ខេត្តកំពង់ឆ្នាំង ត្រៀមរៀបចំពិធីរត់ភ្លើងគប់ លើចម្ងាយផ្លូវ ៨គីឡូម៉ែត្រ
- កំពង់ឆ្នាំង
ខេត្តកំពង់ឆ្នាំង ៖ ដើម្បីធានាឱ្យដំណើរការនៃការរៀបចំកម្មវិធីប្រព្រឹត្តទៅដោយរលូន គ្មានការកកស្ទះ និងមានសុវត្ថិភាពខ្ពស់ នៅរសៀលថ្ងៃទី២៨ ខែតុលា ឆ្នាំ២០២៦ នេះ លោក ម៉ៅ តារ៉ា នាយករដ្ឋបាលសាលាខេត្តកំពង់ឆ្នាំង បានដឹកនាំក្រុមការងារបច្ចេកទេស និងអាជ្ញាធរពាក់ព័ន្ធ ចុះពិនិត្យទីតាំងជាក់ស្តែង ដើម្បីត្រៀមរៀបចំពិធីរត់ភ្លើងគប់ សម្រាប់ព្រឹត្តិការណ៍ «ការប្រកួតកីឡាជាតិ លើកទី៥ និងកីឡាជាតិជនពិការ លើកទី៣» ក្នុងភូមិសាស្ត្រខេត្តកំពង់ឆ្នាំង។
យោងតាមការបញ្ជាក់ពីក្រុមការងារ ពិធីរត់ភ្លើងគប់ជាប្រវត្តិសាស្ត្រនេះ នឹងត្រូវប្រារព្ធធ្វើឡើងនៅ ថ្ងៃទី៣១ ខែតុលា ឆ្នាំ២០២៦ ខាងមុខ ដោយចាប់ផ្តើមចេញដំណើរពីចំណុច រង្វង់មូលឆ្នាំង (ស្រុករលាប្អៀរ) រហូតដល់ វិមានឯករាជ្យ (ក្រុងកំពង់ឆ្នាំង) ដែលមានចម្ងាយផ្លូវសរុបប្រមាណ ៨ គីឡូម៉ែត្រ។
ក្នុងឱកាសចុះពិនិត្យនោះ លោក ម៉ៅ តារ៉ា បានធ្វើការណែនាំ និងជម្រុញដល់ក្រុមការងារជំនាញ ឱ្យយកចិត្តទុកដាក់ខ្ពស់លើការងារបច្ចេកទេស ការរៀបចំសណ្តាប់ធ្នាប់សាធារណៈ ការសម្រួលចរាចរណ៍ ព្រមទាំងការការពារសន្តិសុខ សុវត្ថិភាព ជូនគណៈអធិបតី កីឡាករ-កីឡាការិនី និងបងប្អូនប្រជាពលរដ្ឋដែលនឹងចូលរួមទស្សនា កម្សាន្ត និងអបអរសាទរតាមដងផ្លូវឱ្យបានល្អប្រសើរ ដើម្បើធ្វើយ៉ាងណាឱ្យព្រឹត្តិការណ៍រត់ភ្លើងគប់នេះ ដំណើរការទៅដោយជោគជ័យ និងបង្កើតបាននូវបរិយាកាសគគ្រឹកគគ្រេងទូទាំងខេត្ត៕
ចែករំលែកព័តមាននេះ