ទីក្រុងប៉ារីស ៖ វីរបុរសកីឡាយូដូបារាំង លោក Teddy Riner ដែលជាកីឡាករយូដូឈ្នះមេដាយមាសព្រឹត្តិការណ៍អូឡាំពិកផ្នែកបុរសច្រើនជាងគេលើពិភពលោក ៥ គ្រឿង បានប្រកាសជាផ្លូវការថា នឹងចូលរួមប្រកួតប្រជែងក្នុងការបោះឆ្នោតជ្រើសរើសប្រធានាធិបតីបារាំង ដែលនឹងប្រព្រឹត្តទៅនៅឆ្នាំក្រោយ។ នេះបើតាមការចេញផ្សាយពីសារព័ត៌មាន ESPN កាលពីថ្ងៃទី៩ ខែវិច្ឆិកា។
ម្ចាស់មេដាយមាសកីឡាអូឡាំពិក ៥ គ្រឿង វ័យ៣៧ឆ្នាំ ដែលតែងតែជាប់ចំណាត់ថ្នាក់ក្នុងចំណោមបុគ្គលសាធារណៈដែលប្រជាជនបារាំងស្រឡាញ់ចូលចិត្តជាងគេរូបនេះ កាលពីថ្ងៃចន្ទបានប្រកាសពីបេក្ខភាពប្រជែងតំណែងប្រធានាធិបតីបារាំងរបស់ខ្លួន នៅលើបណ្តាញសង្គម។ Riner ដែលមានទស្សនៈសេដ្ឋកិច្ចសេរីនិយម បានថ្លែងនៅក្នុងបទសម្ភាសន៍ជាមួយកាសែតបារាំង Le Parisien ថា លោកកំពុងតែដាក់ខ្លួនជាអ្នកមិននៅខាងស្តាំនិយម និងខាងឆ្វេងនិយម ហើយសង្ឃឹមថា នឹងក្លាយជាប្រធានាធិបតីដែលនាំមនុស្សគ្រប់គ្នាឱ្យមករួបរួមគ្នា។
ការបោះឆ្នោតប្រធានាធិបតីបារាំង នឹងត្រូវរៀបចំឡើងនៅខែមេសា ឆ្នាំក្រោយ ហើយការឃោសនាបោះឆ្នោតកំពុងប្រព្រឹត្តទៅក្នុងបរិយាកាសសង្គមដ៏តានតឹង។ ក្រុមបាតុករជាច្រើនកុះករបានចេញមុខហែក្បួនតវ៉ាអស់ជាច្រើនសប្តាហ៍មកហើយ នៅក្នុងទីក្រុងប៉ារីស និងទីតាំងផ្សេងទៀតនៃប្រទេសបារាំង ដើម្បីទាមទារដំឡើងប្រាក់ឈ្នួល និងគាំទ្រចលនាតវ៉ារបស់និស្សិត ដែលនេះ កំពុងបង្កើនសម្ពាធបន្ថែមទៀតលើរដ្ឋាភិបាលដែលកំពុងជួបការលំបាក។
យ៉ាងណាមិញ Riner បានលើកឡើងថា លោកបានដឹងពីភាពតានតឹងក្នុងសង្គម ដែលកំពុងកើតមានទូទាំងប្រទេស ហើយលោកមិនអាចទទួលយកបានទេ ពេលឃើញយុវជនជំនាន់ក្រោយ និងមនុស្សជំនាន់មុន និយាយថា ពួកគេកំពុងជួបការលំបាកក្នុងការស្រមៃមើលពីអនាគតរបស់ពួកគេ។
កីឡាករ Riner ធ្លាប់និយាយកាលពីខែកញ្ញាថា លោកចង់បញ្ចប់អាជីពកីឡាដ៏អស្ចារ្យជាមួយមេដាយការឈ្នះមាសអូឡាំពិកឆ្នាំ ២០២៨ នៅទីក្រុងឡូសអាន់ជ័រលេស (Los Angeles) សហរដ្ឋអាមេរិក។ ប៉ុន្តែនៅពេលត្រូវបានកាសែត Le Parisien សួរថា តើការឈរឈ្មោះជាបេក្ខភាពប្រធានាធិបតីមានន័យថា លោកនឹងបោះបង់ការប្រកួតអូឡាំពិកឬទេ កីឡាករទម្ងន់ធ្ងន់ កម្ពស់ ២,០៤ ម៉ែត្ររូបនេះ ឆ្លើយថា មិនមែនទេ។
គួរបញ្ជាក់ថា Teddy Riner បានក្លាយជាកីឡាករយូដូអាជីពនៅឆ្នាំ ២០០៦ ដោយបានចូលរួមប្រកួតថ្នាក់ជាតិ និងកម្រិតពិភពលោកជាច្រើន ព្រមទាំងឈ្នះមេដាយច្រើនស្ទើរតែរាប់មិនអស់។ កីឡាកររូបនេះ បានចូលរួមប្រកួតកីឡាអូឡាំពិក ៥ ព្រឹត្តិការណ៍ផ្សេងគ្នា ដោយឈ្នះមេដាយមាស ៥ គ្រឿង និងសំរឹទ្ធ ២ គ្រឿងផងដែរ៕
ចែករំលែកព័តមាននេះ