ខេត្តមណ្ឌលគិរី ៖ នារសៀលថ្ងៃទី១៩ ខែមីនា ឆ្នាំ២០២៦ នេះ មណ្ឌលកីឡដ្ឋានខេត្តមណ្ឌលគិរី បានប្រារព្ធពិធីបិទការប្រកួតកីឡាសិស្សបឋមសិក្សា និងមធ្យមសិក្សាជ្រើសរើសជើងឯកថ្នាក់ខេត្ត ប្រចាំឆ្នាំ២០២៦…
ខេត្តមណ្ឌលគិរី ៖ នារសៀលថ្ងៃទី១៩ ខែមីនា ឆ្នាំ២០២៦ នេះ មណ្ឌលកីឡដ្ឋានខេត្តមណ្ឌលគិរី បានប្រារព្ធពិធីបិទការប្រកួតកីឡាសិស្សបឋមសិក្សា និងមធ្យមសិក្សាជ្រើសរើសជើងឯកថ្នាក់ខេត្ត ប្រចាំឆ្នាំ២០២៦ ក្រោមអធិបតីភាពរបស់ លោក លន់ សុភាព អភិបាលរងខេត្តមណ្ឌលគិរី ។
ពិធីនេះក៏មានការអញ្ជើញចូលរួមពីសំណាក់លោក លី សាមិ ប្រធានមន្ទីរអប់រំ យុវជន និងកីឡាខេត្ត, លោក លោកស្រី ប្រធាន-អនុប្រធានមន្ទីរ អង្គភាពជុំវិញខេត្ត កងកម្លាំងទាំងបីប្រភេទ អាជ្ញាធរក្រុង-ស្រុក លោកគ្រូ អ្នកគ្រូ យុវជនសហភាពសហព័ន្ធយុវជនកម្ពុជា សម្ពន្ឋយុវជនស្រឡាញ់សន្តិភាព អាជីវករ និងសិស្សានុសិស្សយ៉ាងច្រើនកុះករ។
ថ្លែងនៅក្នុងរបាយការណ៍បូកសរុប លោក លី សាមិ ប្រធានមន្ទីរអប់រំ យុវជន និងកីឡាខេត្ត បានឱ្យដឹងថា ការប្រកួតដែលបានប្រព្រឹត្តទៅរយៈពេល ០៨ថ្ងៃ ចាប់ពីថ្ងៃទី១២ ដល់ថ្ងៃទី១៩ ខែមីនា ឆ្នាំ២០២៦ នេះ មានប្រតិភូ និងកីឡាករ-កីឡាការិនីចូលរួមសរុបចំនួន ៨១៦នាក់ មកពីក្រុង-ស្រុកទាំង០៥ ក្នុងខេត្តមណ្ឌលគិរី (ក្រុងសែនមនោរម្យ, ស្រុកកែវសីមា, ស្រុកកោះញែក, ស្រុកអូររាំង, និងស្រុកពេជ្រាដា)។ ក្នុងនោះ កីឡាសិស្សបឋមសិក្សាមានចំនួន ៣៩០នាក់ (ស្រី ១៥៩នាក់) និងកីឡាសិស្សមធ្យមសិក្សាមានចំនួន ៤២៦នាក់ (ស្រី ២០៨នាក់) ។ វិញ្ញាសាដែលបានដាក់ឱ្យប្រកួតរួមមាន បាល់ទាត់ (បុរស-នារី), បាល់ទះ (បុរស-នារី), បាល់បោះ (បុរស-នារី), អត្តពលកម្ម (រត់ចម្ងាយសញ្ញា ៨០ម, ១០០ម, ៨០០ម, ៣០០០ម, លោតកម្ពស់, លោតចម្ងាយ, និងចោលដុំដែក)។
នៅក្នុងឱកាសនោះ លោក លន់ សុភាព អភិបាលរងខេត្តមណ្ឌលគិរី បានថ្លែងការកោតសរសើរ និងវាយតម្លៃខ្ពស់ចំពោះមន្ទីរអប់រំ យុវជន និងកីឡាខេត្ត គណៈកម្មការរៀបចំការប្រកួត អាជ្ញាធរគ្រប់លំដាប់ថ្នាក់ និងសប្បុរសជនទាំងអស់ ដែលបានសហការគ្នាជួយឧបត្ថម្ភគាំទ្រ ធ្វើឱ្យព្រឹត្តិការណ៍កីឡាដ៏មានសារៈសំខាន់នេះប្រព្រឹត្តទៅដោយជោគជ័យ។
លោកអភិបាលរងខេត្ត បានគូសបញ្ជាក់ថា ព្រឹត្តិការណ៍នេះ មិនត្រឹមតែជាការវាស់ស្ទង់សមត្ថភាពបច្ចេកទេសរបស់ក្មួយៗសិស្សានុសិស្សប៉ុណ្ណោះទេ ប៉ុន្តែថែមទាំងជាការបណ្ដុះស្មារតីស្រឡាញ់កីឡា ស្របតាមពាក្យស្លោក កីឡារស់ក្នុងសន្តិភាព និងការថែរក្សាសុខភាព កាយសម្បទាឱ្យមាំមួន ដើម្បីក្លាយជាសសរទ្រូងដ៏រឹងមាំរបស់ប្រទេសជាតិ។
លោកក៏បានផ្ដាំផ្ញើដល់កីឡាករ-កីឡាការិនីដែលទទួលបានជ័យលាភី ត្រូវខិតខំហ្វឹកហាត់បន្ថែមទៀត ដើម្បីតំណាងខេត្តទៅចូលរួមការប្រកួតថ្នាក់ជាតិ ឯក្មួយៗដែលមិនទាន់ទទួលបានជ័យលាភី កុំអស់សង្ឃឹម ត្រូវបន្តខិតខំប្រឹងប្រែងនៅឆ្នាំក្រោយៗទៀត ។ ពិធីបិទការប្រកួតបានបញ្ចប់ទៅក្រោមបរិយាកាសរីករាយ ជាមួយនឹងការប្រគល់មេដាយ ពានរង្វាន់ និងលិខិតសរសើរជូនដល់ក្រុម និងបុគ្គលជ័យលាភីតាមវិញ្ញាសានីមួយៗ៕
ចែករំលែកព័តមាននេះ