សហរដ្ឋអាមេរិក ៖ បន្ទាប់ពីការប្រកួតបើកឆាកស្មើជាមួយនឹងអេស្ប៉ាញ ដោយលទ្ធផល ០-០ កាលពីសប្តាហ៍មុនរួចមក កាប់វែរ (Cape Verde) បានបង្កើតភាពភ្ញាក់ផ្អើលជាថ្មីម្តងទៀត ដោយបន្តទប់ស្មើអ៊ុយរ៉ូហ្គាយដោយលទ្ធផល ២-២ ថែមទៀតក្នុងការប្រកួតជុំទី ២ ពូល H នៃព្រឹត្តិការណ៍ FIFA World Cup ឆ្នាំ២០២៦ ដែលបញ្ចប់ទៅព្រឹកថ្ងៃទី២២ ខែមិថុនា កន្លងទៅ (ម៉ោងនៅកម្ពុជា)។
បើទោះបីជាក្រុមចំណូលថ្មី ដែលទើបបង្ហញវត្តមានជាលើកដំបូងបង្អស់នៃព្រឹត្តិការណ៍ World Cup នោះ កាប់វែរបានបើកការនាំមុខមុននៅនាទី ២១ ដោយខ្សែបម្រើការពារ Kevin Pina ប៉ុន្តែអ៊ុយរ៉ូហ្គាយបានវាយបកនាំមុខវិញ ដោយខ្សែបម្រើស្លាប Maximiliano Araújo នៅនាទី ៤៤ និងខ្សែបម្រើប្រយុទ្ធ Agustín Canobbio នៅនាទី ៤៥+៦ មុនចប់វគ្គទី១។
នៅក្នុងវគ្គទី២ រឿងមិនគួរឱ្យជឿបានកើតឡើងម្តងទៀត ពោលនៅនាទី ៦១ ខ្សែការពារអ៊ុយរ៉ូហ្គាយ Mathías Olivera បានបង្កើតកំហុសធ្ងន់ធ្ងរ ដោយបញ្ជូនបាល់ខុសទិសដៅនៅមុខប្រអប់គ្រោះថ្នាក់។ ភ្លាមៗនោះ ខ្សែបម្រើស្លាប Helio Varela បានរត់យ៉ាងលឿនដេញយកបាល់ និងគេចផុតអ្នកចាំទី Fernando Muslera ហើយស៊ុតបញ្ចូលទីយ៉ាងស្អាត តាមស្មើ ២-២ ឱ្យកាប់វែរ កក្រើកកីឡដ្ឋាន Hard Rock នៃទឹកដីសហរដ្ឋអាមេរិក ហើយលទ្ធផលបានរក្សាដល់បញ្ចប់ការប្រកួតតែម្តង។
ក្រឡេកទៅការប្រកួត១គូទៀត អេស្ប៉ាញ ដែលខកចិត្តកាលពីប្រកួតបើកឆាក ធ្វើបានយ៉ាងល្អនៅប្រកួតទី២របស់ខ្លួន ដោយបំបាក់អារ៉ាប៊ីសាអូឌីតលទ្ធផល ៤-០។ ដូច្នេះឆ្លងកាត់ប្រកួត ២ ជុំកន្លងទៅ ពូល H នឹងត្រូវកាត់សេចក្តីថា ក្រុមណាឡើងទៅវគ្គ៣២ក្រុមចុងក្រោយ តាមរយៈប្រកួតជុំទី ៣។ អេស្ប៉ាញឈរកំពូលតារាងមាន៤ពិន្ទុ អ៊ុយរ៉ូហ្គាយឈរលេខ២មាន២ពិន្ទុ ស្មើជាមួយកាប់វែរដែលឈរលេខ៣ ចំណែក អារ៉ាប៊ីសាអូឌីតនៅបាតតារាងមានត្រឹម១ពិន្ទុ។ ប្រកួតចុងក្រោយ កាប់វែត្រូវប៉ះអារ៉ាប៊ីសាអូឌីត នៅម៉ោង ៧ ព្រឹកថ្ងៃទី២៧ ខែមិថុនា (ម៉ោងនៅកម្ពុជា) ស្របពេលដំណាលគ្នានោះ អ៊ុយរ៉ូហ្គាយត្រូវតទល់នឹងអេស្ប៉ាញ។
ការព្យាករណ៍កន្លងមករបស់អ្នកវិភាគមួយចំនួន ហាក់ខុសឆ្ងាយលើក្រុមកាប់វែរក្នុងពូល H ដោយបានគិតថា ក្រុមមកពីអាហ្វ្រិកខាងលិចមួយនេះ នឹងបញ្ចប់នៅបាតតារាង គ្មានឱកាសបន្តទៅកាន់វគ្គ ៣២ ក្រុមចុងក្រោយ។ ទោះយ៉ាងណាក៏ដោយ ក្រុមរបស់លោក Bubista បានបង្ហាញឱ្យគ្រប់គ្នាភ្លឺភ្នែកច្បាស់តែម្តង តាមរយៈការស្មើ ២ ប្រកួតដំបូងរបស់ពួកគេជាមួយក្រុមជើងឯក World Cup ទាំង ២ ៖ អេស្ប៉ាញ (២០១០) និងអ៊ុយរ៉ូហ្គាយ (១៩៣០ និង ១៩៥០) ក៏ដូចជាបេក្ខភាពដ៏ស្វិតស្វាញប្រជែងកៅអីវគ្គ៣២ក្រុមផងដែរ៕
ចែករំលែកព័តមាននេះ