អបអរសាទរ ឯកឧត្ដម ខៀវ សាម៉េត បន្តជាប់ឆ្នោតជាប្រធានសហព័ន្ធកីឡាបាល់ទាត់អាស៊ានសម្រាប់អាណត្តិទី៣
- ភ្នំពេញ
រាជធានីភ្នំពេញ ៖ ឯកឧត្តម ឧត្តមសេនីយ៍ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា (FFC) ត្រូវបានសមាជិកមហាសន្និបាតសហព័ន្ធកីឡាបាល់ទាត់អាស៊ីអាគ្នេយ៍ (AFF) ជ្រើសរើសបន្តជាប្រធានសហព័ន្ធកីឡាបាល់ទាត់អាស៊ាន (AFF) សម្រាប់អាណត្តិទី៣ (ឆ្នាំ២០២៦-២០៣០)។
ការបោះឆ្នោត និងការផ្តល់ទំនុកចិត្តនេះ បានធ្វើឡើងនៅក្នុងមហាសន្និបាត AFF នៅថ្ងៃទី១៥ ខែវិច្ឆិកា ឆ្នាំ២០២៦ នៅទីក្រុងម៉ានីល ប្រទេសហ្វីលីពីន ដែលធ្វើឱ្យឯកឧត្តមកាន់តំណែងជាប្រធាន AFF បន្តបន្ទាប់ចាប់តាំងពីឆ្នាំ២០១៩ មក។
នៅក្នុងរចនាសម្ព័ន្ធដឹកនាំរបស់សហព័ន្ធកីឡាបាល់ទាត់អាស៊ីអាគ្នេយ៍ (AFF) សម្រាប់អាណត្តិថ្មី ២០២៦-២០៣០ ក្រៅពីតំណែងប្រធានរបស់ឯកឧត្តម ខៀវ សាម៉េត មហាសន្និបាតនៅទីក្រុងម៉ានីល បានរៀបចំការបោះឆ្នោតជ្រើសរើសសមាសភាពក្រុមប្រឹក្សាប្រតិបត្តិសំខាន់ៗផ្សេងទៀតចំនួន ១០ រូបបន្ថែម ដើម្បីដឹកនាំការងារបាល់ទាត់ក្នុងតំបន់។
យោងតាមលក្ខន្តិកៈរបស់សហព័ន្ធកីឡាបាល់ទាត់អាស៊ីអាគ្នេយ៍ (AFF) តំណែងថ្នាក់ដឹកនាំកំពូលដែលត្រូវបានជ្រើសតាំងរួមមាន៖
-អនុប្រធាន (Vice Presidents) ចំនួន៤រូបតំណាងឱ្យសមាគមបាល់ទាត់ជាតិជាសមាជិក ដើម្បីជួយសម្របសម្រួលការងារ និងជំនួសមុខប្រធានក្នុងករណីចាំបាច់។
-សមាជិកក្រុមប្រឹក្សា(Council Members) ចំនួន៥រូបជាតំណាងមកពីបណ្តាប្រទេសសមាជិកក្នុងតំបន់អាស៊ាន និងអូស្ត្រាលី ដែលមានតួនាទី អនុម័តគោលនយោបាយ និងផែនការអភិវឌ្ឍន៍បាល់ទាត់។
-សមាជិកក្រុមប្រឹក្សាស្ត្រី (Female Council Member)ចំនួន១រូប។ ជាកូតាពិសេសសម្រាប់តំណាងស្ត្រី ដើម្បីលើកកម្ពស់ និងជំរុញវិស័យបាល់ទាត់នារីនៅអាស៊ីអាគ្នេយ៍។
-អគ្គលេខាធិការ(General Secretary) ចំនួន១រូបទទួលបន្ទុកដឹកនាំការងាររដ្ឋបាល និងប្រតិបត្តិការប្រចាំថ្ងៃរបស់សហព័ន្ធដែលបច្ចុប្បន្នកាន់តំណែងដោយលោក Winston Lee ។
សូមជម្រាបផងដែរថា នេះគឺជាអាណត្តិទី៣ហើយ ដែលមន្ដ្រីជាន់ខ្ពស់នៃសហព័ន្ធកីឡាបាល់ទាត់កម្ពុជា ឯកឧត្តមខៀវ សាម៉េត ត្រូវបានសមាជិក AFF បោះឆ្នោតគាំទ្របន្ដធ្វើប្រធានសហព័ន្ធកីឡាបាល់ទាត់អាស៊ីអាគ្នេយ៍ ។
ឯកឧត្តមនឹងត្រូវដឹកនាំស្ថាប័នបាល់ទាត់ដ៏ធំប្រចាំតំបន់នេះ រហូតដល់ឆ្នាំ២០៣០ បន្ទាប់ពីលោកបានចូលកាន់តំណែងនេះដំបូង បន្ដពីលោក Sultan Ahmad Shah ជនជាតិម៉ាឡេស៊ី តាំងពីឆ្នាំ២០១៩។
ទន្ទឹមជាមួយមហាសន្និបាត AFF ខាងលើ គេក៏ឃើញមានវត្តមានប្រធានសហព័ន្ធកីឡាបាល់ទាត់អន្តរជាតិ (FIFA) លោក Gianni Infantino ផងដែរ ៕
ចែករំលែកព័តមាននេះ