រាជធានីភ្នំពេញ ៖ សហព័ន្ធកីឡាវ៉ូវីណាមកម្ពុជា ត្រូវបានរាជរដ្ឋាភិបាលអនុញ្ញាតជាគោលការណ៍ក្នុងការរៀបចំការប្រកួតជើងឯកអាស៊ីលើកទី៦បន្ទាប់ពីទទួលបានការគាំទ្រជាផ្លូវការពីសហព័ន្ធកីឡាវ៉ូវីណាមពិភពលោក។
ទីស្ដីការគណៈរដ្ឋមន្ត្រីបានចេញ ស.ជ.ណ កាលពីពេលថ្មីៗនេះឱ្យដឹងថា រាជរដ្ឋាភិបាលយល់ព្រមតាមសំណើរបស់ក្រសួងអប់រំ យុវជននិងកីឡា ដោយបានឯកភាពជាគោលការណ៍ឱ្យសហព័ន្ធកីឡាវ៉ូវីណាមកម្ពុជារៀបចំការប្រកួតជើងឯកអាស៊ីលើកទី៦ ដែលនឹងប្រព្រឹត្តទៅចាប់ពីថ្ងៃទី២១ដល់ថ្ងៃទី២៧ ខែវិច្ឆិកា ឆ្នាំ២០២៦នៅវិមានពហុកីឡដ្ឋានជាតិអូឡាំពិក រាជធានីភ្នំពេញ។ សហព័ន្ធកីឡាវ៉ូវីណាមកម្ពុជាទទួលរ៉ាប់រងលើការចំណាយទាំងស្រុងក្នុងការរៀបចំការប្រកួត ហើយក្នុងករណីកីឡាករ កីឡាការិនីកម្ពុជាទទួលបានជ័យលាភី សហព័ន្ធអាចស្នើសំុប្រាក់រង្វាន់លើកទឹកចិត្តដូចមានចែងក្នុងសេចក្ដីប្រកាសអន្តរក្រសួង។
មុនឈានដល់ការស្នើសុំគោលការណ៍រៀបចំការប្រកួតជើងឯកអាស៊ីលើកទី៦ពីរាជរដ្ឋាភិបាល
សហព័ន្ធកីឡាវ៉ូវីណាមកម្ពុជាដែលមានលោកអ៊ូ រតនា ជាប្រធានសហព័ន្ធ បានទទួលការគាំទ្រយ៉ាងផុសផុលពីបណ្ដាប្រទេសនៅអាស៊ី ។ គួបផ្សំទៅនឹងសក្ដានុពលកីឡាវ៉ូវីណាមកម្ពុជា ជាពិសេសការយកចិត្តទុកដាក់ពីរាជរដ្ឋាភិបាល សហព័ន្ធកីឡាវ៉ូវីណាមកម្ពុជាសម្រេចធ្វើលិខិតជាផ្លូវការដើម្បីស្នើសំុរៀបចំការប្រកួតបន្ទាប់ពីទទួលបានការគាំទ្រពីសហព័ន្ធកីឡាវ៉ូវីណាមពិភពលោក។
គួររំលឹកថា សហព័ន្ធកីឡាវ៉ូវីណាមកម្ពុជាដ៏មានសក្ដានុពលមួយនេះ ធ្លាប់ចូលរួមប្រកួតនៅលើឆាកអន្តរជាតិ និងដណ្ដើមបានមេដាយជាច្រើនជូនជាតិ ថែមទាំងធ្លាប់ធ្វើជាម្ចាស់ផ្ទះរៀបចំការប្រកួតជាច្រើនដងរួចមកហើយ ដូចជាការប្រកួតជើងឯកពិភពលោក ជើងឯកអាស៊ីអាគ្នេយ៍ ។
ជាពិសេសអ្វីកាន់តែអស្ចារ្យថែមទៀតនោះ គឺការប្រកួតកីឡាស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ។ សម្រាប់ការចូលរួមប្រកួតជើងឯកអាស៊ីលើកចុងក្រោយនៅក្នុងឆ្នាំ២០២៤ នៅកោះបាលីប្រទេសឥណ្ឌូនេស៊ី កម្ពុជាឈរនៅចំណាត់ថ្នាក់លេខ២ដណ្ដើមបានមេដាយសរុប៣០គ្រឿងក្នុងនោះមេដាយមាស៧គ្រឿង មេដាយប្រាក់១៧គ្រឿង និងមេដាយសំរឹទ្ធ៦គ្រឿង ៕
ចែករំលែកព័តមាននេះ