សហរដ្ឋអាមេរិក ៖ ការប្រកួតវគ្គ៣២ក្រុមចុងក្រោយ នៃព្រឹត្តិការណ៍ World Cup ឆ្នាំ២០២៦ ដែលអ្នកគាំទ្រកំពុងតែទន្ទឹងរង់ចាំ គឺជំនួបរវាងយក្សអាមេរិកឡាទីន ប្រេស៊ីល និងយក្សអាស៊ី ជប៉ុន នៅម៉ោង ១២ រំលងអធ្រាត្រចូលថ្ងៃទី៣០ ខែមិថុនា ឆ្នាំ (ម៉ោងនៅកម្ពុជា) ដែលធ្វើឡើងនៅកីឡដ្ឋាន NRG ទឹកដីសហរដ្ឋអាមេរិក។
ចាត់ទុកជាការប្រកួតសងសឹកសម្រាប់ប្រេស៊ីល ដោយសារតែជួបគ្នាចុងក្រោយបង្អស់ កាលពីខែតុលា ឆ្នាំ២០២៥ ក្នុងជំនួបមិត្តភាព ប្រេស៊ីលនាំមុខមុនដល់ទៅ២គ្រាប់ ប៉ុន្តែជាលទ្ធផលចុងក្រោយ ជប៉ុនវាយបកយកឈ្នះវិញ ៣គ្រាប់យ៉ាងភ្ញាក់ផ្អើល។
ទាំងជប៉ុន និងប្រេស៊ីល សុទ្ធតែបានអង្រួនវគ្គចែកពូលឱ្យកក្រើក និងជក់ចិត្តដិតអារម្មណ៍យ៉ាងខ្លាំងដូចគ្នា។ ក្រុមសាំបាប្រេស៊ីល ក្រោមការដឹកនាំរបស់លោក Carlo Ancelotti បញ្ចប់នៅកំពូលតារាងពូល C មាន៧ពិន្ទុ ក្រោយស្មើម៉ារ៉ុក ១-១ ឈ្នះហៃទី ៣-០ មុនបន្តឈ្នះស្កុតឡែន ដោយលទ្ធផលដូចគ្នា។ ប្រេស៊ីល និងម៉ារ៉ុក ដឹកគ្នាឡើងទៅវគ្គ៣២ក្រុមចុងក្រោយ ខណៈស្កុតឡែនរង់ចាំអ៊ុតលទ្ធផលលេខ ៣ ល្អ។
ចំណែកក្រុមសាមូរ៉ៃខៀវជប៉ុនឯណោះវិញ ក៏មិនអន់ដែរ ក្រោយបញ្ចប់នៅលេខ ២ ពូល F មាន៥ពិន្ទុដោយស្មើ ២-២ យ៉ាងភ្ញាក់ផ្អើលជាមួយហូឡង់ មុនលត់ទុយនីស៊ី ៤-០ និងស្មើស៊ុយអែត ១-១។ នៅក្នុងពូលនេះ ហូឡង់ និងជប៉ុនដឹកដៃគ្នាឡើងវគ្គ៣២ក្រុមចុងក្រោយដោយស្វ័យប្រវត្តិ ខណៈដែលស៊ុយអែតឡើងក្នុងនាមក្រុមលេខ ៣ ល្អ ជាមួយ៤ពិន្ទុក្នុងដៃ។
គិតត្រឹមព្រឹកថ្ងៃទី២៦ ខែមិថុនា ឆ្នាំ២០២៦ (ម៉ោងនៅកម្ពុជា)
-ក្រុមឡើងទៅវគ្គ៣២ក្រុមដោយស្វ័យប្រវត្តិ រួមមាន ម្ចាស់ផ្ទះម៉ិកស៊ិក, អាហ្វ្រិកខាងត្បូង, ស្វីស, ម្ចាស់ផ្ទះកាណាដា, ប្រេស៊ីល, ម៉ារ៉ុក, ម្ចាស់ផ្ទះសហរដ្ឋអាមេរិក, អូស្ត្រាលី, អាល្លឹម៉ង់, កូតឌីវ័រ, ហូឡង់, ជប៉ុន, បារាំង, ន័រវែស, អាហ្សង់ទីន និងកូឡុំប៊ី
-ក្រុមឡើងក្នុងនាមលេខ ៣ ល្អ រួមមាន បូស្នី, អេក្វាឌ័រ និង ស៊ុយអែត
-ក្រុមអស់ឱកាសត្រឹមវគ្គចែកពូល រួមមាន សាធារណរដ្ឋឆែក, កាតា, ហៃទី, តួកគីយ៉េ, គូរ៉ាសៅ, ទុយនីស៊ី និង ហ្ស៊កដានី៕
ចែករំលែកព័តមាននេះ