កក្រើកចិន! អតីតក្បាលម៉ាស៊ីនបាល់ទាត់ចិន សារភាពរឿងទទួលសំណូ.ករាប់លានដុល្លារ
ចិន ៖ អតីតប្រធានសមាគមកីឡាបាល់ទាត់ចិន លោក Chen Xuyuan កាលពីថ្ងៃទី២៩ ខែមករា ឆ្នាំ
ចិន ៖ អតីតប្រធានសមាគមកីឡាបាល់ទាត់ចិន លោក Chen Xuyuan កាលពីថ្ងៃទី២៩ ខែមករា ឆ្នាំ២០២៤ បានសារភាពកំហុសពីបទទទួលប្រាក់សំណូកប្រមាណ ៨១លានយ័ន ស្មើនឹង ១១.៣លានដុល្លារអាមេរិក អំឡុងពេលតួនាទីរបស់គាត់។
កាសែតរដ្ឋចិន China Daily បានរាយការណ៍ថា សវនាការសាធារណៈករណីលោក Chen ត្រូវបានធ្វើឡើងនៅតុលាការប្រជាជនកម្រិតមធ្យមទីក្រុង Huangshi ខេត្តហ៊ូប៉ី (Hubei) ភាគកណ្តាលប្រទេសចិន ដែលជាកន្លែងលោកបានសម្តែងវិប្បដិសារីក្នុងសេចក្តីថ្លែងការណ៍ចុងក្រោយ ខណៈសាលក្រមនឹងត្រូវប្រកាសនៅពេលក្រោយ។
ព្រះរាជអាជ្ញាបានចោទប្រកាន់ថា ចាប់ពីឆ្នាំ២០១០ ដល់ឆ្នាំ២០២៣ លោក Chen បានប្រើតួនាទីលើផ្លូវខុស រួមទាំងតួនាទីប្រធានក្រុមហ៊ុន Shanghai International Port Group និងប្រធានសមាគមបាល់ទាត់ចិន ដើម្បីផ្តល់ជំនួយខុសច្បាប់ដល់អង្គភាព និងបុគ្គលមួយចំនួនក្នុងបញ្ហាដូចជា កិច្ចសន្យាគម្រោង ការវិនិយោគ និងការរៀបចំព្រឹត្តិការណ៍ប្រកួតជាថ្នូរនឹងការទទួលបានប្រាក់ប្រហែល ៨១,០៣លានយន់ពីពួកគេ។ ព្រះរាជអាជ្ញាបានផ្តល់អនុសាសន៍ឱ្យចាប់ខ្លួនលោក Chen ហើយទទួលខុសត្រូវទោសព្រហ្មទណ្ឌចំពោះការទទួលសំណូក។
សកម្មភាពប្រឆាំងអំពើពុករលួយមួយចំនួន នៅក្នុងវិស័យបាល់ទាត់ចិននៅចុងឆ្នាំ ២០២២ បានឃើញមន្ត្រីជាន់ខ្ពស់ និងថ្នាក់កណ្តាលមួយចំនួននៃសមាគមបាល់ទាត់ចិន រួមទាំងលោក Chen និងបុគ្គលផ្សេងទៀតដូចជាគ្រូបង្វិក កីឡាករ អាជ្ញាកណ្តាល នាយកប្រតិបត្តិ និងភ្នាក់ងារក្លិប ដែលអ្នកទាំងនោះកំពុងត្រូវបានស៊ើបអង្កេត។
នៅក្នុងភាពយន្តឯកសារកាលពីពេលថ្មីៗនេះស្តីពីការប្រយុទ្ធប្រឆាំងនឹងអំពើពុករលួយ ដែលបានចាក់ផ្សាយលើកញ្ចក់ទូរទស្សន៍រដ្ឋចិន CCTV លោក Chen បានសារភាពថា គាត់បានបំពានអំណាច ទទួលសំណូកពីក្លិប និងការមិនយកចិត្តទុកដាក់ចំពោះបញ្ហាក្នុងបាល់ទាត់ចិន។ លោកបានសុំទោសដល់អ្នកគាំទ្របាល់ទាត់ទូទាំងប្រទេសដោយនិយាយថា អ្នកគាំទ្រអាចអត់ឱនចំពោះការដើរថយក្រោយនៃបាល់ទាត់ចិន ប៉ុន្តែពួកគេមិនអាចអត់ទោសចំពោះអំពើពុករលួយបានទេ។
លោក Chen Xuyuan អាយុ៦៧ឆ្នាំ ដែលកើតនៅទីក្រុងសៀងហៃ បានធ្វើការជាលេខាបក្ស និងប្រធានក្រុមហ៊ុន Shanghai International Port Group ចាប់ពីឆ្នាំ ២០១១ ដល់ខែមិថុនា ឆ្នាំ២០១៩។ គាត់បានចូលកាន់តំណែងជាប្រធានសមាគមបាល់ទាត់ចិន នៅខែសីហា ឆ្នាំ២០១៩ ហើយត្រូវបានដាក់ឱ្យស្ថិតនៅក្រោមការត្រួតពិនិត្យវិន័យ និងការស៊ើបអង្កេត កាលពីខែកុម្ភៈ ឆ្នាំ២០២៣ ហើយក្នុងខែកញ្ញា ព្រះរាជអាជ្ញាប្រជាជនកម្រិតមធ្យមទីក្រុង Huangshi ត្រូវបានចាត់តាំងឱ្យដោះស្រាយករណីនេះ។ អតីតមន្ត្រីបាល់ទាត់ចិន២នាក់ផ្សេងទៀត ក៏បានកាត់ទោសកាលពីថ្ងៃទី២៩ ខែមករា ផងដែរ។
ករណីសូកប៉ាន់របស់លោក Chen Yongliang អតីតប្រធាននាយកដ្ឋានគ្រប់គ្រងក្រុមជម្រើសជាតិចិន ត្រូវបានបើកសវនាការជាសាធារណៈដោយតុលាការប្រជាជនស្រុក Xian’an ទីក្រុង Xianning ខេត្តហ៊ូប៉ី។ ករណីសូកប៉ាន់របស់លោក Liu Lei អតីតប្រធានផ្នែកប្រកួតប្រជែងនៃមជ្ឈមណ្ឌលគ្រប់គ្រងបាល់ទាត់ក្រុងវូហាន (Wuhan) ក៏ត្រូវបានតុលាការប្រជាជនតំបន់ Jiayu នៃខេត្តហ៊ូប៉ី បើកសវនាការផងដែរ។
របាយការណ៍ពី CCTV បានរាយការណ៍ថា លោក Yu Hongchen អតីតអនុប្រធានសមាគមបាល់ទាត់ចិន និងលោក Dong Zheng អតីតអ្នកចាត់ការទូទៅក្របខ័ណ្ឌលីគកំពូលចិន Chinese Super League នឹងឡើងសវនាការនៅថ្ងៃទី៣០ ខែមករា៕ (ប្រភព ៖ China Daily)
ខាងក្រោមនេះជាលីងអត្ថបទពាក់ព័ន្ធ ៖
–អតីតគ្រូជម្រើសជាតិចិនសារភាពថា សូកលុយយកតំណែងនេះ និងកំណត់លទ្ធផលប្រកួត
–«អំពើពុ.ករលួ.យ» ជាដើមចមនាំឱ្យក្រុមបាល់ទាត់ជម្រើសជាតិចិនបរាជ័យបន្តបន្ទាប់
ចែករំលែកព័តមាននេះ