ចក្រភពអង់គ្លេស ៖ កំពូលអ្នកគាំទ្របាល់ទាត់ជនជាតិអង់គ្លេសម្នាក់ បាននឹងកំពុងធ្វើឱ្យពិភពលោកចាប់អារម្មណ៍យ៉ាងខ្លាំង បន្ទាប់ពីបុរសវ័យ៦២ឆ្នាំរូបនេះ បានសម្រេចចិត្តដាក់លក់ផ្ទះនៅក្នុងតម្លៃ៣៥ម៉ឺនផោន ឬជាង ៤៦៤ ០០០ ដុល្លារអាមេរិក…
ចក្រភពអង់គ្លេស ៖ កំពូលអ្នកគាំទ្របាល់ទាត់ជនជាតិអង់គ្លេសម្នាក់ បាននឹងកំពុងធ្វើឱ្យពិភពលោកចាប់អារម្មណ៍យ៉ាងខ្លាំង បន្ទាប់ពីបុរសវ័យ៦២ឆ្នាំរូបនេះ បានសម្រេចចិត្តដាក់លក់ផ្ទះនៅក្នុងតម្លៃ៣៥ម៉ឺនផោន ឬជាង ៤៦៤ ០០០ ដុល្លារអាមេរិក ដើម្បីយកលុយទៅទស្សនាការប្រកួតបាល់ទាត់ពិភពលោកឆ្នាំ ២០២៦ ទាំងអស់របស់ក្រុមតោកំណាចអង់គ្លេស។
លោក Andy Milne បានលេចធ្លោខ្លាំងក្នុងព្រឹត្តិការណ៍បាល់ទាត់ពិភពលោកឆ្នាំ ២០២២ បន្ទាប់ពីរូបថតរបស់លោកពាក់អាវក្រុមអង់គ្លេស និងពានរង្វាន់ World Cup ចម្លង ត្រូវបានចែកចាយពេញបណ្តាញទំនាក់ទំនងសង្គម។ ចាប់តាំងពីពេលនោះមក លោកបានក្លាយជាអ្នកគាំទ្រម្នាក់ ដែលគ្រប់គ្នាធ្លាប់ស្គាល់មុខ និងសុំថតរូបជាមួយនៅក្នុងការប្រកួតក្រុមជម្រើសជាតិអង់គ្លេសទាំងបុរស និងនារី។
អតីតគ្រូបង្រៀនរូបនេះ ឥឡូវនេះកំពុងរស់នៅក្នុងប្រទេសថៃ ហើយក៏កំពុងត្រៀមខ្លួនធ្វើដំណើរទៅព្រឹត្តិការណ៍ World Cup លើកទី ១០ របស់លោក។ លោក Milne បានទៅតាមគាំទ្រអង់គ្លេសលើកដំបូងក្នុងឆ្នាំ ១៩៨២ នៅអេស្ប៉ាញ នៅពេលដែលលោកមានអាយុត្រឹមតែ១៩ឆ្នាំប៉ុណ្ណោះ។ បើទោះបីជាត្រូវខាតបង់ទ្រព្យសម្បត្តិទាំងអស់ក្នុងដំណើរនោះក៏ដោយ ក៏លោកមិនដែលបោះបង់ការប្តេជ្ញាចិត្តចំពោះក្រុមជម្រើសជាតិឡើយ។ នៅក្នុងរយៈពេលជាង៤ទសវត្សរ៍មកនេះ លោក Milne បានចូលរួមព្រឹត្តិការណ៍ World Cup បុរសចំនួន ៨ លើក និង World Cup នារីឆ្នាំ ២០២៣ នៅពេលក្រុមនារីអង់គ្លេសបញ្ចប់ទៅក្នុងនាមក្រុមរងជើងឯក។
យ៉ាងណាមិញ ដើម្បីអាចចូលរួមព្រឹត្តិការណ៍ World Cup ឆ្នាំនេះ ដែលធ្វើឡើងនៅសហរដ្ឋអាមេរិក កាណាដា និងម៉ិកស៊ិក ចាប់ពីថ្ងៃទី១១ ខែមិថុនា ដល់ថ្ងៃទី១៩ ខែកក្កដា ឆ្នាំ២០២៦នោះ លោក Milne បានសម្រេចចិត្តលក់ផ្ទះនៅទីក្រុង Norwich របស់លោក តម្លៃ ៣៥ ម៉ឺនផោន។ អ្នកគាំទ្រដ៏មហាស្មោះស្ម័គ្ររូបនេះ បានថ្លែងថា «World Cup ចុងក្រោយនៅកាតា គឺជាអំណោយមួយសម្រាប់ខ្លួនខ្ញុំផ្ទាល់។ ខ្ញុំបានសន្សំលុយអស់ពេលជាច្រើនឆ្នាំ។ យើងមានផ្ទះទី២ ហើយខ្ញុំគិតថា ឥឡូវនេះជាពេលដ៏ល្អបំផុតដើម្បីលក់វា។ ខ្ញុំចង់មើលការប្រកួតទាំងមូល។ ខ្ញុំត្រូវទៅសហរដ្ឋអាមេរិក នៅថ្ងៃទី៣ ខែមិថុនា ហើយចំណាយពេល៧សប្តាហ៍នៅទីនោះ។ ដូច្នេះវានឹងចំណាយលុយអស់ច្រើន»។
លោក Milne នឹងមានវត្តមាននៅក្នុងការប្រកួតបើកឆាករបស់អង់គ្លេសទល់នឹងក្រូអាស៊ីនៅថ្ងៃទី១៧ ខែមិថុនា ហើយក៏មានគម្រោងធ្វើដំណើរឆ្លងកាត់ទីក្រុងជាច្រើនផងដែរ។ លោក Milne បច្ចុប្បន្នជាអ្នកគាំទ្រអាទិភាពរបស់ក្លិបអ្នកគាំទ្រអង់គ្លេសផ្លូវការ ដែលនេះនឹងផ្តល់ឱ្យគាត់នូវសិទ្ធិក្នុងការទិញសំបុត្រសម្រាប់ការប្រកួតវគ្គចែកពូលទាំងអស់ និងអាចមានសិទ្ធិចូលទិញសំបុត្រសម្រាប់វគ្គផ្តាច់ព្រ័ត្រផងដែរ។
ទោះជាយ៉ាងណាក៏ដោយ តម្លៃសំបុត្រនៅតែជាបញ្ហាប្រឈមដ៏ធំមួយ។ ជាក់ស្តែង តម្លៃសំបុត្រ World Cup 2026 កំពុងកើនឡើងយ៉ាងខ្លាំង ដោយសំបុត្រវគ្គចែកពូលតម្លៃចាប់ផ្តើមពី ១៤០ ដុល្លារឡើងទៅ និងសំបុត្រវគ្គផ្តាច់ព្រ័ត្រតម្លៃដល់ទៅជាង ៨ ៦០០ដុល្លារឯណោះ។ ដូច្នេះដើម្បីកាត់បន្ថយថ្លៃដើម លោក Milne មានគម្រោងស្នាក់នៅផ្ទះមិត្តភក្តិនៅក្នុងទីក្រុងផ្សេងៗ និងកក់សំបុត្រយន្តហោះមុន ដើម្បីជៀសវាងការប្រែប្រួលតម្លៃ៕ ប្រភព ៖ BBC, Daily Mail និង Znews
ចែករំលែកព័តមាននេះ