ប្រទេសជប៉ុន ៖ កីឡាករជប៉ុន Hojo Takumi បានក្លាយជាអត្តពលិកដំបូងគេបង្អស់ឈ្នះមេដាយមាសក្នុងព្រឹត្តិការណ៍កីឡាអាស៊ីលើកទី២០ ឆ្នាំ ២០២៦ នៅទីក្រុងអៃឈី និងខេត្តណាហ្គោយ៉ា ប្រទេសជប៉ុន លើវិញ្ញាសាទ្រីយ៉ាត្លុងឯកត្តជនបុរស នៅថ្ងៃទី២០ ខែកញ្ញា ឆ្នាំ២០២៦ ព្រមទាំងបានកៅអីទៅកាន់ការប្រកួតព្រឹត្តិការណ៍កីឡាអូឡាំពិកឆ្នាំ២០២៨ នៅទីក្រុងឡូសអ៊ែនជឺឡេស សហរដ្ឋអាមេរិកទៀតផង។
បើតាមគេហទំព័រ Olympics បានឱ្យដឹងថា កីឡាករម្ចាស់ផ្ទះវ័យ៣០ឆ្នាំរូបនេះ បានប្រើពេល ៥២ នាទី និង ៥៦ វិនាទី ដើម្បីបញ្ចប់ទី ដោយបាននាំមុខកីឡាករចិន Zhang Xirui ម្ចាស់មេដាយប្រាក់ចំនួន ៩ វិនាទី។ ចំណែកឯមេដាយសំរឹទ្ធបានទៅលើកីឡាករ Arlan Zhanabay មកពីកាហ្សាក់ស្ថាន។
ជាមួយនឹងការប្រកួតប្រវត្តិសាស្ត្រនៅកីឡាអាស៊ីលើកទី២០ Hojo Takumi ដែលបានខកខានឱកាសចូលរួមប្រកួតកីឡាអូឡាំពិក២លើកចុងក្រោយ បានថ្លែងថា «នៅពេលខ្ញុំដឹងថា នេះនឹងក្លាយជាមេដាយមាសដំបូងគេនៃព្រឹត្តិការណ៍នេះ ខ្ញុំដឹងភ្លាមថាជាឱកាសមួយ ដើម្បីលើកស្ទួយកីឡាទ្រីយ៉ាត្លុងឱ្យកាន់តែលេចធ្លោនៅក្នុងប្រទេសជប៉ុន។ សម្រាប់រូបខ្ញុំផ្ទាល់ វាពិតជាខកចិត្តខ្លាំងណាស់ដែលខកខានការប្រកួតនៅទីក្រុងតូក្យូ និងទីក្រុងប៉ារីស ហើយការប្រកួតកីឡាអាស៊ីនេះ គឺជាឱកាសដ៏អស្ចារ្យមួយក្នុងការសម្លឹងឆ្ពោះទៅមុខទៅកាន់ការប្រកួតនៅទីក្រុងឡូសអ៊ែនជឺឡេស»។
គួរបញ្ជាក់ថា ព្រឹត្តិការណ៍កីឡាអាស៊ីលើកទី២០ ដែលបើកកាលពីថ្ងៃទី១៩ ខែកញ្ញា និងគ្រោងបិទនៅថ្ងៃទី៤ ខែតុលា ឆ្នាំ២០២៦ បានទទួលស្វាគមន៍អត្តពលិកជាង ១១,០០០ នាក់ ដែលត្រូវមកប្រកួតប្រជែងដណ្តើមមេដាយមាសសរុបចំនួន ៣៦៩ គ្រឿង នៅក្នុងកម្មវិធីកីឡារហូតដល់ទៅ ៤៣ ប្រភេទ។ ចំណែកឯកម្ពុជាបានបញ្ជូនអត្តពលិកចូលរួមសរុប ១០៦នាក់ លើ ១៤ ប្រភេទកីឡា៕
ចែករំលែកព័តមាននេះ