ប្រទេសអាល្លឺម៉ង់ ៖ អតីតម្ចាស់មកុដបវរកញ្ញាអាល្លឺម៉ង់ កញ្ញា Tatjana Genrich នៅក្នុងវ័យ៣៣ឆ្នាំ បានសម្រេចចិត្តបោះជំហានចូលប្រឡូកនៅក្នុងវិស័យប្រដាល់សកលអាជីព ដោយត្រៀមខ្លួនឡើងសង្វៀន នៅខែក្រោយនេះ។
តាមប្រភពពីកាសែត The Sun និង Fox News បានរាយការណ៍ថា Tatjana Genrich ម្ចាស់មកុដបវរកញ្ញាអាល្លឺម៉ង់ (Miss Germany/ Miss Deutschland) ឆ្នាំ២០២២ នឹងឡើងសង្វៀនប្រកួតអាជីពលើកដំបូងនៅក្នុងព្រឹត្តិការណ៍ SES Boxing ដែលនឹងប្រព្រឹត្តទៅនៅថ្ងៃទី១៤ ខែវិច្ឆិកា ឆ្នាំ ២០២៦ ខាងមុខនេះ នៅទីក្រុងម៉ាក់ដឺប៊ឺគ (Magdeburg) ប្រទេសអាល្លឺម៉ង់។ គូប្រកួតនាងមិនទាន់ត្រូវបានប្រកាសនៅឡើយទេ ប៉ុន្តែ Genrich នឹងចូលរួមក្នុងការប្រកួតនេះ ដោយភាពជឿជាក់ខ្ពស់ ដោយសារតែនាងធ្លាប់ឆ្លងកាត់វិថីមួយនេះ កាលពីនៅយុវវ័យ។
តាមពិតទៅ មុនពេលដណ្តើមបានមកុដបវរកញ្ញាអាល្លឺម៉ង់ក្នុងឆ្នាំ ២០២២ នាងធ្លាប់ជាអតីតអ្នកប្រដាល់ស្ម័គ្រចិត្តម្នាក់ ហើយក៏ធ្លាប់ឈ្នះជើងឯកថ្នាក់រដ្ឋចំនួន ៣ ឆ្នាំជាប់ៗគ្នាផងដែរ (ឆ្នាំ ២០០៧ ដល់ ២០០៩) នៅក្នុងប្រភេទម្ងន់ Flyweight។ ជុំវិញមូលហេតុដែលនាងបានចូលរួមកីឡាប្រដាល់ជាលើកដំបូងនោះ Genrich បាននិយាយថា «នៅសាលារៀន ខ្ញុំតែងត្រូវបានគេធ្វើបាប ហើយខ្ញុំចង់ស្វែងរកវិធីមួយដើម្បីការពារខ្លួនឯង។ នោះហើយជាចំណុចចាប់ផ្តើមនៃរឿងរ៉ាវទាំងអស់នេះ»។
បច្ចុប្បន្ន Genrich កំពុងតែហ្វឹកហាត់យ៉ាងខ្លាំង ពោល ៥ ថ្ងៃក្នុងមួយសប្តាហ៍ ក្រោមការបង្វឹករបស់លោក Dirk Dzemski អតីតគ្រូបង្វឹកជើងឯកពិភពលោក។ គ្រូបង្វឹកវ័យ៥៤ឆ្នាំរូបនេះ ធ្លាប់ធ្វើការជាមួយកីឡាករឆ្នើមៗអាល្លឺម៉ង់ជាច្រើន រួមទាំងកីឡាករ Robert Stieglitz នៅក្នុងការដណ្តើមបានជើងឯកពិភពលោកទម្ងន់ Super-middleweight និង Light-heavyweight។
ដោយមិនខ្វល់ពីឧបសគ្គណាទាំងអស់ Tatjana Genrich បានដាក់គោលដៅចុងក្រោយរបស់នាង គឺការតស៊ូដើម្បីក្លាយជាម្ចាស់ជើងឯកពិភពលោក នាពេលអនាគត ហើយនាងបានបន្ថែមទៀតថា «ខ្ញុំចង់ក្លាយជាគំរូសម្រាប់ស្ត្រីវ័យក្មេង និងបង្ហាញពួកគេថា អ្នកអាចទទួលបានជោគជ័យទាំងក្នុងអាជីពការងារ និងកីឡា»។
Tatjana Genrich បច្ចុប្បន្នមានអ្នកតាមដានជាង ៤៥ ០០០ នាក់រួចទៅហើយ នៅលើគណនី Instagram ហើយថែមទាំងបានចែករំលែកវីដេអូសកម្មភាពហ្វឹកហាត់ទៅកាន់អ្នកគាំទ្រទៀតផង។ ប្រសិនបើនាងទទួលបានជ័យជម្នះនៅថ្ងៃទី១៤ ខែវិច្ឆិកា ខាងមុខនេះ ច្បាស់ឈ្មោះរបស់នាង អាចនឹងត្រូវតាមដានយ៉ាងខ្លាំងដោយបណ្តាសារព័ត៌មាន និងមហាជននៅក្នុងឆ្នាំ ២០២៧ និងឆ្នាំបន្តបន្ទាប់ទៀត៕
ចែករំលែកព័តមាននេះ