រាជធានី​ភ្នំពេញ ៖ ការ​ប្រកួត​ទី ២ វគ្គ​ចែក​ពូ​ល ពានរង្វាន់ AFC Champions League Two (ACL2) រដូវ​កាល ២០២៦/២៧ បាន​បញ្ចប់​កាលពី​ថ្ងៃ​ទី​១៥ ខែតុលា ទាំង​តំបន់​អាស៊ី​ខាងលិច និង​ខាងកើត​។

ក្រុម​តំណាង​កម្ពុជា​ទាំង ២ ដែល​នៅ​ក្នុង​តំបន់​អាស៊ី​ខាងកើត ភ្នំពេញ​ក្រោ​ន បន្ត​រកបាន ៣ ពិន្ទុ​បន្ថែម​ទៀត កាន់កាប់​កំពូល​តារាង ពូ​ល H បណ្តោះអាសន្ន ខណៈ​ដែល​ព្រះ​ខ័ន​រាជ​ស្វាយ​រៀង រកបាន ១ ពិន្ទុ​ដំបូង និង​ឈរ​នៅ​ចំណាត់ថ្នាក់​លេខ ៣ ក្នុង​ពូ​ល G ។

បន្ទាប់​ពី​យកឈ្នះ​ក្រុម​ភ្ញៀវ Kuching City មក​ពី​ម៉ា​ឡេ​ស៊ី ដោយ​លទ្ធផល ២-១ កាលពី​ថ្ងៃ​ទី​១៧ ខែកញ្ញា​រួច​មក ភ្នំពេញ​ក្រោ​ន បន្ត​ទៅ​យក​បាន ៣ ពិន្ទុ​ថែម​ទៀត នៅ​ក្រៅ​ដី​ពី​ម្ចាស់ផ្ទះ Gangwon នៅ​កូរ៉េ​ខាងត្បូង ជាមួយ​ជ័យជម្នះ ១-២ កាលពី​ថ្ងៃ​ទី​១៥ ខែតុលា កន្លង​ទៅ​។ ចំណែកឯ​ព្រះ​ខ័ន​រាជ​ស្វាយ​រៀង រកបាន​ពិន្ទុ​ជា​លើក​ដំបូង ក្រោយ​ស្មើដោយ​គ្មាន​គ្រាប់​បាល់​ស៊ុត​បញ្ចូល​ទី​គ្នា ទល់​នឹង​ក្រុម​ភ្ញៀវ Shanghai Shenhua មក​ពី​ចិន​។ ដ្បិត​ក្រុម​ជើងឯក​លី​គ​កំពូល​កម្ពុ​ជាមួយ​នេះ បាន​ចាញ់​ម្ចាស់ផ្ទះ Machida Zelvia ដែល​ជា​ក្រុម​ខ្លាំង​ជប៉ុន ដោយ​លទ្ធផល ២-០ កាលពី​ប្រកួត​បើក​ឆាក​។

ប្រកួត​បន្ទាប់ ព្រះ​ខ័ន​រាជ​ស្វាយ​រៀង នឹង​ត្រូវធ្វើ​ដំណើរ​ទៅ​ប្រទេស​សិង្ហ​បុរី តទល់​ជាមួយ Tampines Rovers នៅ​ថ្ងៃ​ទី​២៩ ខែតុលា ម៉ោង ៥ នាទី​រសៀល (​ម៉ោង​នៅ​កម្ពុជា​)​។ នៅ​ថ្ងៃ​ជាមួយ​គ្នា​នោះ ភ្នំពេញ​ក្រោ​ន ក៏​នឹង​ត្រូវ​បើកទ្វារ​ពហុ​កីឡដ្ឋាន​ជាតិ​មរតក​តេ​ជោ ស្វាគមន៍​ក្រុម​មក​ពី​ហុងកុង Kitchee នៅ​ម៉ោង ៧:១៥ នាទី​យប់​៕ រូបភាព ៖ Phnom Penh Crown FC និង Preah Khan Reach Svay Rieng FC