រាជធានីភ្នំពេញ ៖ សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្មីៗនេះបានផ្ញើសារអបអរសាទរយ៉ាងស្មោះស្ម័គ្រ និងកោតសរសើរចំពោះក្រុមកីឡាករ កីឡាការិនីជម្រើសជាតិកម្ពុជា ដែលបានខិតខំប្រឹងប្រែងដណ្តើមបានមេដាយសំរឹទ្ធចំនួន៤ គ្រឿង ជូនជាតិមាតុភូមិ ក្នុងព្រឹត្តិការណ៍កីឡាអាស៊ីលើកទី២០ (Asian Games 2026) នៅទីក្រុងអាយឈិ-ណាហ្គូយ៉ា (Aichi-Nagoya) ប្រទេសជប៉ុន។
អត្តពលិកឆ្នើមរបស់កម្ពុជាដែលទទួលបានជ័យលាភីមេដាយសំរឹទ្ធទាំង ៤ គ្រឿង រួមមាន៖
កីឡាបាល់ទាត់លើតុ (Table Tennis) ទទួលបានមេដាយសំរឹទ្ធ២គ្រឿងដណ្តើមបានដោយកីឡាករ ឌី គីមយ៉ាន, យ៉ុន សុភ័ក្រ រស្មី និងកីឡាការិនី ម៉ី ស្រីមាស ។ កីឡាការ៉ាតេ(Karate)
ទទួលបានមេដាយសំរឹទ្ធ១គ្រឿងដណ្តើមបានដោយកីឡាការិនី វ៉ាន់ ចរិយា ក្នុងវិញ្ញាសាប្រយុទ្ធនារី ទម្ងន់ក្រោម ៦១ គីឡូក្រាម ។
កីឡាគុនចម្រុះ (Mixed Martial Arts – MMA) ទទួលបានមេដាយសំរឹទ្ធ១គ្រឿងដណ្តើមបានដោយកីឡាការិនី ចេង ដាលីន ។ តាមរយៈលទ្ធផលនេះនាំឲ្យកម្ពុជាឈរលេខរៀងទី៣៥ក្នុងតារាងមេដាយក្នុងចំណោមបណ្ដាប្រទេសចំនួន៤៦ចូលរួម។
សម្តេចមហាបវរធិបតីនាយករដ្ឋមន្ត្រី បានគូសបញ្ជាក់ថា ជោគជ័យដ៏ត្រចះត្រចង់នេះ មិនត្រឹមតែនាំមកនូវកិត្តិយស និងមោទនភាពជូនដល់ជាតិបោះជំហានលើឆាកអន្តរជាតិប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីការរីកចម្រើន និងការអភិវឌ្ឍសមត្ថភាពឥតឈប់ឈរនៃវិស័យកីឡារបស់កម្ពុជាផងដែរ។
គួរឱ្យដឹងផងដែរថា ក្រុមអត្តពលិកកម្ពុជា បានបញ្ចប់បេសកកម្មក្នុងព្រឹត្តិការណ៍ប្រកួតកីឡាអាស៊ី (Asian Games) លើកទី២០ ឆ្នាំ២០២៦ នៅប្រទេសជប៉ុនជាផ្លូវការ ដោយឈ្នះមេដាយសំរឹទ្ធ៤គ្រឿងជូនជាតិ ។ ព្រឹត្តិការណ៍កីឡាប្រចាំទ្វីប៤ឆ្នាំម្ដងនេះបានប្រព្រឹត្តទៅចាប់ពីថ្ងៃទី១៩ ខែកញ្ញា ដល់ថ្ងៃទី០៤ ខែតុលា ឆ្នាំ២០២៦ ដោយមានអត្តពលិកចំនួន ៤៦ប្រទេសចូលរួម។
ដោយឡែកប្រទេសដណ្ដើមបានមេដាយច្រើនជាងគេ គឺចិនសរុបមានចំនួន៣៤១គ្រឿង (មាស១៦៩, ប្រាក់៨៩ និងសំរឹទ្ធ៨៣) ។ម្ចាស់ផ្ទះជប៉ុន ឈរលេខ២ ដណ្ដើមបានមេដាយសរុប ២៦៩គ្រឿង (មាស៨៣, ប្រាក់៩៥ និងសំរឹទ្ធ៩១) និងកូរ៉េខាងត្បូង ឈរលេខ៣ ដណ្ដើមបានមេដាយសរុប១៥០គ្រឿង(មាស៣៩, ប្រាក់៤៣ និងសំរឹទ្ធ៦៨) ៕ ដោយ ៖ នាគ សេន
ចែករំលែកព័តមាននេះ