ADផ្ទាំងផ្សព្វផ្សាយពាណិជ្ជកម្ម

Picture

ប្រតិភូ​កីឡាហែលទឹក​ពាក់​ជើង​ទា​កម្ពុជា​ទទួល​បានការ​ស្វាគមន៍​​យ៉ាង​កក់​ក្តៅ ក្រោយ​ដណ្តើម​​មេដាយ​សរុប ៤៦​គ្រឿង​ជូន​ជាតិ

2 អាទិត្យ មុន
  • ភ្នំពេញ

រាជធានីភ្នំពេញ ៖ ប្រតិភូ​កីឡាហែលទឹក​ពាក់​ជើង​ទា​កម្ពុជា​ បាន​ធ្វើ​ដំណើរ​មក​ដល់​មាតុប្រទេស​វិញ កាលពី​យប់​ថ្ងៃ​ទី​១ ខែវិច្ឆិកា ឆ្នាំ​២០២៦ នៅ​អាកាសយានដ្ឋាន​អន្តរជាតិ​តេ​ជោ បន្ទាប់​ពី​ដណ្តើម​បាន​មេដាយ​សរុប ៤៦​គ្រឿង (​មាស​១១ ប្រាក់​១៦ និង​សំរឹទ្ធិ ១៩ ប្រកបដោយ​មោទកភាព​ជាតិ នៅ​ក្នុង​ការ​ប្រកួត​កីឡាហែលទឹក​ពាក់​ជើង​ទា​ជើងឯក​អាស៊ាន លើក​ទី​៣ និង​ការ​ប្រកួត​កីឡាហែលទឹក​ពាក់​ជើង​ទា​កម្រិត​អាយុ​ជើងឯក​អាស៊ាន លើក​ទី​១ នៅ​ប្រទេស​ម៉ា​ឡេ​ស៊ី​។

ដំណើរ​និវត្តន៍​របស់​ប្រតិភូ​កីឡាហែលទឹក​ពាក់​ជើង​ទា​ទទួល​បានការ​ទទួល​ស្វាគមន៍​យ៉ាង​កក់ក្តៅ និង​ស្នាមញញឹម​ពី​ឯកឧត្តម កែ ប៊ុ​ន​ខៀង រដ្ឋលេខាធិការ​ក្រសួង​អប់រំ យុវជន និង​កីឡា ឯកឧត្តម ប៉ុន សុខ អគ្គនាយក​នៃ​អគ្គនាយកដ្ឋាន​កីឡា លោក យាន​គី ស៊ី​វត្ថា ប្រធាន​មជ្ឈមណ្ឌល​ជាតិ​ហ្វឹកហ្វឺន​កីឡា ឯកឧត្តម ហឿ​ន សំនៀង អនុប្រធាន​សហព័ន្ធ​កីឡា​ក្នុង​ទឹក​កម្ពុជា​។

ឯកឧត្តម ហឿ​ន សំនៀង បាន​គូសបញ្ជាក់​ថា នៅ​ក្នុង​ការ​ប្រកួត​នេះ ប្រភេទ​កីឡាហែលទឹក​ពាក់​ជើង​ទា​កម្ពុជា​ ទទួល​បាន​លទ្ធផល​យ៉ាង​ល្អ​ប្រសើរ​គួរ​ជាទី​គាប់ចិត្ត​ប្រកបដោយ​មោទនភាព​ក្រៃ​លែង​។ ឯកឧត្តម​ឧបនាយករដ្ឋមន្ត្រី ស៊ុន ចាន់​ថុ​ល ប្រធាន​សហព័ន្ធ​កីឡា​ក្នុង​ទឹក​កម្ពុជា​ បាន​ផ្តាំផ្ញើ​ការ​កោតសរសើរ​ដល់​កីឡាករ កីឡាការិនី​កម្ពុជា ដែល​បាន​នាំ​យក​លទ្ធផល​ល្អ​ដ៏​ត្រចះត្រចង់​ជូន​ប្រទេស​ជាតិ​។ នៅ​ក្នុង​ការ​ប្រកួត​ជើងឯក​អាស៊ាន​នេះ គឺ​អត្ត​ព​លិ​ក​កម្ពុជា​មាន​តែ​១៧​នាក់ និង​គ្រូបង្វឹក​៣​នាក់ ក្រោម​ការ​ដឹកនាំ​លើកទឹកចិត្ត​ផ្ទាល់​ពី​លោក ហែម គី​រី អគ្គលេខាធិការ សហព័ន្ធ​កីឡា​ក្នុង​ទឹក​កម្ពុជា​ទទួល​ប​ន្ទូ​ក​ប្រធាន​ប្រតិភូ​កីឡាហែលទឹក​ពាក់​ជើង​ទា​កម្ពុជា​ធ្វើ​ឱ្យ​កម្ពុជា​ឈ្នះ​មេដាយ​រហូត​ដល់ ៤៦​គ្រឿង ដែល​ជា​លទ្ធផល​ដ៏​គាប់ប្រសើរ​មិន​ធ្លាប់​មាន​របស់​សហព័ន្ធ​កីឡា​ក្នុង​ទឹក​កម្ពុជា​ក្រោម​ការ​ដឹកនាំ​របស់​ឯកឧត្តម​ប្រធាន​សហព័ន្ធ ស៊ុន ចាន់​ថុ​ល​។

ជាមួយ​គ្នា​នេះ លោក ហែម គី​រី លើក​ឡើង​ថា ក្នុង​ដំណើរ​និវត្តន៍​នេះ​ពិតជា​ទទួល​បាន​កិត្តិយស​ធំធេង​ណាស់ ដែល​ថ្នាក់ដឹកនាំ​ក្រសួង​អប់រំ យុវជន និង​កីឡា និង​ថ្នាក់ដឹកនាំ​សហព័ន្ធ​កីឡា​ក្នុង​ទឹក​កម្ពុជា​បាន​អញ្ជើញ​មក​ទទួល​ស្វាគមន៍​ដំណើរ​មក​ដល់ នៅ​អាកាសយានដ្ឋាន​ដោយ​ផ្ទាល់​។ ការ​ដណ្តើម​បាន​លទ្ធផល​ជា​មេដាយ​ដ៏​ច្រើន​នេះ ជា​ពិសេស​មេដាយមាស ១១​គ្រឿង គឺ​ដណ្តើម​បាន​ច្រើន​ជា​ការ​ប្រកួត​លើក​ទី​២ ដែល​បាន​ធ្វើ​ឡើង​នៅ​ប្រទេស​ឥណ្ឌូ​ណេ​ស៊ី ដែល​កម្ពុជា​ដណ្តើម​បាន​មេដាយមាស​១​គ្រឿង​។ លទ្ធផល​នេះ​បាន​បញ្ជាក់​ពី​ការ​ខិតខំ​ប្រឹងប្រែង​របស់​សហព័ន្ធ​កីឡា​ក្នុង​ទឹក​កម្ពុជា​សម្រាប់​អាណត្តិ​ថ្មី ហើយ​ក៏​ជា​កាដូ​មួយ​សម្រាប់​ថ្នាក់ដឹកនាំ ដោយ​សមិទ្ធផល​នេះ​លើស​ពី​ការ​រំពឹង​ទុក​។

បន្ថែម​ពីលើ​នេះ លោក ហែម គី​រី បាន​សង្កត់ធ្ងន់​ថា​៖ «​លទ្ធផល​នេះ​សបញ្ជាក់​ពី​ការ​ខិតខំ​ប្រឹងប្រែង​រួម​គ្នា​របស់​ថ្នាក់ដឹកនាំ​ថ្នាក់​នាំ​សហព័ន្ធ គ្រូបង្វឹក កីឡាករ កីឡាការិនី​ទាំងអស់​គ្នា​។ ប្រសិនបើ​មិន​មានការ​ខិតខំ​រួម​គ្នា​ទេ នោះ​នឹង​មិន​មាន​លទ្ធផល​បែប​នេះ​ឡើយ​។ ជា​ការ​កត់សម្គាល់ គឺ​កីឡាករ កីឡាការិនី​វ័យក្មេង​របស់​យើង​ដណ្តើម​បាន​លទ្ធផល​ល្អ នៅ​ក្នុង​ការ​ប្រកួតប្រជែង​ដ៏​លំបាក ពីព្រោះ​ថា គ្រាន់តែ​ប្រទេស​វៀតណាម និង​ឥណ្ឌូ​ណេ​ស៊ី ដែល​ដើរ​មុន​យើង ខណៈ​កម្ពុជា​ទើបតែ​ចាប់ផ្តើម​កសាង​កីឡាហែលទឹក​ពាក់​ជើង​ទា ក្នុង​ឆ្នាំ​២០២២ មក​ទេ​។ ជា​រួម សមិទ្ធផល​នេះ​កើតឡើង​ដោយសារ​តែ​ការ​រៀបចំ​ខ្លួន ការ​ប្រឹងប្រែង​ហ្វឹកហាត់​តាំងពី​ដើមឆ្នាំ​មក​ម្ល៉េះ ហើយ​យើង​នឹង​បន្ត​ការ​ខិតខំ​អភិវឌ្ឍន៍​វិញ្ញាសា​ផ្សេង​ៗ​ទៀត ក្នុង​ប្រភេទ​កីឡា​ក្នុង​ទឹក​ឱ្យ​កាន់តែ​រីក​ចម្រើន​បន្ថែម​ទៀត​៕​