សហរដ្ឋអាមេរិក ៖ Kevin De Bruyne និង Romelu Lukaku ដែលជាកីឡាករដ៏ឆ្នើមប្រចាំក្រុមជម្រើសជាតិបែលហ្ស៊ិក កំពុងតែក្លាយជាផ្ទាំងស៊ីបនៃការរិះគន់ បន្ទាប់ពីបង្ហាញទម្រង់លេងដ៏ខកចិត្តសម្រាប់ក្រុមរហស្សនាម «ក្រុមបិសាចក្រហម» នៅព្រឹត្តិការណ៍ World Cup ឆ្នាំ ២០២៦។
លទ្ធផលស្មើ ០-០ ជាមួយអ៊ីរ៉ង់ ការប្រកួតទី ២ ពូល G នៅវេលាទៀបភ្លឺព្រឹកថ្ងៃទី ២២ ខែមិថុនា (ម៉ោងនៅកម្ពុជា) បានធ្វើឱ្យបែលហ្ស៊ិកធ្លាក់ទៅក្នុងស្ថានភាពដ៏លំបាកមួយ។ ក្រុមរបស់លោកគ្រូបង្វឹក Rudi Garcia បានស្មើពីរប្រកួតជាប់ៗគ្នា (ស្មើអេហ្ស៊ីប ១-១ នៅប្រកួតបើកឆាក) នៅ World Cup ២០២៦ ចំពេលដែលកីឡាករឆ្នើមៗលេងមិនសូវបានល្អ។ យោងតាមទិន្នន័យពីគេហទំព័រ Opta Analyst បានបង្ហាញថា បែលហ្ស៊ិកបានស៊ុត ២៣ ជើងទល់នឹងអ៊ីរ៉ង់ ប៉ុន្តែមិនអាចរកគ្រាប់បាល់បានឡើយ។
នៅក្នុងពូល G អេហ្ស៊ីបឡើងឈរកំពូលតារាងមាន ៤ពិន្ទុ ក្រោយបញ្ចប់ប្រកួតទី២ ឈ្នះនូវែលសេឡង់ដោយលទ្ធផល ៣-១។ អ៊ីរ៉ង់ឈរលេខ ២ មាន ២ ពិន្ទុស្មើបែលហ្ស៊ិកឈរនៅលេខ ៣ រីឯនូវែលសេឡង់នៅបាតតារាងមាន១ពិន្ទុ។ ប្រកួតចុងក្រោយ អេហ្ស៊ីបត្រូវប៉ះអ៊ីរ៉ង់ នៅម៉ោង១០ព្រឹកថ្ងៃទី២៧ ខែមិថុនា (ម៉ោងនៅកម្ពុជា) ហើយនៅម៉ោងដំណាលគ្នានោះ នូវែលសេឡង់ត្រូវជួបបែលហ្ស៊ិក។
ងាកទៅបណ្តាញសង្គមឯណោះវិញ អ្នកគាំទ្របែលហ្ស៊ិកជាច្រើនបានសម្តែងការខកចិត្ត ខ្លាំងដោយយល់ថា កីឡាករជើងចាស់ដែលជាសសរគ្រឹះរបស់ក្រុម លែងមានឥទ្ធិពលដូចមុនទៀតហើយ។ ខ្សែបម្រើ De Bruyne រងការរិះគន់ថា លែងអាចបង្កើតឱកាសថ្មីៗនៅតំបន់បម្រើ ខណៈដែលខ្សែប្រយុទ្ធ Lukaku នៅតែបន្តធ្វើឱ្យអ្នកគាំទ្រខកចិត្តជាមួយភាពយឺតយ៉ាវ និងការបញ្ចប់ទីមិនល្អនៅមុខទី។ លើសពីនេះទៀត ពាក្យថា «Golden Generation» ឬ «ជំនាន់មាស» ថែមទាំងត្រូវបានគេនិយាយចំអកប្តូរទៅជា «Olden Generation» ឬ «ជំនាន់ចាស់ជរា» ដើម្បីពិពណ៌នាពីក្រុមកំពុងធ្លាក់ទម្រង់លេងពីទម្រង់លេងដល់កម្រិតកំពូលមួយរបស់ពួកគេបន្តិចម្តងៗ។
ការលើកឡើងខ្លះថា គ្មាននរណាម្នាក់បដិសេធនូវកេរ្តិ៍ដំណែលដែល De Bruyne និង Lukaku បានបន្សល់ទុកសម្រាប់បាល់ទាត់បែលហ្ស៊ិកនោះទេ។ អ្នកទាំងពីរនៅតែជានិមិត្តរូបដ៏សំខាន់ ហើយក៏ជាមុខមាត់ពិតប្រាកដនៃសម័យកាលដ៏ជោគជ័យបំផុតនៅក្នុងប្រវត្តិសាស្ត្ររបស់ក្រុមផងដែរ។ ទោះជាយ៉ាងណាក៏ដោយ បាល់ទាត់តែងតែជាហ្គេមមានការផ្លាស់ប្តូរជានិច្ច និងមិនអាចទាយទុកមុនបានឡើយ ហើយមួយវិញទៀត គ្មានកីឡាករណាម្នាក់អាចយកឈ្នះពេលវេលាបានឡើយ។
ប្រសិនបើបែលហ្ស៊ិកនៅតែបន្តធ្វើឱ្យខកចិត្តនៅការប្រកួតចុងក្រោយទល់នឹងនូវែលសេឡង់ នោះពួកគេប្រឈមនឹងការបញ្ចប់យុទ្ធនាការ World Cup ឆ្នាំ ២០២៦ ជាមួយការចងចាំដែលគួរឱ្យចង់ភ្លេចបំផុតមួយក្នុងប្រវត្តិសាស្ត្រ៕ ប្រភព ៖ Znews
ចែករំលែកព័តមាននេះ