ជិត៣ពាន់នាក់ ចូលរួមរួមក្នុងព្រឹត្តិការណ៍រត់ប្រណាំង ក្រោមប្រធានបទលើកកម្ពស់ការយល់ដឹង និងទប់ស្កាត់«មហារី.កសុដ.ន់»
- ភ្នំពេញ
រាជធានីភ្នំពេញ ៖ ទិវារត់ប្រណាំងចម្ងាយ១០គីឡូម៉ែត្រ ក្រោមប្រធានបទលើកកម្ពស់ការយល់ដឹងនិងទប់ស្កាត់ជំងឺមហារីកសុដន់លើកទី៥ដែលបានធ្វើឡើងនៅវត្តបទុមវតីកាលពីព្រឹកថ្ងៃទី២៥ ខែតុលា មានអត្តពលិកចូលរួមប្រមាណ២៩៤០នាក់ ។ នេះបើតាមការឱ្យដឹងពីឯកឧត្តមបណ្ឌិតថោង ខុន ប្រធានគណៈកម្មាធិការជាតិអូឡាំពិកកម្ពុជា។
ឯកឧត្តមបណ្ឌិតថោង ខុន បានមានប្រសាសន៍ឱ្យដឹងទៀតថា ក្នុងចំណោមអ្នករត់ចំនួន២៩៤០នាក់នេះ មានអត្តពលិកកម្ពុជា២៥៣៥នាក់ និងភ្ញៀវបរទេសចំនួន៤០៥នាក់មកពី៣៦ប្រទេស ក្នុងនោះប្រទេសដែលចូលរួមច្រើនជាងគេមានហ្វីលីពីន សហរដ្ឋអាមេរិក ចក្រភពអង់គ្លេស ជប៉ុននិងអូស្ត្រាលី ។ ជាមួយគ្នានេះ ឯកឧត្តមសូមថ្លែងអំណរគុណដល់សាលារាជធានីភ្នំពេញ និងអាជ្ញាធរពាក់ព័ន្ធ ដែលបានសហការ ជួយរក្សាសន្តិសុខ ការសង្គ្រោះ និងសុវត្ថិភាពចរាចរណ៍ក្នុងព្រឹត្តិការណ៍រត់ប្រណាំងនេះ។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានឱ្យដឹងថា ទោះបីឆ្នាំមានអ្នកចុះឈ្មោះចូលរួមរត់មានចំនួនតិចជាងឆ្នាំមុនបន្តិចមែន ប៉ុន្តែសម្រាប់ការរៀបចំទាំងចរាចរណ៍ សណ្ដាប់ធ្នាប់នៅតាមផ្លូវរត់គឺធ្វើបានល្អជាងឆ្នាំមុន ។ ទន្ទឹមគ្នានេះដែរឯកឧត្តមបានអំពាវនាវទៅដល់ប្រជាពលរដ្ឋនាំគ្នាចុះឈ្មោះចូលរួមរត់ឱ្យបានច្រើនដើម្បីលើក
កម្ពស់សុខុមាលភាព ការរស់នៅប្រចាំថ្ងៃឱ្យកាន់តែល្អ។ សម្រាប់ឆ្នាំក្រោយ ឯកឧត្តមដាក់ការរំពឹងទុកថានឹងមានអ្នកចុះឈ្មោះរត់ដល់៥ពាន់នាក់។ ចំពោះយុទ្ធនាការនៃការរៀបចំនឹងអាចធ្វើឡើងមុនរយៈពេលកន្លះឆ្នាំមុន និងធ្វើឱ្យកាន់តែល្អជាងនេះ ៕
ចែករំលែកព័តមាននេះ