ក្រុមម៉ូតូទឹកកម្ពុជា ត្រៀមខ្លួន១០០០% សម្រាប់ការប្រកួតជុំទី៣
- ភ្នំពេញ
រាជធានីភ្នំពេញ ៖ បន្ទាប់ពីទទួលបានជោគជ័យយ៉ាងត្រចះត្រចង់ក្នុងការប្រកួតប្រណាំងកីឡាម៉ូតូទឹកកម្រិតពិភពលោកទាំងពីរជុំ គឺជុំទី១ នៅប្រទេសប៊ុលហ្គារី ចាប់ពីថ្ងៃទី៨ ដល់ថ្ងៃទី១២ ខែកក្កដា និងជុំទី២នៅរដ្ឋArizona សហរដ្ឋអាមេរិក ចាប់ពីថ្ងៃទី៨ដល់ថ្ងៃទ១១ ខែតុលា ឆ្នាំ២០២៦។
សហព័ន្ធកីឡាម៉ូតូទឹកកម្ពុជាត្រៀមខ្លួន១០០០ភាគរយសម្រាប់ចូលរួមប្រកួតដណ្ដើមជ័យជម្នះក្នុងជុំទី៣ដែលនឹងធ្វើឡើងនៅប្រទេសថៃដែលនឹងប្រព្រឹត្តទៅចាប់ពីថ្ងៃទី១៣ ដល់១៧ ខែមករាឆ្នាំ២០២៧។
លោកសាលី អ៊ូមើត កំពូលអ្នកប្រណាំងម៉ូតូទឹកដ៏ឆ្នើមរបស់កម្ពុជាបានថ្លែងប្រាប់អ្នកសារព័ត៏មានឱ្យបានដឹងថា ក្រុមកីឡាម៉ូតូទឹកកម្ពុជា បានត្រៀមខ្លួនរួចរាល់អស់ហើយសម្រាប់ការចូលរួមប្រកួតក្នុងជុំទី៣ជាជុំផ្ដាច់ព្រ័ត្រ នៅប្រទេសថៃដែលនឹងធ្វើឡើងនៅខែមករា ឆ្នាំ២០២៧ ។ តែដោយសារយើងមានជម្លោះជាមួយប្រទេសថៃ សហព័ន្ធកីឡាម៉ូតូទឹកកម្ពុជាត្រូវតែសុំគោលការណ៍ពីរាជរដ្ឋាភិបាលជាមុនសិន។
លោកណុះ ស្លេះ ប្រធានសហព័ន្ធកីឡាម៉ូតូទឹកកម្ពុជា ធ្លាប់បានមានប្រសាសន៍ឱ្យដឹងថា ក្រុមកីឡាម៉ូតូទឹកកម្ពុជាដណ្ដើមបានជ័យជម្នះយ៉ាងត្រចះត្រចង់នៅក្នុងការប្រកួតដណ្ដើមជើងឯកពិភពលោក Jet Ski World Series 2026 ជុំទី២ ដែលបានប្រព្រឹត្តិទៅចាប់ពីថ្ងៃទី៣ ដល់ថ្ងៃទី១២ ខែតុលា នៅលើទឹកដីសហរដ្ឋអាមរិកដោយដណ្ដើមបានមេដាយ៩គ្រឿង ក្នុងនោះមេដាយមាសចំនួន៤គ្រឿង មេដាយប្រាកចំនួន៣គ្រឿង និងមេដាសំរឹទ្ធចំនួន២គ្រឿង។
ទោះជាយ៉ាងណា សហព័ន្ធកីឡាម៉ូតូទឹកកម្ពុជានៅមានមហិច្ឆិតាចង់បន្តបេសកកម្មរបស់ខ្លួននៅជុំទី៣ជាបន្តទៀតដើម្បីដណ្ដើមយកមេដាយជូនជាតិមាតុភូមិ ។ ការប្រកួតកាលពីជុំទី២កន្លងមកនេះកម្ពុជាបានបញ្ជូនកីឡាករជម្រើសជាតិឆ្នើមៗនិងមានបទពិសោធន៍ប្រកួតយ៉ាងជោគជាំចំនួន៦រូបរួមមាន៖កីឡាករសាលី អ៊ូមើត កីឡាករសាលី ហ្វីលីន កីឡាករកៃវ៉ាន់ ស៊ីដែន កីឡាករម៉ឺន អូស្មាន់ កីឡាករមី មូស្តាន់និងទៀត សាលេះ។
លោកប្រធានសហព័ន្ធរូបនេះបានឱ្យដឹងទៀតថាបច្ចុប្បន្នកីឡាម៉ូតូទឹកកម្ពុជា ប្រភេទកីឡាដ៏មានសក្ដានុពលរបស់កម្ពុជា ដែលធ្វើឱ្យកម្ពុជាមានកេរឈ្មោះល្បីរន្ទឺនៅលើពិភពលោក។ តែទោះជាយ៉ាណា លោកសូមធ្វើការអំពាវនាវឱ្យមានការចូលរួមបានគ្រប់គ្នាពីគ្រប់ស្ថាប័នពាក់ព័ន្ធមិនថា តាមរយៈអ្វីនោះទេ ។ លោកបានបញ្ជាក់ឱ្យបានដឹងទៀតថា រាល់ការចេញទៅប្រកួតម្ដងៗគឺត្រូវចំណាយថវិកាច្រើនណាស់ ។ ជាពិសេសការចេញទៅប្រកួតកម្រិតពិភពលោកទាំងពីរជុំកន្លងមកក្នុងត្រូវចំណាយក្នុ១ជុំមិនក្រោម១០ម៉ឺនដុល្លារសហរដ្ឋអាមេរិកនោះទេ។
លោកសាលី អ៊ូមើត ប្រធានក្រុមកីឡាករម៉ូទឹកជម្រើសជាតិកម្ពុជាបានលើកឡើងថា ទោះបីការប្រកួតជុំទី៣នៅប្រទេសថៃយើងមិនទាន់ប្រាកដថាបានទៅឬមិនបានទៅ លោកនៅតែជម្រុញឱ្យកីឡាករទាំងអស់ត្រូវខិតខំប្រឹងប្រែងហ្វឹកហាត់ឱ្យបានខ្លាំង ជាពិសេសធ្វើឱ្យលើសពីការប្រកួតនៅអឺរ៉ុបនិងសហរដ្ឋអាមេរិកនាពេលកន្លងមក គឺត្រៀមស្ទើតែមួយពាន់ភាគរយ ។ ព្រោះលោកបានដឹងរួចមកហើយថា គូប្រជែងមកពីប្រទេសណាខ្លាំង ឬមិនខ្លាំង ។ ប៉ុន្តែសម្រាប់ប្រទេសជិតខាងមួយនេះគឺជាគូប្រជែងខ្លាំងបំផុតសម្រាប់រូបលោក៕
ចែករំលែកព័តមាននេះ