ប្រទេសអ៊ីតាលី ៖ វីរបុរសបាល់ទាត់ប្រេស៊ីល លោក Ronaldinho នឹងត្រឡប់មកកាន់ការប្រកួតបាល់ទាត់អាជីពវិញជាលើកដំបូង នៅក្នុងវ័យ៤៦ឆ្នាំ ជាមួយក្រុម Ravenna នៅលីគលំដាប់ទី ៣ អ៊ីតាលី (Serie C) ក្នុងនាមជាកីឡាករផង និងម្ចាស់ភាគហ៊ុនភាគតិចរបស់ក្លិបផង។
ការប្រកួតផ្លូវការលើកដំបូងរបស់ខ្សែបម្រើប្រយុទ្ធស្លាបឆ្វេង បន្ទាប់ពីចូលនិវត្តន៍អស់រយៈពេល១១ឆ្នាំរូបនេះ នឹងធ្វើឡើងនៅថ្ងៃទី១៥ ខែវិច្ឆិកា ឆ្នាំ២០២៦ ទល់នឹងក្រុមភ្ញៀវ Forli នៅកីឡដ្ឋាន Comunale Bruno Benelli។
ម្ចាស់ពានរង្វាន់ Ballon d’Or និង World Cup ដែលបានបង្ហាញខ្លួនក្នុងនាមជាកីឡាករអាជីពចុងក្រោយឱ្យក្លិបប្រេស៊ីល Fluminense កាលពីឆ្នាំ ២០១៥ រូបនេះ បានចុះហត្ថលេខាជាមួយក្លិប Ravenna កាលពីខែមិថុនា ឆ្នាំ២០២៦ ដោយកាន់កាប់ភាគហ៊ុនមួយផ្នែកជាមួយប្រធានក្លិប លោក Ignazio Cipriani និងបានបង្ហាញខ្លួនចំពោះមុខអ្នកគាំទ្រ កាលពីខែសីហាកន្លងទៅ។
ការវិលត្រឡប់នេះទៀតសោត ដើម្បីជួយផ្សព្វផ្សាយក្លិបដែលមានមូលដ្ឋាននៅក្នុងតំបន់ Emilia-Romagna មួយនេះ លើឆាកអន្តរជាតិ ក៏ដូចជាផ្តល់ឱកាសឱ្យអតីតកីឡាករឆ្នើមរបស់ក្លិប PSG, Barcelona និង AC Milan រូបនេះ រកគ្រាប់បាល់អាជីពទី ៣០០ របស់លោក បន្ទាប់ពីបានចូលនិវត្តន៍ សម្រេចបានត្រឹម ២៩៩ គ្រាប់៕ ប្រភព ៖ Sky Sports
ចែករំលែកព័តមាននេះ