រាជធានីភ្នំពេញ ៖ ឯកឧត្តមបណ្ឌិតថោង ខុនទេសរដ្ឋមន្ត្រីទទួលបន្ទុកបេសកកម្មពិសេសត្រូវបានអង្គមហាសន្និបាតបោះឆ្នោតគាំទ្រធ្វើជាប្រធានគណៈកម្មាជាតិអូឡាំពិកកម្ពុជា(NOCC)អាណត្តិទី៩ដែលមានសុពលភាពរហូតដល់ឆ្នាំ២០៣០។
អង្គមហាសន្និបាតបញ្ចប់អាណត្តិទី៨និងបន្តអាណត្តិទី៩(២០២៦-២០៣០)បានធ្វើឡើងនៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីរសៀលពីថ្ងៃទី១៩ ខែមីនា ឆ្នាំ២០២៦ ក្រោមអធិបតីភាពឯកឧត្តមបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា។
ក្នុងឱកាសនោះឯកឧត្តមបណ្ឌិតសភាចារ្យហង់ជួន ណារ៉ុន បានកោតសរសើរនិងវាយតម្លៃខ្ពស់ចំពោះស្នាដៃ និងសមិទ្ធផលធំៗដែលគណៈកម្មាជាតិអូឡាំពិកកម្ពុជាសម្រេចបានក្នុងអាណត្តិ
ទី៨កន្លងមក ក្រោមការដឹកនាំរបស់ឯកឧត្តមបណ្ឌិតទេសរដ្ឋមន្ត្រីថោង ខុន ចំពោះកិច្ចខិតខំប្រឹងប្រែងបំពេញការងាររបស់គ្រួសារចលនាអូឡាំពិកកម្ពុជា ដោយបានសហការយ៉ាងជិតស្និទ្ធជាមួយក្រសួងអប់រំ យុវជន និងកីឡានិងគ្រប់ភាគីពាក់ព័ន្ធ ធ្វើឱ្យកិត្យានុភាពកីឡាជាតិលេចធ្លោនៅលើឆាកអន្តរជាតិ។ ជាពិសេសមហាជោគជ័យដ៏អស្ចារ្យនៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេមឆ្នាំ២០២៣ក្រោយរង់ចាំអស់រយៈពេល៦៤ឆ្នាំក្នុងសម័យកាលសម្ដេចតេជោហ៊ុន សែន។
ឯកឧត្តមបណ្ឌិតទេសរដ្ឋមន្ត្រីថោង ខុនប្រធានគណៈកម្មាធិការជាតិអូឡាំពិកកម្ពុជាបានចាត់ទុកអាណត្តិទី៨របស់NOCCគឺជាអាណត្តិពិសេសសម្រាប់ចលនាអូឡាំពិកកម្ពុជា និងគ្រួសារកីឡាជាតិ ដែលសម្រចបាននូវសមិទ្ធផលសំខាន់ៗជាច្រើន ជាពិសេសភាពជោគជ័យនៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេមឆ្នាំ២០២៣។
ឯកឧត្តមបានបន្តទៀតថា ក្រោមការដឹកនាំនិងគាំទ្ររបស់រាជរដ្ឋាភិបាលកម្ពុជា ក្រោយពីទីស្ដីការគណៈរដ្ឋមន្ត្រីបានសម្រេចលើប្លង់រចនាកីឡដ្ឋានរួចហើយNOCCបានរៀបចំបង្កើតគណៈកម្មការត្រួតពិនិត្យបច្ចេកទេសសាងសង់ ដោយមានការចូលរួមពីគ្រប់ស្ថាប័នពាក់ព័ន្ធ ដែលមានលេខាធិការដ្ឋានមួយសម្រាប់តាមដាននិងសម្របសម្រួលការងារសាងសង់ឱ្យទទួលបានជោគជ័យតាមផែនការកំណត់ ទោះបីជួបការលំបាកនិងស្ថិតក្នុងសភាពការណ៍រីករាលដាលជំងឺកូវីដ-១៩ក៏ដោយ។
ឯកឧត្តមវ៉ាត់ ចំរើន ដែលត្រូវបានអង្គមហាសន្និបាតគាំទ្រឱ្យធ្វើជាអគ្គលេខាធិការគណៈកម្មាធិការជាតិកម្ពុជាអាណត្តិទី៩ជាបន្តទៀត បានរំលឹកពីជោគជ័យរបស់គណៈកម្មាធិការជាតិអូឡាំពិកកម្ពុជា ជាពិសេសមរតកកីឡាស៊ីហ្គេមឆ្នាំ២០២៣ និងសមិទ្ធផលជាច្រើនទៀតក្នុងអាណត្តិទី៨កន្លងទៅ ។ ឯកឧត្តមបានបន្តថា នៅពីក្រោយភាពជោគជ័យនេះគឺមានការកសាងមូលដ្ឋានគ្រឹះបច្ចេកទេសកីឡា ដែលធ្វើឱ្យសហព័ន្ធកីឡាជាតិមានភាពរឹងមាំ និងមានម្ចាស់ការលើខ្លួនឯងក្នុងការរៀបចំព្រឹត្តិកាណ៍នានា ។
ការអភិវឌ្ឍកីឡាករ កីឡាការិនីជាចំណុចពិសេសហើយCAMSOCបានផ្ដល់ថវិកាទៅប្រកួតនិងហ្វឹកហាត់នៅក្រៅប្រទេសដើម្បីវាស់ស្ទង់សមត្ថភាពដើម្បីត្រៀមព្រឹត្តិការណ៍កីឡាស៊ីហ្គេមឆ្នាំ២០២៣។ជាមួយនឹងការខិតខំប្រឹងប្រែងបានផ្ដល់នូវផ្លែផ្កាយ៉ាងត្រចះត្រចង់ដល់កម្ពុជាដោយទទួលបានមេដាយមាស៨១គ្រឿង មេដាយប្រាក់៧៤គ្រឿងនិងមេដាយសំរឹទ្ធ១២៧គ្រឿង ឈរនៅចំណាត់ថ្នាក់លេខ៤ ដែលជាសមិទ្ធផលលើសពីការរំពឹងទុក ៕
ចែករំលែកព័តមាននេះ