សហរដ្ឋអាមេរិក ៖ យោងតាមកាសែត The Sun និង Daily Mail កាលពីថ្ងៃទី២២ ខែមិថុនា ឆ្នាំ២០២៦ បានរាយការណ៍ថា កីឡាករក្រុមជម្រើសជាតិគូរ៉ាសៅទាំងអស់ ដែលកំពុងបំពេញភារកិច្ចនៅព្រឹត្តិការណ៍ FIFA World Cup ឆ្នាំ២០២៦ ត្រូវបានអនុញ្ញាត និងលើកទឹកចិត្តឱ្យពួកគេស្នាក់នៅបន្ទប់រួមគ្នាជាមួយប្រពន្ធ ឬមិត្តស្រី និងអាចរួមភេទមុនពេលប្រកួតបាន ដើម្បីផ្តល់ការគាំទ្រផ្នែកផ្លូវចិត្ត។ នេះជាការសម្រេចចិត្តដ៏កម្របំផុតនៅក្នុងពិភពបាល់ទាត់កម្រិតកំពូល ដែលក្រុមជម្រើសជាតិភាគច្រើនតែងរក្សាវិន័យដ៏តឹងរ៉ឹង និងរឹតបន្តឹងមិនឱ្យកីឡាករនៅជិតមនុស្សជាទីស្រឡាញ់របស់ពួកគេ អំឡុងពេលប្រកួត។
យ៉ាងណាមិញ បើតាមលោកស្រី Suzanne Huurman គ្រូពេទ្យប្រចាំក្រុមជម្រើសជាតិគូរ៉ាសាវបានឱ្យដឹងថា កីឡាករត្រូវបានអនុញ្ញាតឱ្យស្នាក់នៅបន្ទប់ជាមួយប្រពន្ធ មិត្តស្រី និងក្រុមគ្រួសារពួកគេ អំឡុងប្រកួត World Cup នៅសហរដ្ឋអាមេរិក។
លោកស្រីបានបន្តថា លោកគ្រូបង្វឹក Dick Advocaat ចង់បង្កើតបរិយាកាសមានផាសុកភាពបំផុតសម្រាប់កីឡាករទាំងអស់ ព្រោះតែការអនុញ្ញាតឱ្យសមាជិកក្រុមរស់នៅជាមួយក្រុមគ្រួសារ ឬគូស្នេហ៍ពួកគេ អាចផ្តល់ផលវិជ្ជមានដល់សុខភាពផ្លូវចិត្ត ជួយកាត់បន្ថយការនឹករលឹកផ្ទះ មនុស្សជាទីស្រឡាញ់ និងភាពតានតឹង ពិសេសផ្តល់អារម្មណ៍ធូរស្រាលនៅក្នុងជំរុំហ្វឹកហាត់របស់ពួកគេ ស្ថិតនៅក្នុងរដ្ឋផ្លរីដា (Florida) ព្រមទាំងរក្សាបានលំនឹងអារម្មណ៍ អំឡុងយុទ្ធនាការប្រកួតដ៏វែងឆ្ងាយ។ ចំណែករឿងផ្លូវភេទវិញ លោកស្រីជឿថាវាពិតជារួមចំណែកជួយមែន ប៉ុន្តែប្រហែលជាជួយលើផ្នែកអារម្មណ៍ច្រើនជាងជួយទៅលើផលប៉ះពាល់រាងកាយដោយផ្ទាល់។
នៅពេលក្រុមបាល់ទាត់ភាគច្រើនបានដាក់បទបញ្ជាយ៉ាងម៉ឺងម៉ាត់ឱ្យស្នាក់នៅដាច់ដោយឡែកពីប្រពន្ធ និងមិត្តស្រីរបស់ពួកគេ អំឡុងពេលប្រកួត World Cup នោះ លោកស្រី Huurman បញ្ជាក់ថា ទាំងនោះជាស្ថានភាពខុសគ្នាស្រឡះពីក្រុមគូរ៉ាសៅ ព្រោះពួកគេមិនមានបទពិសោធន៍ ឬកញ្ចប់ថវិកាច្រើនដូចគេនោះទេ។ លោកស្រីថា «កីឡាកររបស់យើងភាគច្រើនមិនបានលេងក្នុងកម្រិតកំពូលបាល់ទាត់ពិភពលោកឡើយ។ សម្រាប់ក្រុមគ្រួសារជាច្រើន ការធ្វើដំណើរនិងការស្នាក់នៅរាប់សប្តាហ៍នៅសហរដ្ឋអាមេរិកដោយខ្លួនឯង គឺមានតម្លៃថ្លៃពេក។ ដូច្នេះសហព័ន្ធបានសម្រេចចិត្តរ៉ាប់រងការចំណាយនេះ ដើម្បីឱ្យកីឡាករអាចមានដៃគូ និងកូនៗរបស់ពួកគេនៅក្បែរខ្លួន។ បើមិនដូច្នោះទេ ពួកគេខ្លះប្រហែលជាត្រូវព្រួយបារម្ភ ឬស្ត្រេសខ្លាំងណាស់។
ឆ្លងកាត់ ២ ប្រកួតនៅក្នុងពូល E ព្រឹត្តិការណ៍ World Cup ឆ្នាំ២០២៦ គូរ៉ាសៅ ដែលជាការប្រកួត World Cup ជាលើកដំបូងបង្អស់របស់ខ្លួន បានចាញ់អាល្លឺម៉ង់ប្រកួតបើកឆាកដោយលទ្ធផល ៧-១ ប៉ុន្តែធ្វើបានយ៉ាងល្អទប់ស្មើ ០-០ ជាមួយអេក្វាឌ័រ។ បច្ចុប្បន្នពួកគេឈរនៅបាតតារាងស្មើ១ពិន្ទុជាមួយអេក្វាឌ័រនៅលេខ ៣ ចំណែកអាល្លឺម៉ង់បានកក់កៅអីវគ្គ៣២ក្រុមចុងក្រោយជាផ្លូវការ ខណៈដែលកូដឌីវ័រឈរនៅលេខ២ មាន៣ពិន្ទុ។ ប្រកួតបន្ទាប់ (បញ្ចប់វគ្គចែកពូល) ៖ គូរ៉ាសៅ ត្រូវប៉ះ កូដឌីវ័រ នៅម៉ោង ៣ ទៀបភ្លឺចូលថ្ងៃទី២៦ ខែមិថុនា (ម៉ោងនៅកម្ពុជា) ហើយដំណាលគ្នានោះ អេក្វាឌ័រ ត្រូវប៉ះអាល្លឺម៉ង់៕
ចែករំលែកព័តមាននេះ