រាជធានីភ្នំពេញ ៖ មួយរយៈចុងក្រោយនេះគេកត់សម្គាល់ឃើញថា ចំនួនស្ដ្រីចូលរួមក្នុងវិស័យកីឡាប្រដាល់គុនខ្មែរមានការកើនឡើងទាំងនៅតាមបណ្ដាក្លិបហ្វឹកហាត់ និងតាមសង្វៀនក្នុងតួនាទីជាអាជ្ញាកណ្ដាល និងចៅក្រមដែលមានសមត្ថភាពដឹកនាំទាំងការប្រកួតបុរស និងនារី ។ ទោះបីកីឡាការិនីមិនសូវមានទីផ្សារលើសង្វៀនប្រដាល់ក៏អ្នកជំនាញក៏ដូចជាថ្នាក់ដឹកនាំកីឡាមួយនេះបានលើកទឹកចិត្តឲ្យកីឡាការិនីពង្រឹងសមត្ថភាពខ្លួនឯង ដើម្បីទទួលបានឱកាសប្រកួត ដោយមិនធ្វើឲ្យអ្នករៀបចំកម្មវិធីខកចិត្ត។
ទីផ្សារការប្រកួតរបស់កីឡាការិនីគុនខ្មែរតាមបណ្ដាសង្វៀនប្រដាល់មានចំនួនតិចតួចនៅឡើយ
ហើយសង្វៀនខ្លះក៏មិនបានរៀបចំឲ្យមានគូនារីតែម្តង ។ កីឡាការិនីខ្លះ ក៏បានសំណូមពរឲ្យ
បណ្ដាស្ថានីយទូរទស្សន៍ និងសង្វៀនផ្ដល់ឱកាសឲ្យពួកគេបានប្រកួតយ៉ាងហោចណាស់១ឬ២ប្រកួត
ក្នុងមួយខែ ។ ចំណែកសហព័ន្ធកីឡាប្រដាល់គុនខ្មែរ ធ្លាប់បានចេញសេចក្ដីណែនាំឲ្យបណ្ដាកម្ម
វិធីប្រកួតរៀបចំឲ្យមានគូកីឡាការិនីផងដែរ។ប៉ុន្ដែសង្វៀនខ្លះក៏បានអនុវត្តតាមក្នុងពេលសង្វៀនខ្លះទៀតក៏មិនទាន់បានអនុវត្ត។
អ្នកជំនាញជឿជាក់ថា ចំនួនស្ដ្រីដែលហ្វឹកហាត់គុនខ្មែរអាចនឹងធ្លាក់ចុះទៅវិញ បើសិនឱកាសប្រកួតរបស់ពួកគេធ្លាក់ចុះជាងនេះ ។ ទោះបីមានការលើកឡើងថា អ្វីដែលកីឡាករអាចធ្វើបាន កីឡាការិនី ក៏អាចធ្វើបានដូចគ្នា ។ អ្វី ដែលកីឡាការិនីគុនខ្មែរត្រូវការចាំបាច់នោះគឺការផ្ដល់ឱកាសប្រកួតដូចកីឡាករ ។ ប៉ុន្តែអ្នកជំនាញបានសំណូមពរឲ្យកីឡាការិនីត្រូវតែពង្រឹងសមត្ថភាពឲ្យខ្លាំង ដើម្បីកុំឲ្យអ្នកផ្ដល់ឱកាសខកចិត្ត នៅពេលពួកគេគ្មានសមត្ថភាពគ្រប់គ្រាន់ក្នុងការចាប់យកឱកាសដែលបានផ្ដល់ឲ្យ។ កីឡាការិនីត្រូវខំប្រឹងដោយខ្លួនឯង មុននឹងទទួលបានឱកាស ។
បើគេផ្ដល់ឱកាសឲ្យហើយ យើងឲ្យឱកាសនេះរបូត គេនឹងពិបាកផ្ដល់ឱកាសឲ្យយើងទៀត នៅពេលលើកក្រោយទៀត ។
ផ្នែកមន្ដ្រីអាជ្ញាកណ្ដាល និងចៅក្រមប្រដាល់ក៏ស្ត្រីមានសមត្ថភាពធ្វើមិនចាញ់បុរសប៉ុន្មានឡើយ ព្រោះពួកគេអាចដឹកនាំការប្រកួតដូចបុរសបាន ។ ជាក់ស្ដែងស្ដ្រីដែលចូលមកហ្វឹកហាត់ធ្វើជាចៅក្រម និងអាជ្ញាកណ្ដាលក៏មានការកើនឡើង ហើយគេក៏ឃើញពីប្រសិទ្ធភាពការងាររបស់ក្រុមស្ដ្រីអាជ្ញាកណ្ដាល និងចៅក្រមទាំងនោះផងដែរ ៕
ចែករំលែកព័តមាននេះ