ទីក្រុងតេហេរ៉ង់ ៖ រដ្ឋមន្ត្រីក្រសួងកីឡា និងយុវជនអ៊ីរ៉ង់ លោក Ahmad Donyamali បានថ្លែងថា អ៊ីរ៉ង់មិនស្ថិតក្នុងស្ថានភាពគ្រប់គ្រាន់ ដើម្បីចូលរួមក្នុងព្រឹត្តិការណ៍បាល់ទាត់ពិភពលោកឆ្នាំ…
ទីក្រុងតេហេរ៉ង់ ៖ រដ្ឋមន្ត្រីក្រសួងកីឡា និងយុវជនអ៊ីរ៉ង់ លោក Ahmad Donyamali បានថ្លែងថា អ៊ីរ៉ង់មិនស្ថិតក្នុងស្ថានភាពគ្រប់គ្រាន់ ដើម្បីចូលរួមក្នុងព្រឹត្តិការណ៍បាល់ទាត់ពិភពលោកឆ្នាំ ២០២៦ (FIFA World Cup 2026) នោះទេ។ នេះបើតាមប្រភពពី BBC កាលពីថ្ងៃទី១១ ខែមីនា ឆ្នាំ២០២៦។
តាមកាលវិភាគប្រកួត World Cup 2026 ដែលសហរដ្ឋអាមេរិក កាណាដា និងម៉ិកស៊ិកធ្វើម្ចាស់ផ្ទះរួមគ្នា ចាប់ផ្តើមពីថ្ងៃទី១១ ខែមិថុនា ដល់ថ្ងៃទី១៩ ខែកក្កដានោះ អ៊ីរ៉ង់ស្ថិតក្នុងពូល G ត្រូវជួបជាមួយនូវែលសេឡង់ នៅថ្ងៃទី ១៥ ខែមិថុនា និង បែលហ្ស៊ិក នៅថ្ងៃទី២១ ខែមិថុនា ដោយការប្រកួតធ្វើឡើងនៅទីក្រុងឡូសអាន់ជឺឡេស (Los Angeles) សហរដ្ឋអាមេរិក និងជួបអេហ្ស៊ីបនៅទីក្រុងស៊ីថល (Seattle) សហរដ្ឋអាមេរិក នៅថ្ងៃទី ២៦ ខែមិថុនា។
ទោះយ៉ាងណាក៏ដោយ លទ្ធភាពនៃការចូលរួមរបស់អ៊ីរ៉ង់ស្ថិតក្នុងការសង្ស័យ ចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារលើប្រទេសនេះ ដោយសម្លាប់មេដឹកនាំកំពូល លោក អាយ៉ាតូឡា អាលី ខាមេនី (Ayatollah Ali Khamenei)។ អ៊ីរ៉ង់បានឆ្លើយតបដោយការបាញ់មីស៊ីល និងដ្រូនទៅកាន់អ៊ីស្រាអែល និងប្រទេសរួមតំបន់ដទៃទៀត ដែលមានមូលដ្ឋានទ័ពអាមេរិក។
កាលពីថ្ងៃទី១១ ខែមីនា កន្លងទៅ លោក Gianni Infantino ប្រធានសហព័ន្ធបាល់ទាត់ពិភពលោក (FIFA) បានឱ្យដឹងថា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានប្រាប់លោកថា លោកស្វាគមន៍អ៊ីរ៉ង់ក្នុងការប្រកួតប្រជែងពានរង្វាន់ World Cup 2026។ ប៉ុន្តែនៅក្នុងបទសម្ភាសន៍ជាមួយនឹងប្រព័ន្ធផ្សព្វផ្សាយរបស់សាធារណរដ្ឋអ៊ីស្លាមអ៊ីរ៉ង់ IRIB កាលពីថ្ងៃទី១០ ខែមីនា ឆ្នាំ២០២៦ លោក Donyamali បានប្រកាសថា «ដោយសាររដ្ឋាភិបាលពុករលួយនេះ (អាមេរិក) បានធ្វើឃាតមេដឹកនាំរបស់យើង ដូច្នេះទោះក្នុងកាលៈទេសៈណាក៏ដោយ យើងគញមានលក្ខខណ្ឌសមស្របដើម្បីចូលរួមក្នុងព្រឹត្តិការណ៍បាល់ទាត់ពិភពលោកនោះទេ។
កីឡាកររបស់យើងមិនមានសុវត្ថិភាពទេ ហើយលក្ខខណ្ឌសម្រាប់ការចូលរួមក៏មិនមានដែរ។ លោកបានបន្ថែមថា នៅក្នុងរយៈពេល ៨ ឬ ៩ ខែកន្លងមកនេះ សង្គ្រាម២ត្រូវបានដាក់មកលើយើង ហើយប្រជាជនយើងរាប់ពាន់នាក់ត្រូវបានសម្លាប់ និងរងទុក្ខបុកម្នេញ។ ដូច្នេះយើងពិតជាមិនមានលទ្ធភាពសម្រាប់ការចូលរួមនោះទេ»៕
ចែករំលែកព័តមាននេះ