ADផ្ទាំងផ្សព្វផ្សាយពាណិជ្ជកម្ម

Picture

​អតីត​គ្រូ​ជម្រើស​ជាតិចិន​សារភាព​ថា សូក​លុយ​យក​តំណែង​នេះ និង​កំណត់​លទ្ធផល​ប្រកួត

6 ខែ មុន

ចិន ៖ អតីត​គ្រូបង្វឹក​ក្រុមបាល់ទាត់​ជម្រើស​ជាតិចិន លោក Li Tie បាន​សារភាព​តាម​កញ្ចក់​

ចិន ៖ អតីត​គ្រូបង្វឹក​ក្រុមបាល់ទាត់​ជម្រើស​ជាតិចិន លោក Li Tie បាន​សារភាព​តាម​កញ្ចក់​ទូរទស្សន៍​ថា គាត់​បាន​សូកប៉ាន់​ប្រាក់​រាប់​សែន​ដុល្លារ ដើម្បី​ទទួល​បាន​តំណែង​ពិសេស​មួយ​នេះ ក៏​ដូច​ជា​ជាប់​ពាក់ព័ន្ធ​ក្នុង​ការ​កំណត់​លទ្ធផល​ប្រកួត​ផង​ដែរ​។ នេះ​បើ​យោង​តាម​ប្រភព​ពី AFP ចេញផ្សាយ​កាលពី​ថ្ងៃ​ទី​១០ ខែមករា ឆ្នាំ​២០២៤​។

វិស័យ​កីឡាបាល់ទាត់​របស់​ប្រទេស​ចិន បាន​ស្ថិត​នៅ​ក្នុង​កណ្តាប់ដៃ​យុទ្ធនាការ​ប្រឆាំង​អំពើ​ពុក​រលួយ​ដ៏​សំខាន់​មួយ ដែល​ត្រូវ​បាន​មើលឃើញ​ថា​តួលេខ​ឈានមុខ​គេ ដែល​ត្រូវ​ស៊ើបអង្កេត ឬ​ចោទប្រកាន់​។

លោក Li Tie អតីត​ខ្សែបម្រើ​ក្រុម​ជម្រើស​ជាតិចិន និង​ក្លិប Everton ដែល​ធ្លាប់​ជា​គ្រូ​ប​ង្វិ​ក​ក្រុម​ជម្រើស​ជាតិចិន ត្រូវ​បាន​ដាក់​ស្ថិត​ក្រោម​ការ​ស៊ើបអង្កេត​ក្នុង​ឆ្នាំ ២០២២ ដែល​ត្រូវ​បាន​ចោទប្រកាន់​ដោយ​អាជ្ញាធរ​ពី​បទ​បំពាន​ច្បាប់​យ៉ាងធ្ងន់ធ្ងរ​។ ទោះ​យ៉ាងណា​គ្មាន​ព័ត៌មាន​លម្អិត​ណាមួយ​អំពី​ករណី​នេះ​ឡើយ រហូត​ទាល់តែ​គាត់​សារភាព​នៅ​យប់​ថ្ងៃ​ទី​៩ ខែមករា​ថ្មី​ៗ​នេះ ដែល​ជា​ផ្នែក​នៃ​ភាពយន្ត​ឯកសារ​ប្រឆាំង​អំពើ​ពុក​រលួយ ដែល​បាន​ចាក់​ផ្សាយ​តាម​ទូរទស្សន៍​រដ្ឋ​ចិន CCTV ។ CCTV ផ្សាយ​ជា​ទៀងទាត់​នូវ​ចម្លើយ​សារភាព​របស់​ជនសង្ស័យ​ឧក្រិដ្ឋជន រួម​ទាំង​អតីតមន្ត្រី មុន​ពេល​ពួក​គេ​បង្ហាញខ្លួន​ក្នុង​តុលាការ និង​ជា​ការ​អនុវត្ត​ដ៏​ម៉ឺងម៉ាត់ ដែល​ត្រូវ​បាន​ថ្កោលទោស​យ៉ាង​ទូលំទូលាយ​ដោយ​ក្រុម​សិទ្ធិ​មនុស្ស​។

លោក Li សារភាព​ថា គាត់​បាន​រៀបចំ​ប្រាក់​សំណូក​ជិត ៤២១,០០០​ដុល្លារ​អា​មេ​រិ​ក ដើម្បី​ទទួល​បាន​តំណែង​គ្រូបង្វឹក​ជម្រើស​ជាតិចិន ហើយ​គាត់​បាន​ជួយ​ក្នុង​ការ​កំណត់​លទ្ធផល​ប្រកួត​ផង​ដែរ អំឡុង​ពេល​នោះ​។ បុរស​វ័យ​៤៦​ឆ្នាំ​រូប​នេះ​បន្ត​ថា «​ខ្ញុំ​សោកស្ដាយ​ណាស់ ខ្ញុំ​គួរតែ​ក្រាប​ក្បាល​ដល់​ដី ហើយ​ដើរ​តាម​ផ្លូវត្រូវ​។ ហើយ​វា​មានរឿង​មួយ​ចំនួន ដែល​នៅ​ពេល​នោះ​ជា​ទម្លាប់​ទូទៅ​ក្នុង​បាល់ទាត់​ចិន​»​។

នៅ​ពេល​គាត់​បាន​ចូល​កាន់​តំណែង​ជា​គ្រូបង្វឹក​ជម្រើសជាតិ​ក្នុង​ខែមករា ឆ្នាំ​២០២០ លោក Li បាន​ប្រកាស​ថា គាត់​បាន​សម្រេច​បាន​ក្តី​សុបិន​ដ៏​ធំ​បំផុត​របស់​គាត់​។ នៅ​ក្នុង​វី​ដេ​អូ​ឯកសារ​នោះ ក៏​បាន​រៀបរាប់​ថា លោក Li បាន​ស្នើ​ក្លិប​បាល់ទាត់ Wuhan Zall ដែល​គាត់​ធ្លាប់​ធ្វើ​ជា​គ្រូបង្វឹក​នៅ​ទីនោះ ដើម្បី​អន្តរាគមន៍​ជំនួស​គាត់​ជាមួយ​សមាគម​បាល់ទាត់​ចិន ដោយ​សន្យា​ថា​នឹង​ផ្តល់​ជូន​ប្រាក់​ជាទី​គាប់ចិត្ត​។

ជាក់ស្តែង ក្លិប Wuhan Zall ពិតជា​បាន​បង់ប្រាក់​ចំនួន​២​លាន​យ័ន ដែល​ស្មើនឹង ២៨១,០០០​ដុល្លារ​អា​មេ​រិ​ក​ជា​សំណូក​ដល់​លោក Chen Xuyuan ដែល​ពេល​នោះ​គឺជា​ប្រធាន​សមាគម​បាល់ទាត់​ចិន ហើយ​ឥឡូវនេះ​ក៏​ទទួល​រង​ការ​ស៊ើបអង្កេត​អំពើ​ពុក​រលួយ​ផង​ដែរ​។ លោក Li បាន​និយាយ​ផង​ដែរ​ថា គាត់​បាន​ផ្តល់​ប្រាក់​១​លាន​យន់​ពី​ហោប៉ៅ​ផ្ទាល់ខ្លួន​ទៅ​ឱ្យ​អគ្គលេខាធិការ​សមាគម​បាល់ទាត់​ចិន​។

បន្ទាប់​ពី​ត្រូវ​បាន​តែងតាំង​តំណែង​ដ៏​សំខាន់​នេះ កីឡាករ​របស់​ក្លិប Wuhan Zall ចំនួន​៤​នាក់ ត្រូវ​បាន​កោះហៅ​ចូល​ក្រុម​ជម្រើសជាតិ បើ​ទោះជា​ពួក​គេ​គ្មាន​លក្ខណៈសម្បត្តិ​គ្រប់គ្រាន់​ក្នុង​កម្រិត​ជាប់​ជម្រើសជាតិ​យ៉ាងណា​ក៏​ដោយ​។ ទីបំផុត​ចិន​បាន​បរាជ័យ​ក្នុង​ការ​ប្រកួត​ជម្រុះ​ប្រចាំ​តំបន់​ព្រឹ​ត្ត​ការណ៍ World Cup 2022 ហើយ​លោក Li បាន​លាលែង​ពី​តំណែង​នៅ​ឆ្នាំ ២០២១​។ ទីភ្នាក់ងារ​ជាតិ​ប្រឆាំង​នឹង​អំពើ​ពុក​រលួយ​ក៏​បាន​ចាប់ផ្តើម​ការ​ស៊ើបអង្កេត​លើ​គាត់​នៅ​ចុងឆ្នាំ ២០២២ ។

ថ្នាក់ដឹកនាំ​ជាន់ខ្ពស់ និង​នាយក​ប្រតិបត្តិ​សមាគម​បាល់ទាត់​ចិន​ប្រហែល ១០​នាក់​ក៏​ត្រូវ​បាន​បណ្តាញ​ចេញពី​តំណែង​ចាប់តាំងពី​ពេល​នោះ រួម​ទាំង​លោក Chen Xuyuan ផង​ដែរ​។ លោក Chen ត្រូវ​បាន​ចោទប្រកាន់​កាលពី​ខែកញ្ញា​ឆ្នាំ​មុន​ពី​បទ​ពុក​រលួយ ដោយ​បាន​សារភាព​នៅ​ក្នុង​ភាពយន្ត​ឯកសារ​ទូរទស្សន៍​ថា បាន​ទទួលយក​ប្រាក់​យ៉ាងច្រើន​ពី​អ្នក​ដែល​ចង់​ទទួល​បាន​ផលប្រយោជន៍​ពី​គាត់​។

លោក​ប្រធានាធិបតី​ចិន ស៊ី ជី​ន​ពីង បាន​ពណ៌នា​ថា លោក​គឺជា​អ្នកគាំទ្រ​បាល់ទាត់ ហើយ​មាន​សុបិន​ចង់ឱ្យ​ប្រទេស​ចិន​ធ្វើ​ជា​ម្ចាស់ផ្ទះ និង​ឈ្នះ​ការ​ប្រកួត​បាល់ទាត់​ពិភពលោក​នៅ​ថ្ងៃ​ណាមួយ​។ ប៉ុន្តែ​មហិច្ឆតា​ក្នុង​ការ​អភិវឌ្ឍ​ក្រុមបាល់ទាត់​បុរស​ឱ្យ​ក្លាយជា​ក្រុម​ដ៏​ខ្លាំង​បំផុត​របស់​ពិភពលោក​មិន​បាន​សម្រេច​ឡើយ​៕ (​ប្រភព ៖ AFP)

អត្ថបទសរសេរ ដោយ

កែសម្រួលដោយ