ប្រទេសជប៉ុន ៖ ព្រឹត្តិការណ៍កីឡាអាស៊ី (Asian Games) ឆ្នាំ២០២៦ ដែលធ្វើឡើងនៅខេត្ត Aichi និងទីក្រុង Nagoya ប្រទេសជប៉ុន បានបញ្ចប់ជាស្ថានពរហើយ កាលពីថ្ងែទី៤ ខែតុលា បន្ទាប់ពីពិធីបើកប្រព្រឹត្តទៅតាំងពីថ្ងៃទី១៩ ខែកញ្ញា កន្លងទៅ។
ប្រទេសចិនបានបញ្ចប់នៅកំពូលតារាងមេដាយសរុប ហើយក៏ប្រទេសតែមួយគត់ នៅឆ្នាំនេះ ដែលឈ្នះមេដាយមាសលើសពី ១០០ គ្រឿង។ អត្តពលិកចិនបានដណ្តើមមេដាយសរុបចំនួន ៣៤១ គ្រឿង មាស ១៦៩ ប្រាក់ ៨៩ និងសំរឹទ្ធ ៨៣ គ្រឿង។ ចំណែកម្ចាស់ផ្ទះជប៉ុន បញ្ចប់នៅលេខរៀងទី ២ ឈ្នះមេដាយសរុប ២៦៩ គ្រឿង មាស ៨៣ ប្រាក់ ៩៥ និងសំរឹទ្ធ ៩១ គ្រឿង តាមពីក្រោយដោយកូរ៉េខាងត្បូង សរុប ១៥០ គ្រឿង មាស ៣៩ ប្រាក់ ៤៣ និងសំរឹទ្ធ ៦៨ គ្រឿង។
សម្រាប់តំបន់អាស៊ីអាគ្នេយ៍ ថៃបញ្ចប់ក្នុងនាមប្រទេសឈ្នះមេដាយច្រើនជាងគេ ពោលសរុប ៥២ គ្រឿង មាស ១៨ ប្រាក់ ១៣ និងសំរឹទ្ធ ២១ គ្រឿង និងតាមពីក្រោយដោយម៉ាឡេស៊ី ឈ្នះសរុប ៣២ គ្រឿង មាស ៩ ប្រាក់ ៧ និងសំរឹទ្ធ ១៦ គ្រឿង ខណៈដែលឥណ្ឌូណេស៊ី ឈ្នះសរុប ៣៩ គ្រឿង ប៉ុន្តែមាសត្រឹម ៥ គ្រឿង រីឯប្រាក់ ១១ និងសំរឹទ្ធ ២៣ គ្រឿង។
កម្ពុជាបានបញ្ចប់ទៅជាមួយមេដាយសំរឹទ្ធ ៤ គ្រឿង សម្រេចបានដោយកីឡាបាល់ទាត់លើតុ ២គ្រឿង (កីឡាការិនី ឌី គឹមយាន វិញ្ញាសាឯកត្តជន និងកីឡាការិនី យ៉ន សោភ័ណ្ឌរស្មី និង ម៉ី ស្រីមាស វិញ្ញាសាដៃគូផ្នែកនារី)។ កីឡាគុនចម្រុះ ១ គ្រឿង ដោយកីឡាការិនី ចេង ដាលីន ប្រភេទទម្ងន់ ៦០ គីឡូក្រាម និងកីឡាការ៉ាតេ ១ គ្រឿង ដោយកីឡាការិនី វ៉ាន់ ចរិយា វិញ្ញាសាប្រយុទ្ធនាទីទម្ងន់ ៦១គីឡូក្រាម។
ក្រឡេកទៅចំណាត់ថ្នាក់ចុងក្រោយគេប្រចាំតំបន់ ទីម័រខាងកើត គឺជាគណៈប្រតិភូអាស៊ីអាគ្នេយ៍តែមួយគត់ បានបញ្ចប់កីឡាអាស៊ីឆ្នាំនេះ ដោយមិនបានមេដាយទាល់តែសោះ។ ស្របពេល ប៊ូតាន ម៉ាល់ឌីវ ប៉ាឡេស្ទីន យេម៉ែន ព្រមទាំងអត្តពលិកជនភៀសខ្លួនអាស៊ី (ART) ក៏បញ្ចប់ទៅដោយមិនឈ្នះមេដាយផងដែរ។
គួរបញ្ជាក់ថា កីឡាអាស៊ីលើកទី២០ ឆ្នាំ២០២៦ បានស្វាគមន៍អត្តពលិកសរុបជាង ១១ ០០០ នាក់ មកពីប្រទេស និងតំបន់ ៤៦ មកប្រកួតប្រជែងដណ្តើមមេដាយ នៅក្នុងកម្មវិធីកីឡារហូតដល់ទៅ ៤៣ ប្រភេទ។
ដោយឡែក ព្រឹត្តិការណ៍កីឡាអាស៊ីលើកទី២១ ឆ្នាំ២០៣០ ទីក្រុងដូហា ប្រទេសកាតា គឺជាម្ចាស់ផ្ទះបន្តវេន៕
ចែករំលែកព័តមាននេះ