យថា អាចហូរទៅដល់ក្រុងតាខ្មៅ ដោយសារទឹកហូរខ្លាំងពេក ។
ហេតុការណ៍ខាងលើនេះបង្កការភ្ញាក់ផ្អើល កាលវេលាម៉ោង៤រសៀលថ្ងៃទី២៧ ខែកញ្ញា ឆ្នាំ២០២៥ នៅចំណុចក្បែរស្ពានកោះនរាបរិវេនកោះពេជ្រ ក្រុម៧៨ ស្ថិតនៅភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញបុរសជនរងគ្រោះខាងលើ មានការណាត់មិត្តភក្តិបើករថយន្ត ដោយមានសណ្ដោងម៉ូតូទឹកស៊េរីទំនើបតំលៃរាប់ម៉ឺនដុល្លារ យកមកជិះលេងនៅទន្លេបាសាក់ ប៉ុន្តែមិត្តភក្តិមិនទាន់មកដល់នោះទេ ជនរងគ្រោះបើករថយន្តមកដល់មុន ក៏បើករថយន្តថយទៅកំពង់ចម្លងកោះពេជ្រទៅកោះនរាចាស់ ដើម្បីទំលាក់ម៉ូតូទឹក ពេលជនរងគ្រោះថយរួចរាល់ក៏ចាប់ផ្ដើមជិះម៉ូតូទឹកតែម្នាក់ឯង ពេលនោះមិនមានមូលហេតុអ្វីនោះទេ ស្រាប់តែគេឃើញបុរសរងគ្រោះធ្លាក់ពីលើម៉ូតូទឹកហែលបានបន្តិចស្រែកអោយគេជួយដែរ តែកន្លែងដែលជនរងគ្រោះជិះម៉ូតូទឹកលេងនោះទឹកហូរគួចខ្លាំងពេក ក៏លិចបុរសរងគ្រោះបាត់ សូម្បីតែម៉ូតូទឹករសាត់ទៅដល់ស្ពានព្រះមុនីវង្សចាស់ ទើបក្រោយមកក៏មានមិត្តភក្តិមកដល់ក៏ថយរថយន្តឡិចស៊ីស១គ្រឿងចូលច្រាំងទឹកទន្លេ ដើម្បីទំលាក់ម៉ូតូទឹកបើកចេញតាមរកជនរងគ្រោះដែលលិចទឹកបាត់ខ្លួននោះ តែរកតាំងម៉ោង៤រសៀលរហូតទៅដល់កណ្ដាលយប់ ដោយមានដាក់សែនផ្លែឈើផង អុជធូបផង ទៀនផង ដើម្បីបន់ស្រន់សុំម្ចាស់ទឹកម្ចាស់ដី សុំអោយរកសពឃើញ ប្រសិនជាជនរងគ្រោះពិតជាបានលង់ទឹកស្លាប់មែននោះ ។
សមត្ថកិច្ចបានបញ្ជាក់ថា ករណីខាងលើនេះក្រុមគ្រួសាររបស់ជនរងគ្រោះ សុំតាមស្វែងរកជនរងគ្រោះសិន មិនទាន់មានពេលវេលាឆ្លើយតបនិងបំភ្លឺជូនសមត្ថកិច្ច និងសូមអធ្យាស្រ័យផងដែរ ដោយសមត្ថកិច្ចមានការយោគយល់ ខណៈគ្រួសារជនរងគ្រោះកំពុងជួបទុក្ខក្រៀមក្រំបាត់បង់សមាជិក មិនទាន់រកឃើញឱ្យប្រាកដថា ស្លាប់ឬក៏រស់នោះទេ ដោយអ្នកជួយរកប្រើម៉ូតូទឹករយៈពេលច្រើនម៉ោងរហូតដល់រំលងអាធ្រាត្រ ក៏បានបញ្ឈប់ការរុករកជាបណ្ដោះអាសន្នសិន រងចាំរុករកបន្តនៅព្រឹកស្អែកទៀត និងហៅទូកអ្នកនេសាទដែលជំនាញរាវរកសពដែលលង់ទឹក ដើម្បីតាមរុករកជាបន្តទៀតផងដែរ ៕
ចែករំលែកព័តមាននេះ