សហរដ្ឋអាមេរិក ៖ ខ្សែប្រយុទ្ធវ័យក្មេងកូនកាត់ខ្មែរ-អាមេរិក Carson Starrett ត្រូវបានកោះហៅចូលក្រុមបាល់ទាត់ជម្រើសជាតិសហរដ្ឋអាមេរិកអាយុក្រោម១៦ឆ្នាំ (U16) សម្រាប់ជំរុំហ្វឹកហាត់ខែតុលានេះ នៅទីក្រុង Chula Vista រដ្ឋ California ចាប់ផ្តើមពីថ្ងៃទី២២ ដល់ថ្ងៃទី២៩។ នេះបើតាមការប្រកាសពីសាលាក្លិប Orlando City (Orlando City SC Academy) កាលពីថ្ងៃទី២២ ខែតុលា។
ស្ថិតនៅក្រោមការដឹកនាំរបស់គ្រូបង្វឹក Ross Brady នឹងធ្វើការវាយតម្លៃ ព្រមទាំងពង្រឹងសមត្ថភាពក្រុមយុវជនកើតនៅក្នុងឆ្នាំ ២០១១។ ដ្បិត Carson Starrett ត្រូវបានដាក់បញ្ចូលក្នុងចំណោមខ្សែប្រយុទ្ធឆ្នើមទាំង ៦ រូបនៃបញ្ជីឈ្មោះផ្លូវការ។
យុវជន Carson Starrett កំពុងតែលេងឱ្យសាលាបាល់ទាត់ក្លិប Orlando City និងបានកំពុងបង្ហាញទម្រង់លេងដ៏លេចធ្លោ ហើយក៏ធ្លាប់រកគ្រាប់បាល់បានទាំងក្នុងការបង្ហាញខ្លួនដំបូងជាមួយក្រុមឈុត U-18 កាលពីពេលថ្មីៗនេះ ក៏ដូចជាធ្លាប់ត្រូវបានកោះហៅឱ្យទៅហ្វឹកហាត់ជាមួយក្រុមឈុតធំ Orlando City ផងដែរ។
យុវជនវ័យ ១៥ ឆ្នាំ កើតក្នុងឆ្នាំ ២០១១ កម្ពស់ ១,៨៥ ម៉ែត្រ ដែលមានឪពុកជាជនជាតិអាមេរិកាំង និងម្តាយជាជនជាតិខ្មែររូបនេះ គឺជាយុវជនដ៏មានសក្តានុពលមួយរូបនៅក្នុងចំណោមកីឡាករដែលកើតក្នុងឆ្នាំ ២០១១ នៅទូទាំងប្រទេស ដែលទទួលបានការចាប់អារម្មណ៍យ៉ាងខ្លាំងនៅក្នុងប្រព័ន្ធអភិវឌ្ឍន៍បាល់ទាត់យុវជនអាមេរិក។
គួរបញ្ជាក់ដែរថា មុនពេលចូលរួមជាមួយសាលាបាល់ទាត់ក្លិប Orlando City យុវជនកូនកាត់ខ្មែរ-អាមេរិក Carson Starrett ក៏បានឆ្លងកាត់ការបណ្តុះបណ្តាលនៅក្នុងក្លិប Legends FC, Barcelona និង Inter Miami ផងដែរ៕
ចែករំលែកព័តមាននេះ