ប្រទេសជប៉ុន ៖ ស្ថិតនៅក្នុងវ័យទើប ១៣ឆ្នាំ និង ៣៣៩ថ្ងៃ កីឡាការិនីហែលទឹកចិន Yu Zidi បានបង្កើតរឿងភ្ញាក់ផ្អើលយ៉ាងខ្លាំង កាលពីថ្ងៃទី២០ ខែកញ្ញា ឆ្នាំ២០២៦ ដោយបានឈ្នះមេដាយមាសព្រឹត្តិការណ៍កីឡាអាស៊ីលើកទី២០ នៅប្រទេសជប៉ុន លើវិញ្ញាសាហែលមេអំបៅចម្ងាយ២០០ម៉ែត្រផ្នែកនារី ដោយប្រើថិរវេលា ២:០៥.០៨ នាទី ដែលជាកំណត់ត្រាថ្មីប្រចាំព្រឹត្តិការណ៍នេះ។
ជាមួយថិរវេលា ២:០៥.០៨ នាទី Yu Zidi បានបំបែកកំណត់ត្រាចាស់លើវិញ្ញាសាហែលមេអំបៅចម្ងាយ២០០ម៉ែត្រនៅព្រឹត្តិការណ៍កីឡាអាស៊ីរបស់កីឡាការិនីរៀមច្បង Zhang Yufei កាលពីឆ្នាំ ២០២២ ដោយប្រើថិរវេលា ២:០៥.៥៧ នាទី។
បើទោះមិនទាន់ចូលវ័យ១៤ឆ្នាំក៏ដោយ ក៏ Yu Zidi ដែលបានកើតនៅថ្ងៃទី១៦ ខែតុលា ឆ្នាំ ២០១២ នៅទីក្រុងប៉ោឌីង (Baoding) ខេត្តហឺប៉ី (Hebei) បានសាងកេរ្តិ៍ឈ្មោះក្លាយជាអត្តពលិកលំដាប់ពិភពលោករួចទៅហើយ។
កាលពីនៅវ័យ១២ឆ្នាំ នាងបានក្លាយជាអត្តពលិកវ័យក្មេងបំផុតក្នុងប្រវត្តិសាស្ត្រ ដែលឈ្នះមេដាយព្រឹត្តិការណ៍ជើងឯកពិភពលោក World Aquatics Championships ឆ្នាំ ២០២៥ នៅសិង្ហបុរី ដោយដណ្តើមបានមេដាយសំរឹទ្ធលើវិញ្ញាសាហែលសេរីបណ្តាក់ ៤x២០០ ម៉ែត្រ។ លើសពីនេះទៀត នាងក៏ជាម្ចាស់កំណត់ត្រាអាស៊ីលើវិញ្ញាសាហែលចម្រុះ ២០០ ម៉ែត្រផងដែរ ជាមួយថិរវេលា ២:០៧.៤១ នាទី ដោយបំបែកកំណត់ត្រាចាស់របស់រៀមច្បង Ye Shiwen កាលពីឆ្នាំ ២០១២។
តាមរយៈសមិទ្ធផលចុងក្រោយនេះ Yu Zidi ត្រូវបានគេរំពឹងថានឹងក្លាយជាអត្តពលិកឆ្នើមលំដាប់ពិភពលោកម្នាក់ ក៏ដូចជានឹងបង្កើតការចាប់អារម្មណ៍ ឬឥទ្ធិពលដ៏ធំធេងនៅក្នុងព្រឹត្តិការណ៍កីឡាអូឡាំពិករដូវកក្តៅឆ្នាំ ២០២៨ នៅទីក្រុងឡូសអែនជឺលេស (Los Angeles) សហរដ្ឋអាមេរិកផងដែរ។
គួរបញ្ជាក់ថា គិតត្រឹមព្រឹកថ្ងៃទី២១ ខែកញ្ញា ប្រទេសចិន កំពុងឈរកំពូលតារាងមេដាយសរុបជាបណ្តោះ ជាមួយមេដាយសរុប ២២ គ្រឿង មាស ១៣ ប្រាក់ ៦ និងសំរឹទ្ធ ៣ គ្រឿង តាមពីក្រោយដោយម្ចាស់ផ្ទះជប៉ុន ដែលឈ្នះសរុបចំនួន ២១ គ្រឿង មាស ៦ ប្រាក់ ៨ និងសំរឹទ្ធ ៧ គ្រឿង៕ ប្រភព ៖ CNA និងប្រភពផ្សេងទៀត
ចែករំលែកព័តមាននេះ