ទីក្រុងហ្សាការតា ៖ ក្រុមកីឡាបាល់ទាត់ឈុតធំបុរសរបស់ឥណ្ឌូណេស៊ី បានបង្កើតប្រវត្តិសាស្ត្រ ដោយការឈ្នះពានរង្វាន់ FIFA ASEAN Cup ឆ្នាំ២០២៦ កម្រិត ១ ជាលើកដំបូង បន្ទាប់ពីបានយកឈ្នះលើក្រុមជម្រើសជាតិថៃ ដែលនៅសល់គ្នា ១០ នាក់ (កាតលឿង២ដងស្មើកាតក្រហម តាំងពីនាទី ៨១) ដោយការទាត់បាល់ប៉េណាល់ទីកាត់សេចក្តីលទ្ធផល ៤-២ (ស្មើគ្នា ២-២ នៅ ១២០ នាទី) នៅក្នុងការប្រកួតវគ្គផ្តាច់ព្រ័ត្រដ៏ជក់ចិត្ត នៅកីឡដ្ឋានជាតិ Gelora Bung Karno ទីក្រុងហ្សាការតា កាលពីថ្ងៃទី៥ ខែតុលា។
តាមរយៈសមិទ្ធផលខាងលើនេះ គឺជាការឈ្នះពានរង្វាន់ថ្នាក់តំបន់កម្រិតខ្ពស់ដំបូងបង្អស់សម្រាប់ក្រុមជម្រើសជាតិឈុតធំបុរេសឥណ្ឌូណេស៊ី ចាប់តាំងពីឆ្នាំ១៩៩៦មក បន្ទាប់ពីខកខាន និងបានត្រឹមជើងឯករងចំនួន ៦ ដងមកហើយ ក្នុងពានរង្វាន់ជើងឯកអាស៊ាន ASEAN Championship។ ប៉ុន្តែកាលពីយប់ថ្ងៃទី៥ ខែតុលា ឥណ្ឌូណេស៊ីបានលើកពានរង្វាន់មួយ ហើយនោះក៏មិនមែនជា ASEAN Championship នោះទេ ប៉ុន្តែគឺជារូបរាងថ្មី និងដំបូងនៃពាន FIFA ASEAN Cup ដែលជាការប្រកួតផ្លូវការរបស់ FIFA ។
លើសពីនេះទៀត ជ័យជម្នះនេះ ក៏ជាការបំបែកកំណត់ត្រាមិនដែលឈ្នះសោះលើក្រុមថៃអស់រយៈពេល១០ឆ្នាំចុងក្រោយផងដែរ ក្រោមការដឹកនាំបច្ចុប្បន្នរបស់គ្រូបង្វឹកសញ្ជាតិអង់គ្លេស លោក John Herdman។
ដូច្នេះសរុបមកវិញ សម្រាប់ពានរង្វាន់ទើបបង្កើតថ្មី FIFA ASEAN Cup លើកទី ១ ទាំង ២ កម្រិត សុទ្ធតែក្រុមម្ចាស់ផ្ទះជាឈ្នះជើងឯក។ តួយ៉ាង ក្រៅពីឥណ្ឌូណេស៊ីដែលឈ្នះជើងឯកកម្រិត ១ (៨ ប្រទេសចូលរួម) នោះ ម្ចាស់ផ្ទះហុងកុង ក៏បានឈ្នះជើងឯកកម្រិត ២ (៦ ប្រទេសចូលរួម) ផងដែរ បន្ទាប់ពីយកឈ្នះកម្ពុជា ដោយលទ្ធផល ២-០ កាលពីថ្ងៃទី៣ ខែតុលា កន្លងទៅ។
សម្រាប់ម្ចាស់ជើងឯកកម្រិត ១ ទទួលបានប្រាក់រង្វាន់ចំនួន ៦៥ ម៉ឺនដុល្លារអាមេរិក។ រីឯម្ចាស់ជើងឯកកម្រិត ២ បានប្រាក់រង្វាន់ចំនួន ៣០ ម៉ឺនដុល្លារ។ ចំណែកក្រុមនីមួយៗ ដែលបានចូលរួមទទួលបានប្រាក់ ១២៥ ០០០ ដុល្លារផងដែរ៕
ចែករំលែកព័តមាននេះ