ប្រទេសជប៉ុន ៖ ព្រឹត្តិការណ៍កីឡាអាស៊ី ឬអាស៊ីហ្គេម(Asian Games) លើកទី២០ បានបើកជាផ្លូវការហើយ នៅក្នុងទីក្រុង Nagoya ប្រទេសជប៉ុន កាលពីថ្ងៃទី១៩ ខែកញ្ញា ឆ្នាំ២០២៦ ជាមួយពិធីបើកដ៏អធិកអធមអមជាមួយនឹងការសម្តែងរបាំ និងការបាញ់កាំជ្រួចយ៉ាងស្រស់ស្អាតផងដែរ បើទោះបីជាត្រូវប្រឈមមុខនឹងបញ្ហាជាច្រើនក្នុងការដំណាក់កាលរៀបចំ មុនពិធីបើកយ៉ាងណាក៏ដោយ។ នេះបើការចេញផ្សាយពី Reuters ។
ព្រះចៅអធិរាជជប៉ុន Naruhito បានប្រកាសបើកព្រឹត្តិការណ៍កីឡានេះជាផ្លូវការ បន្ទាប់ពីបានទតការដង្ហែព្យុហយាត្រារបស់ប្រទេស និងតំបន់ចំនួន ៤៥ នៅវេទិកាឥស្សរជនជាន់ខ្ពស់ រួមជាមួយលោកស្រី Kirsty Coventry ដែលប្រធានគណៈកម្មាធិការអូឡាំពិកអន្តរជាតិ (IOC)។ ការយាងចូលរួមរបស់ព្រះចៅ Naruhito រួមជាមួយសែរាជវង្ស ត្រូវបានអមដោយប្រតិបត្តិការសន្តិសុខយ៉ាងតឹងរ៉ឹង ដោយប៉ូលិសរហូតដល់១ម៉ឺននាក់ ត្រូវបានដាក់ពង្រាយសម្រាប់ពិធីនេះ។
លោក Shigenobu Murofushi និងកូនប្រុស Koji Murofushi ដែលអ្នកទាំងពីរគឺជាអតីតម្ចាស់ជើងឯកកីឡាចោលដុំដែកបង្វិលខ្លួនក្នុងព្រឹត្តិការណ៍កីឡាអាស៊ី បានរួមគ្នាដុតគប់ភ្លើងធំបំភ្លឺបើកព្រឹត្តិការណ៍នេះ។
ក្រុមអ្នករៀបចំកម្មវិធីសង្ឃឹមថា ពិធីបើកនេះ អាចនឹងជួយលុបលាងដំណាក់កាលរៀបចំដ៏រអាក់រអួល ដែលពោរពេញទៅដោយការរិះគន់ និងត្អូញត្អែរពីបណ្តាអត្តពលិក និងមន្ត្រីពាក់ព័ន្ធទៅនឹងកន្លែងស្នាក់នៅ និងការដឹកជញ្ជូន។ ជាក់ស្តែង ជំនួសឱ្យការសាងសង់ភូមិកីឡាដាច់ដោយឡែកមួយ ក្រុមអ្នករៀបចំបានដាក់ឱ្យអត្តពលិក និងមន្ត្រីពាក់ព័ន្ធស្នាក់នៅលាយឡំគ្នានៅតាមបន្ទប់សណ្ឋាគារ បន្ទប់កុងតឺន័រឈើបណ្តោះអាសន្ន និងកប៉ាល់ទេសចរណ៍១គ្រឿង ដើម្បីជាវិធានការកាត់បន្ថយការចំណាយ។
គណៈប្រតិភូក្រុមជម្រើសជាតិជាច្រើនប្រទេស និងតំបន់ រួមទាំងម្ចាស់ផ្ទះជប៉ុនផងដែរ បានរកឃើញថា ការរៀបចំនេះគឺស្ថិតក្រោមស្តង់ដារខ្លាំង ដោយបានត្អូញត្អែរពីការភាន់ច្រឡំ និងការកក់បន្ទប់ជាន់គ្នា បន្ទប់កុងតឺន័រធ្វើពីឈើតូចចង្អៀតខ្លាំងពេក។
ប្រទេសខ្លះ ថែមទាំងបានចាត់ចែងចាត់ចែងដោយខ្លួនឯង ដោយរៀបចំឱ្យអត្តពលិក និងមន្ត្រីពួកគេស្នាក់នៅសណ្ឋាគារដាច់ដោយឡែកមួយ ដោយសារតែខ្វះគ្រែគេង។ គណៈប្រតិភូជាច្រើនក៏បានរអ៊ូរទាំផងដែរ ចំពោះការរង់ចាំយ៉ាងយូរសម្រាប់អត្តពលិកក្នុងការចុះឈ្មោះនៅពេលមកដល់ ហើយរថយន្តក្រុងក៏មកយឺតយ៉ាវ ឬដឹកអត្តពលិកពួកគេទៅខុសទីតាំងប្រកួតក៏មានដែរ។
ពាក់ព័ន្ធនឹងបញ្ហានេះ ក្រុមប្រឹក្សាអូឡាំពិកអាស៊ី (OCA) ដែលជាអ្នកគ្រប់គ្រងការប្រកួតកីឡាដែលធ្វើឡើងរៀងរាល់៤ឆ្នាំម្តងមួយនេះ កាលពីថ្ងៃទី១៩ ខែកញ្ញា បានទទួលស្គាល់បញ្ហាទាំងនេះ ប៉ុន្តែបានចាត់ទុកថាវាគ្រាន់តែជាបញ្ហាប្រឈមដំបូងៗតែប៉ុណ្ណោះ។
គួរបញ្ជាក់ថា ព្រឹត្តិការណ៍កីឡាអាស៊ីលើកទី២០ ដែលបើកកាលពីថ្ងៃទី១៩ ខែកញ្ញា និងគ្រោងបិទនៅថ្ងៃទី៤ ខែតុលា ឆ្នាំ២០២៦ បានទទួលស្វាគមន៍អត្តពលិកជាង ១១,០០០ នាក់ ដែលត្រូវមកប្រកួតប្រជែងដណ្តើមមេដាយមាសសរុបចំនួន ៣៦៩ គ្រឿង នៅក្នុងកម្មវិធីកីឡារហូតដល់ទៅ ៤៣ ប្រភេទ។ ចំណែកឯកម្ពុជាបានបញ្ជូនអត្តពលិកចូលរួមសរុប ១០៦នាក់ លើ ១៤ ប្រភេទកីឡា៕ រូបភាព ៖ Olympics
ចែករំលែកព័តមាននេះ