រាជធានីភ្នំពេញ ៖ សម្ដេចមហាបវរធិបតី ហ៊ុន ម៉ាណែត បានដកតំណែងឧត្តមសេនីយ៍ត្រី កែវ សារ៉ាវុធ អគ្គនាយករងសវនកម្មផ្ទៃក្នុង ក្របខ័ណ្ឌមន្ដ្រីនគរបាលជាតិកម្ពុជា…
រាជធានីភ្នំពេញ ៖ សម្ដេចមហាបវរធិបតី ហ៊ុន ម៉ាណែត បានដកតំណែងឧត្តមសេនីយ៍ត្រី កែវ សារ៉ាវុធ អគ្គនាយករងសវនកម្មផ្ទៃក្នុង ក្របខ័ណ្ឌមន្ដ្រីនគរបាលជាតិកម្ពុជា ឲ្យមកជាមន្ដ្រី ។
មុនឈានដល់ការដកស័ក្តិពីផ្កាយ១ មកនៅជាមន្ត្រីធម្មតានេះ កាលពីកំលុងខែឧសភាកន្លងទៅនេះ លោក កែវ សារ៉ាវុធ បានសាងកំហុស ពេលចុះធ្វើបំពេញការងារនៅស្រុកសាមគ្គីមុនីជ័យ ក្នុងខេត្តកំពង់ស្ពឺ ដោយយកលុយពីឃុំចំនួន១០ ក្នុងស្រុកនេះ ក្នុងមួយឃុំ ប្រមាណ១លានរៀល ។
កាលពីថ្ងៃទី២១ ខែឧសភា ឆ្នាំ២០២៤ លោក កែវ សារ៉ាវុធ ត្រូវបានលោកអភិសន្តិបណ្ឌិត ស សុខា ចាត់ឲ្យអគ្គាធិការដ្ឋានក្រសួងមហាផ្ទៃ ចុះអង្កេតស្រាវជ្រាវករណីជាបន្ទាន់ ។ ជាលទ្ធផលក្រោយការបំភ្លឺលោក កែវ សារ៉ាវុធ ទទួលស្គាល់ថា លោកពិតជាបានដឹកនាំក្រុមការងារ៧រូប ធ្វើសវនកម្មនៅខេត្តកំពង់ស្ពឺ ចាប់ពីថ្ងៃទី២៤ ខែមេសា ឆ្នាំ២០២៤ ដោយប្រើមធ្យោបាយធ្វើដំណើររថយន្តផ្ទាល់ខ្លួនចំនួន ២គ្រឿង និងទើបតែធ្វើសវនកម្មបានចំនួន ៤ស្រុកប៉ុណ្ណោះ ។
សូមរំលឹកថា បែកធ្លាយរឿងបណ្ដើរៗហើយ ករណីដែលមន្ត្រីនាយកដ្ឋានសវនកម្មផ្ទៃក្នុងក្រសួងមហាផ្ទៃ យកលុយពីតាមបណ្ដាឃុំ ជាថ្នូរ នឹងការមិនចុះធ្វើសវនកម្ម និងជួយសម្រួលរបាយការណ៍ល្អៗ ពីមន្ត្រីជំនាញ ។
យោងតាមប្រភពបែកធ្លាយរបស់ផេកហ្វេសប៊ុកលោក ផែង វណ្ណៈ បានសរសេរថា ៖ “ព័ត៌មានមន្ត្រីឃុំខ្សិបខ្សៀវ រឿងលោកធំនៅ អគ្គនាយកដ្ឋានសវនកម្មផ្ទៃក្នុង យកលុយ ១ឃុំ ១លានរៀល ដែលបានស្ដាប់ឮបានក្លាយជាការពិតហើយ ព្រោះម្សិលមិញ ថ្ងៃទី២០ ខែ ឧសភា ឆ្នាំ២០២៤ មន្ត្រីសវនកម្មផ្ទៃក្នុង និងមន្ត្រីស្រុក ភ័យស្លន់ស្លោ នាំគ្នាយកលុយទៅសងឃុំទាំង១០ នៅសាលាស្រុកសាមគ្គីមុនីជ័យ ខេត្តកំពង់ស្ពឺ វិញហើយ ។ ប៉ុន្តែ ក្នុងពេលយកលុយទៅអោយឃុំវិញនោះ មន្ត្រីដែលចុះទៅបានស្នើទៅមេឃុំ អោយធ្វើលិខិតបដិសេធ ថា ក្រុមការងារ មិនបានយកលុយដូចលោក ផែង វណ្ណៈ ផ្សាយទេ ហើយបើមានអង្គភាពប្រឆាំងអំពើពុករលួយ ចុះស្រាវជ្រាវ សូមអោយបណ្ដាឃុំ ជួយឆ្លើយប្រាប់ថា មិនមានការបង់លុយអោយទៅក្រុមការងារលោកឧត្ដមសេនីយ៍ត្រី កែវ សារ៉ាវុធ អគ្គនាយករង នៃ អគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃនោះទេ ។ និយាយតាមត្រង់ ចំណុះខ្វះខាតគួរតែកែប្រែ មិនមែនចង់បិទបាំងហើយទម្លាក់កំហុសវាយបកមកលើអ្នកសារព័ត៌មានទេ ។ ខ្ញុំផ្សាយខ្ញុំទទួលខុសត្រូវ បុគ្គល ឬ អង្គភាព ពាក់ព័ន្ធ អាចធ្វើការបំភ្លឺបាន ។ ទម្លាប់ខ្ញុំ ព័ត៌មានមិនពិតខ្ញុំមិនផ្សាយទេ ។ ព័ត៌មាននេះ សរសេរទៅវែងណាស់ ព្រោះមិនមែន ១០ឃុំ ឬ មួយស្រុកទេ ការយកលុយពីមូលដ្ឋានឃុំ ស្រុក ខេត្តកំពង់ស្ពឺ មានច្រើន មូលហេតុយកលុយជាថ្នូរ នឹងការមិនចុះធ្វើសវនកម្មផ្ទៃក្នុង និងជួយសម្រួលរបាយការណ៍ល្អៗអំពីមូលដ្ឋានឃុំសង្កាត់ ស្រុកក្រុង ខេត្ត ” ៕
អត្ថបទពាក់ព័ន្ធ ៖ «ឧត្តមសេនីយ៍ត្រី កែវ សារ៉ាវុធ ទទួលស្គាល់ថា បានយកថវិកា១០ឃុំ ចំនួន១០លានរៀល ពិតប្រាកដមែន» ។
«រឿងដេញថ្លៃធ្វើផ្លូវភាគច្រើន បានទៅលើក្រុមហ៊ុនរបស់លោកស្រេងហៃ អនុប្រធានផែនការវិនិយោគខេត្តកំពង់ស្ពឺ» ។
ចែករំលែកព័តមាននេះ