អន្តរជាតិ ៖ ខ្សែប្រយុទ្ធឆ្នើម Lionel Messi បានបង្កើតកំណត់ត្រាពិភពលោក ក្លាយជាកីឡាកររកគ្រាប់បាល់បញ្ចូលទីច្រើនជាងគេនៅក្នុងប្រវត្តិសាស្ត្រ World Cup ក្រោយជួយក្រុមពពកសអាហ្សង់ទីនយកឈ្នះលើអូទ្រីសដោយលទ្ធផល ២-០ ការប្រកួតជុំទី២ ពូល J ព្រឹត្តិការណ៍ World Cup ឆ្នាំ២០២៦ កាលពីវេលារំលងអធ្រាត្រឈានចូលថ្ងៃទី២៣ ខែមិថុនា ឆ្នាំ២០២៦ (ម៉ោងនៅកម្ពុជា)។ ដ្បិត២គ្រាប់នេះ សម្រេចបានដោយប្រធានក្រុមវ័យ៣៨ឆ្នាំរូបនេះតែម្តង។
បន្ទាប់ពីក្លាយជាកីឡាករដំបូងគេបង្អស់ធ្វើបាន៣គ្រាប់ម្នាក់ឯងក្នុង១ប្រកួត (Hat-trick) ប្រចាំព្រឹត្តិការណ៍ World Cup ឆ្នាំ២០២៦ កាលពីជំនួបយកឈ្នះលើអាល់ហ្សេរី ៣-០ កាលពីសប្តាហ៍មុនហើយនោះ Lionel Messi ស្ទើរតែធ្វើបានដូចនេះជាថ្មីម្តងទៀតទៅហើយ នៅប្រកួតជុំទី២ ប៉ុន្តែមិនអាចសម្រេចបានគ្រាប់ដំបូងនៃការប្រកួតតាំងពីនាទី ៩ ដោយទាត់បាល់ពិន័យប៉េណាល់ទីមិនចំគោលដៅ។ ទោះយ៉ាងណាក៏ដោយ ខ្សែប្រយុទ្ធក្លិប Inter Miami រូបនេះ នៅតែអាចរកបាន២គ្រាប់ជួយអាហ្សង់ទីនក្នុងនាមក្រុមការពារតំណែងជើងឯកយកឈ្នះអូទ្រីស និងកក់កៅអីវគ្គ៣២ក្រុមចុងក្រោយដោយស្វ័យប្រវត្តិផងដែរ។
ការប្រកួតទើបតែចាប់ផ្តើមបាន២ប្រកួត Lionel Messi អាចរកបាន៥គ្រាប់តែម្នាក់ឯង កំពុងឈរជាកីឡាកររកគ្រាប់បាល់ច្រើនជាងគេនៅ World Cup ឆ្នាំ២០២៦ បណ្តោះអាសន្ន។ កាន់តែពិសេសលើសពីនេះទៀត ម្ចាស់ពានរង្វាន់ Ballon d’Or ច្រើនជាងគេ ៨ លើករូបនេះ ក៏ក្លាយជាកីឡាកររកគ្រាប់បាល់បញ្ចូលទីច្រើនជាងគេក្នុងប្រវត្តិសាស្ត្រព្រឹត្តិការណ៍ World Cup ផងដែរ ពោលចំនួន ១៨ គ្រាប់ ដោយបំបែកកំណត់ត្រា ១៦ គ្រាប់របស់លោក Miroslav Klose អតីតខ្សែប្រយុទ្ធឆ្នើមអាល្លឺម៉ង់។
ក្រោយឆ្លងកាត់ ២ ប្រកួតកន្លងមក បច្ចុប្បន្នខ្សែប្រយុទ្ធឆ្នើមពិភពលោកទាំង ៣ Lionel Messi (៥គ្រាប់), Kylian Mbappé (៤គ្រាប់) និង Erling Haaland(៤គ្រាប់) កំពុងតែប្រដេញគ្នា ដណ្តើមស្បែកជើងមាសព្រឹត្តិការណ៍ World Cup ឆ្នាំ២០២៦ យ៉ាងប្រកៀកប្រកិតបំផុត ក្រោយរួមចំណែកយ៉ាងសំខាន់រកបាន២គ្រាប់ដូចគ្នា ជួយក្រុមជម្រើសជាតិរៀងខ្លួនបន្តយកបាន៣ពិន្ទុបន្ថែមទៀត នៅក្នុងការប្រកួតជុំទី២ វគ្គចែកពូល និងបានកក់កៅអីវគ្គ៣២ក្រុមចុងក្រោយជាផ្លូវការ។
គិតត្រឹមថ្ងៃទី២៣ ខែមិថុនា ឆ្នាំ២០២៦ (ម៉ោងនៅកម្ពុជា) ព្រឹត្តិការណ៍ World Cup ឆ្នាំ ២០២៦ រកឃើញ ៦ ក្រុមហើយ បានកក់កៅវគ្គ៣២ក្រុមចុងក្រោយ រួមមាន ៖ ម្ចាស់ផ្ទះម៉ិកស៊ិក (ដំបូងគេបង្អស់), ម្ចាស់ផ្ទះសហរដ្ឋអាមេរិក, អាល្លឺម៉ង់, អាហ្សង់ទីន, បារាំង និង ន័រវែស។ ចំណែកឯហៃទី, តួកគីយ៉េ និង ទុយនីស៊ី អស់ឱកាសត្រូវការប្រកួតជុំទី២ ទោះនៅសល់១ប្រកួតទៀតយ៉ាងណាក៏ដោយ៕
ចែករំលែកព័តមាននេះ