សហរដ្ឋអាមេរិក ៖ ការប្រកួតដែលត្រូវបានគ្រប់គ្នាប្រសិទ្ធនាមឱ្យថា «ការប្រកួតគ្មានក្រុមណាប៉ងចង់លេង» នោះ ប៉ុន្តែបែរជាក្លាយជាការប្រកួតដ៏ជក់ចិត្ត និងមិនអាចបំភ្លេចបាននៅក្នុងប្រវត្តិសាស្ត្រព្រឹត្តិការណ៍ World Cup ទៅវិញ ដោយអង់គ្លេស និងបារាំងរួមគ្នាបង្កើតបានកំណត់ត្រាស៊ុតបញ្ចូលទីរហូតដល់១០គ្រាប់ ដែលជាការប្រកួតដណ្តើមចំណាត់ថ្នាក់លេខ ៣ មានគ្រាប់បាល់ច្រើនបំផុតមិនធ្លាប់មានពីមុនមកនៅព្រឹត្តិការណ៍បាល់ទាត់ធំបំផុតលើលោកមួយនេះ។ នេះបើតាមប្រភពពី beIN SPORTS បានចេញផ្សាយ។
ក្រុមកំណាចអង់គ្លេសបានយកឈ្នះលើក្រុមមាន់គកបារាំងជាប្រវត្តិសាស្ត្រក្នុងវគ្គដណ្តើមចំណាត់ថ្នាក់លេខ៣ នៃព្រឹត្តិការណ៍ World Cup ឆ្នាំ២០២៦ នៅកីឡដ្ឋាន Hard Rock រដ្ឋផ្លរីដា (Florida) ទឹកដីសហរដ្ឋអាមេរិក កាលពីវេលាឈានចូលព្រឹកថ្ងៃទី១៩ ខែកក្កដា (ម៉ោងនៅកម្ពុជា) ដោយលទ្ធផល ៦-៤ យ៉ាងភ្ញាក់ផ្អើល។ លើសពីនេះទៀត ការប្រកួតដ៏អស្ចារ្យនេះ ក៏បានជាប់ក្នុងបញ្ជីការប្រកួតដែលមានគ្រាប់បាល់ច្រើនជាងគេបំផុតនៅក្នុងប្រវត្តិសាស្ត្រ World Cup ផងដែរ ដោយឈរនៅលេខរៀងទី៥ សម្រាប់ការប្រកួតដែលមានគ្រាប់បាល់ស៊ុតបញ្ចូលទីច្រើនបំផុតក្នុង១ប្រកួតនៃព្រឹត្តិការណ៍នេះ។
មុននេះ ការប្រកួតដណ្តើមចំណាត់ថ្នាក់លេខ ៣ ដែលមានគ្រាប់បាល់ច្រើនបំផុតនៅក្នុងប្រវត្តិសាស្ត្រ World Cup គឺការយកឈ្នះរបស់បារាំងលើអាល្លឺម៉ង់ខាងលិចនៅក្នុងលទ្ធផល ៦-៣ (សរុប៩គ្រាប់) នៅក្នុងប្រទេសស៊ុយអែត កាលពីឆ្នាំ ១៩៥៨ ។ ដូច្នេះជ័យជម្នះ ៦-៤ របស់អង់គ្លេសបានបំបែកកំណត់ត្រានោះជាមួយនឹងគ្រាប់បាល់ ១០ គ្រាប់ ហើយក៏ក្លាយជាការប្រកួតដណ្តើមលេខ ៣ លើកដំបូងបង្អស់មានគ្រាប់បាល់ដល់ទៅពីរខ្ទង់ផងដែរ។ មិត្រឹមនតែប៉ុណ្ណោះ វាក៏ជាការប្រកួត World Cup លើកដំបូងដែលមានគ្រាប់បាល់ដល់ទៅ ១០ គ្រាប់ គិតចាប់តាំងពីហុងគ្រីបានយកឈ្នះអែលសាល់វ៉ាឌ័រដោយលទ្ធផល ១០-១ នៅប្រទេសអេស្ប៉ាញកាលពីឆ្នាំ ១៩៨២ ដែលបញ្ចប់ការរង់ចាំអស់រយៈពេល ៤៤ ឆ្នាំ សម្រាប់ផ្ទាំងទស្សនីយភាពការវាយសម្រុកដ៏ជក់ចិត្តបែបនេះ។
គួរបញ្ជាក់ថា អង់គ្លេសបញ្ចប់ព្រឹត្តិការណ៍ World Cup ឆ្នាំ២០២៦ ក្នុងនាមចំណាត់ថ្នាក់លេខ ៣ ទទួលបានមេដាយសំរឹទ្ធ ជាមួយប្រាក់រង្វាន់ ២៩ លានដុល្លារអាមេរិក ចំណែកបារាំងចំណាត់ថ្នាក់លេខ ៤ បានប្រាក់រង្វាន់ ២៧ លានដុល្លារអាមេរិក។
ការប្រកួតទាំង ១០ ដែលរកបានគ្រាប់បាល់ច្រើនជាងគេនៅក្នុងប្រវត្តិសាស្ត្រ World Cup ៖
១. អូទ្រីស ៧-៥ ស្វីស (ឆ្នាំ ១៩៥៤) សរុប ១២ គ្រាប់
២. ប្រេស៊ីល ៦-៥ ប៉ូឡូញ (ឆ្នាំ ១៩៣៨) សរុប ១១ គ្រាប់
៣. ហុងគ្រី ៨-៣ អាល្លឺម៉ង់ខាងលិច (ឆ្នាំ ១៩៥៤) សរុប ១១ គ្រាប់
៤. ហុងគ្រី ១០-១ អែលសាល់វ៉ាឌ័រ (ឆ្នាំ ១៩៨២) សរុប ១១ គ្រាប់
៥. អង់គ្លេស ៦-៤ បារាំង (ឆ្នាំ ២០២៦) សរុប ១០ គ្រាប់
៦. បារាំង ៧-៣ ប៉ារ៉ាហ្គាយ (ឆ្នាំ ១៩៥៨) សរុប ១០ គ្រាប់
៧. អាហ្សង់ទីន ៦-៣ ម៉ិកស៊ិក (ឆ្នាំ ១៩៣០) សរុប ៩ គ្រាប់
៨. ហុងគ្រី ៩-០ កូរ៉េខាងត្បូង (ឆ្នាំ ១៩៥៤) សរុប ៩ គ្រាប់
៩. អាល្លឺម៉ង់ខាងលិច ៧-២ តួកគី (ឆ្នាំ ១៩៥៤) សរុប ៩ គ្រាប់
១០. បារាំង ៦-៣ អាល្លឺម៉ង់ខាងលិច (ឆ្នាំ ១៩៨២) សរុប ៩ គ្រាប់៕
ចែករំលែកព័តមាននេះ