ទីក្រុងប៊ុយណូស៊ែ ៖ កីឡាករ Lionel Messi បានបញ្ចប់ការប្រកួតលើកទី ២០៨ ដែលជាការប្រកួតចុងក្រោយបង្អស់របស់ខ្លួន សម្រាប់ក្រុមជម្រើសជាតិអាហ្សង់ទីន ជាមួយការស៊ុតបញ្ចូលទីគ្រាប់ទី ១២៦ នៅក្នុងថ្ងៃប្រកួត ដែលប្រជាជាតិអាហ្សង់ទីន បានធ្វើពិធីលាវីរបុរសបាល់ទាត់ជាតិរូបនេះ ទាំងក្ដីរំភើប និងអាឡោះអាល័យបំផុត។
ការប្រកួតមិត្តភាពអន្តរជាតិ កាលពីថ្ងៃពីព្រឹកថ្ងៃទី៧ ខែតុលា (ម៉ោងនៅកម្ពុជា) ទល់នឹងក្រុមជម្រើសជាតិបេណាំង នៅកីឡដ្ឋាន Monumental ទីក្រុងប៊ុយណូស៊ែ ដែលម្ចាស់ផ្ទះអាហ្សង់ទីនយកឈ្នះដោយលទ្ធផល ៣-០ នោះ ត្រូវប្រសិទ្ធនាមថា «The Last Tango ឬ «ការរាំតង់ហ្គោចុងក្រោយ» (the last tango) ខណៈដែលប្រធានក្រុម Messi បង្ហាញ ខ្លួនការប្រកួតចុងក្រោយបង្អស់សម្រាប់បាល់ទាត់អន្តរជាតិ បន្ទាប់ពីឆ្លងកាត់រយៈពេល ២១ឆ្នាំ ជាមួយក្រុមរហស្សនាម «ពពកស» ដោយបានឈ្នះពានរង្វាន់ FIFA World Cup ឆ្នាំ ២០២២ Copa América ២ លើក (២០២១ និង ២០២៤) និងពានរង្វាន់ Finalissima ឆ្នាំ២០២២។
នៅក្នុងការប្រកួតដ៏រំភើបនេះទៀតសោត Messi ក៏រកបាន១គ្រាប់ផងដែរ តាមរយៈការទាត់បាល់ប៉េណាល់ទី នៅនាទី ៧១ ដែលបានធ្វើឱ្យហ្វូងអ្នកគាំទ្រពេញកីឡដ្ឋានចំនួន ៨៥ ០០០ នាក់ អបអរសាទរដោយការច្រៀងបន្ទរព្រមៗគ្នាថា «Messi, Messi»។
អារម្មណ៍ដ៏រំជើបរំជួលនៃឱកាសនោះ ត្រូវបានមើលឃើញយ៉ាងច្បាស់មុនពេលការប្រកួតចាប់ផ្តើម នៅពេលខ្សែប្រយុទ្ធវ័យ៣៩ឆ្នាំរូបនេះ ត្រូវបានថតជាប់ពេលកំពុងតែស្រក់ទឹកភ្នែក នៅពេលរថយន្តក្រុងក្រុមអាហ្សង់ទីនបើកកាត់កណ្តាលហ្វូងអ្នកគាំទ្រដ៏កុះករដែលឈរអមសងខាងផ្លូវទៅកាន់កីឡដ្ឋាន Monumental។
មុនការប្រកួតទល់នឹងបេណាំងកើតឡើង សាកលវិទ្យាល័យ Buenos Aires ល្បីបំផុតនៅប្រទេសអាហ្សង់ទីន ក៏បានប្រគល់សញ្ញាបត្របណ្ឌិតកិត្តិយសជូនដល់ Messi នៅក្នុងពិធីមួយធ្វើឡើងនៅទីស្នាក់ការកណ្តាលនៃសមាគមបាល់ទាត់អាហ្សង់ទីន (AFA) ផ្ទាល់តែម្តង។
គួររំលឹកថា ការប្រកាសចូលនិវត្តន៍ពីក្រុមជម្រើសជាតិរបស់ Lionel Messi បានកើតឡើងក្នុងរយៈពេលពីរខែកន្លះ បន្ទាប់ពីការបរាជ័យរបស់អាហ្សង់ទីនក្នុងវគ្គផ្តាច់ព្រ័ត្រ World Cup ក្រោមថ្វីជើងអេស្ប៉ាញ ដោយលទ្ធផល ១-០ ដែលពេលនោះ អ្នកគាំទ្របានឃើញ Messi ចាកចេញទាំងទឹកភ្នែក។
Messi បានបញ្ចប់ដំណើរនេះ ក្នុងនាមជាអ្នកស៊ុតបញ្ចូលទី និងជាអ្នកបង្ហាញខ្លួនច្រើនជាងគេបំផុតក្នុងប្រវត្តិសាស្ត្រក្រុមជម្រើសជាតិអាហ្សង់ទីន ហើយមកទល់ពេលនេះ មានតែ Cristiano Ronaldo របស់ព័រទុយហ្គាល់ប៉ុណ្ណោះ (១៤៦ គ្រាប់ក្នុងការប្រកួត ២៣៤ លើក) ដែលមានចំនួនប្រកួត និងគ្រាប់បាល់ច្រើនជាង Messi នៅក្នុងប្រវត្តិសាស្ត្របាល់ទាត់អន្តរជាតិផ្នែកបុរស។ Messi ស៊ុតបញ្ចូលទីបាន ២១ គ្រាប់ក្នុងព្រឹត្តិការណ៍ World Cup និងកាន់កំណត់ត្រារួមជាមួយ Cristiano Ronaldo គឺជាកីឡាករបង្ហាញខ្លួននៅព្រឹត្តិការណ៍បាល់ទាត់ធំបំផុតមួយនេះច្រើនជាងគេ ពោល ៦ លើក។
បច្ចុប្បន្ន Lionel Messi ដែលជាម្ចាស់ពាន Ballon d’Or ច្រើនជាងគេ ៨ លើក កំពុងបន្តអាជីពជាមួយក្រុម Inter Miami ហើយថ្មីៗនេះ ទើបតែឈ្នះពានរង្វាន់ Campeones Cup ដែលជាពានរង្វាន់ទី ៤ របស់ខ្លួនជាមួយក្រុមនៅលីគកំពូលសហរដ្ឋអាមេរិក (MLS) មួយនេះ៕ ប្រភព ៖ ESPN និង France24
ចែករំលែកព័តមាននេះ