ឯកឧត្តមបណ្ឌិតថោង ខុន ផ្ដល់អនុសាសន៍៦ចំណុចសម្រាប់ត្រៀមព្រឹត្តិការណ៍កីឡាស៊ីហ្គេម និងព្រឹត្តិការណ៍កីឡាក្នុងតំបន់ជាច្រើនទៀត
- ភ្នំពេញ
រាជធានីភ្នំពេញ ៖ ការប្រកួតព្រឹត្តិការណ៍កីឡាជាតិលើកទី៥ លើប្រភេទកីឡាកាយសម្ព័ន្ធ បានបិទបញ្ចប់ដោយជោគជ័យកាលពីរសៀលថ្ងៃទី១២ ខែវិច្ឆិកា ឆ្នាំ២០២៦ នៅក្នុងសាលដំបូលទូក ក្នុងពហុកីឡដ្ឋានជាតិ ។ ទន្ទឹមនឹងនានេះដែរ ឯកឧត្តមបណ្ឌិតថោង ខុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានសហព័ន្ធកីឡាកាយសម្ព័ន្ធកម្ពុជា បានផ្ដល់នូវអនុសាសន៍៦ចំណុចដើម្បីត្រៀមចូលរួមប្រកួតកីឡាស៊ីហ្គេមនៅប្រទេសម៉ាឡេស៊ី និងព្រឹត្តិការណ៍កីឡាយុវជនអាស៊ីឆ្នាំ២០៣១ ដែលកម្ពុជាធ្វើជាម្ចាស់ផ្ទះព្រមទាំងព្រឹត្តិការណ៍កីឡថ្នាក់តំបន់ជាច្រើនទៀត។
ឯកឧត្តមបណ្ឌិតថោង ខុន បានមានប្រសាសន៍លើកឡើងថា ក្នុងនាមឯកឧត្តមជាប្រធានសហព័ន្ធមានការកោតសរសើយ៉ាងខ្លាំងក្នុងការប្រកួតកីឡាជាតិលើកទី៥៥ នៃប្រភេទកីឡាកាយសម្ព័ន្ធដែលបានបញ្ចប់ទៅដោយរលូន និងទទួលបានលទ្ធផលល្អប្រសើរ ។ មិនតែប៉ុណ្ណោះនេះ គឺជាការវាស់ស្ទង់ សមត្ថភាព បច្ចេកទេស ទេពកោសល្យ កីឡាករ កីឡាការិនី ទាំងកម្រិតយុវជន វ័យក្មេងដែលខិតខំប្រឹងប្រែងហ្វឹកហាត់នាពេលកន្លងមក។
ម្យ៉ាងវិញទៀត ឯកឧត្តមបានសម្ដែងនូវការកោតសរសើរផងដែរចំពោះប្រតិភូ មន្ត្រីបច្ចេកទេស គ្រូបង្វឹកនិងអត្តពលិកទាំងអស់ដែលបានចូលរួមនៅក្នុងព្រឹត្តិការណ៍កីឡាជាតិលើកទី៥នេះដោយបានគោរពតាមការណែនាំរបស់គណៈកម្មការរៀបចំការប្រកួតកីឡាជាតិលើកទី៥ រួមមាន៖ក្រសួងអប់រំយុវជននិងកីឡា គណៈកម្មាធិការជាតិអូឡាំពិកកម្ពុជា ព្រមទាំងអនុវត្តតាមបទបញ្ជាបច្ចេកទេស ក្រមសីលធម៌កីឡា ស្មារតីទទួលខុសត្រូវ ខ្ពស់ គោលការណ៍Fair Playក្នុងការប្រកួតទើបធ្វើឱ្យការប្រកួតនេះបានប្រព្រឹត្តិដោយរលូនតាំងពីដើមដល់ចប់ស្របតាមបុព្វបទ”កីឡាដើម្បីឯកភាពជាតិ។
ទន្ទឹមជាមួយនឹងការសង្កេតឃើញកីឡាកាយសម្ព័ន្ធកម្ពុជា សាងបាននូវស្នាដៃជាប្រវត្តិសាស្ត្រ និងដណ្ដើមបានមេដាយនៅក្នុងការប្រកួតកីឡាស៊ីហ្គេមនិងកីឡាក្នុងតំបន់ជាច្រើនឯកឧត្តមបានផ្ដល់នូវអនុសាសន៍ចំនួន៦ចំណុច សម្រាប់ត្រៀមខ្លួនចូលរួមប្រកួតក្នុងព្រឹត្តិការណ៍កីឡាស៊ីហ្គេមឆ្នាំ២០២៧ នៅប្រទេសម៉ាឡេស៊ីនិងព្រឹត្តិការណ៍កីឡាយុវជនអាស៊ីឆ្នាំ២០៣១ដែលកម្ពុជាធ្វើជាម្ចាស់ផ្ទះរួមមាន ទី១-បណ្ដុះបណ្ដាលថ្នាក់ថ្នាលតាមកម្រិតអាយុ បង្កើនបរិមាណនិងគុណភាពកីឡាករ កីឡាការិនីតាមក្លឹប តាមសមាគមឱ្យបានទូលំទូលាយនិងជ្រើសរើសកីឡាករ កីឡាការិនីវ័យក្មេង។
ទី២-ពង្រឹងសមត្ថភាពចៅក្រម មន្ត្រីបច្ចេកទេស គ្រូបង្វឹកឱ្យកាន់តែល្អប្រសើរទាំងបរិមាណនិងគុណភាព ទី៣-ជំរុញឱ្យមានការរៀបចំការប្រកួតឱ្យបានច្រើន ការហ្វឹកហាតិជាប្រចាំនៅតាមក្លឹបនិងសមាគម ទី៤-ពង្រឹងរចនាសម្ព័ន្ធគ្រប់គ្រងសហព័ន្ធ ក្លឹប សមាគម ឱ្យបានរឹងមាំនិងស្វែងរកដៃគូអភិវឌ្ឍ និងការឧបត្ថម្ភគាំទ្របន្ថែមទៀត ទី៥-ជំរុញឱ្យមានការចូលរួមប្រកួតជាលក្ខណៈអន្តរជាតិឱ្យបានច្រើនមុនពេលព្រឹត្តិការណ៍កីឡាស៊ីហ្គេមលើទី៣៤ឆ្នាំ២០២៧នៅប្រទេសម៉ាឡេស៊ី និងទី៦-សហព័ន្ធត្រូវតែពន្យល់ និងបញ្ជ្រាបផ្នែកផ្លូវច្បាប់អន្តរជាតិក្នុវិស័យកីឡាមួយនេះ ដើម្បីឱ្យសមាគមនិងក្លឹប បានយលច្បាស់អំពីភារកិច្ច(Good Govermance)ការគ្រប់គ្រង ភារកិច្ច តួនាទី កាតព្វកិច្ចរបស់ខ្លួនចៀសវាងការមានកំហុសរដ្ឋបាលកីឡានិងបច្ចេកទេស។
ចំពោះលទ្ធផលចំណាត់ថ្នាក់ក្រសួងមហាផ្ទៃដណ្ដើមបានមេដាយ១០គ្រឿង (មាស៥ ប្រាក់៤ សំរឹទ្ធ១)ក្រសួងការពារជាតិដណ្ដើមបានមេដាយ១០គ្រឿង(មាស៤ ប្រាក់៣សំរឹទ្ធ៣)ខេត្តក្ររចេះដណ្ដើមបានមេដាយ៧គ្រឿង(មាស១ ប្រាក់២សំរឹទ្ធ៤)ខេត្តកំពង់ឆ្នាំដណ្ដើមបានមេដាយ៤គ្រឿង(មាស១ប្រាក់១សំរឹទ្ធ២)ខេត្តស្ទឹងត្រែងដណ្ដើមបានមេដា២គ្រឿង(ប្រាក១សំរឹទ្ធ១)៕




ចែករំលែកព័តមាននេះ