សហរដ្ឋអាមេរិក ៖ ជ័យជម្នះដោយលទ្ធផល ២-១ លើអង់គ្លេស រុញអាហ្សង់ទីនឱ្យឡើងទៅកាន់វគ្គផ្តាច់ព្រ័ត្រនៃព្រឹត្តិការណ៍ World Cup ឆ្នាំ ២០២៦ ហើយក៏ផ្តល់ឱកាសមាសសម្រាប់ក្រុមរបស់លោក Lionel Scaloni ដណ្តើមបានប្រាក់រង្វាន់ដ៏ច្រើនបំផុតនៅក្នុងប្រវត្តិសាស្ត្រព្រឹត្តិការណ៍បាល់ទាត់ធំបំផុតលើពិភពលោកមួយនេះផងដែរ។
បន្ទាប់ពីការវាយបកយកឈ្នះដ៏អស្ចារ្យ ២គ្រាប់វិញ នៅនាទី៨៥ និងនៅវិនាទីគ្រោះថ្នាក់ ៩០+២ ក្រោយអង់គ្លេសបើកការនាំមុខមុន១គ្រាប់តាំងពីនាទី៥៥ នៅវគ្គពាក់កណ្តាលផ្តាច់ព្រ័ត្រកាលពីវេលាឈានចូលព្រឹកថ្ងៃ១៦ ខែកក្កដា (ម៉ោងនៅកម្ពុជា) ហើយនោះ ក្រុមការពារជើងឯកអាហ្សង់ទីននឹងត្រូវតតាំងជាមួយអេស្ប៉ាញ (ទម្លាក់បារាំង ២-០) នៅវគ្គផ្តាច់ព្រ័ត្រដណ្តើមពានរង្វាន់ World Cup ឆ្នាំ២០២៦ នៅម៉ោង ២ ឈានថ្ងៃទី២០ ខែកក្កដា ខាងមុខនេះ នៅឯកីឡដ្ឋាន MetLife រដ្ឋញូវជឺស៊ី (New Jersey) ទឹកដីសហរដ្ឋអាមេរិក។
ក្រៅអំពីពានរង្វាន់មាសដ៏ល្បីល្បាញបំផុតនៅលើពិភពលោកហើយនោះ ក្រុមទាំងពីរក៏នឹងប្រជែងគ្នា ដើម្បីដណ្តើមប្រាក់រង្វាន់សរុបច្រើនបំបែកកំណត់ត្រារហូតដល់ ៥០ លានដុល្លារអាមេរិក សម្រាប់ម្ចាស់ជើងឯកផងដែរ។
សហព័ន្ធបាល់ទាត់ពិភពលោក (FIFA) បានត្រៀមកញ្ចប់ថវិកាប្រាក់រង្វាន់សរុបដល់ទៅ ៧២៧លានដុល្លារអាមេរិក សម្រាប់ World Cup ឆ្នាំ ២០២៦ ដែលកើនឡើង ៥០% បើធៀបនឹងព្រឹត្តិការណ៍ឆ្នាំ ២០២២ នៅប្រទេសកាតា ហើយនេះគឺជាការបែងចែកថវិកាដ៏ច្រើនបំផុតនៅក្នុងប្រវត្តិសាស្ត្រនៃការប្រកួតនេះ។
ចាប់តាំងពីឡើងមកដល់ការប្រកួតជុំចុងក្រោយនៃព្រឹត្តិការណ៍ World Cup ឆ្នាំ២០២៦ ដែលសហរដ្ឋអាមេរិក កាណាដា និងម៉ិកស៊ិកធ្វើម្ចាស់ផ្ទះរួមគ្នានោះ ក្រុមទាំងអស់ទទួលបាន ៩ លានដុល្លាររួចហើយ ដោយក្នុងនៅនោះប្រហែល ២ លានដុល្លារ ត្រូវបានបែងចែកសម្រាប់ការត្រៀមខ្លួនរបស់ក្រុមនីមួយៗ ហើយកាន់តែឈានទៅវគ្គបន្តបន្ទាប់ ប្រាក់រង្វាន់នឹងកាន់តែកើនឡើងច្រើនផងដែរ។
ជាក់ស្តែង ក្រុមជើងឯកនឹងទទួលបានប្រាក់រង្វាន់សរុប ៥០ លានដុល្លារ។ ក្រុមរងជើងឯកនឹងទទួលបាន ៣៣ លានដុល្លារ ក្រុមលេខ ៣ ទទួលបាន ២៩លានដុល្លារ និងក្រុមលេខ ៤ ទទួលបាន ២៧ លានដុល្លារ។ ចំណែកក្រុមធ្លាក់ត្រឹមវគ្គ ៨ ក្រុមចុងក្រោយ នឹងទទួលបាន ១៩ លានដុល្លារ, វគ្គ ១៦ ក្រុម ទទួលបាន ១៥ លានដុល្លារ, វគ្គ ៣២ ក្រុម ទទួលបាន ១១ លានដុល្លារ ហើយក្រុមដែលធ្លាក់ត្រឹមវគ្គចែកពូលទទួលបាន ៩ លានដុល្លារ។
ប្រាក់រង្វាន់នៅឆ្នាំនេះ មានចំនួនច្រើនជាងបណ្តាព្រឹត្តិការណ៍មុនៗ។ តួយ៉ាង កាលពីឆ្នាំ ២០២២ ក្រុមជើងឯកអាហ្សង់ទីនទទួលបានត្រឹមតែ ៤២ លានដុល្លារប៉ុណ្ណោះ ហើយនៅព្រឹត្តិការណ៍ឆ្នាំ ២០១៨ នៅប្រទេសរុស្ស៊ីនោះ ក្រុមជើងឯកបារាំងទទួលបានត្រឹមតែ ៣៨ លានដុល្លារប៉ុណ្ណោះ៕
គួរបញ្ជាក់ដែរថា ការប្រកួតដណ្តើមចំណាត់ថ្នាក់លេខ ៣ រវាងបារាំង និងអង់គ្លេស នឹងត្រូវធ្វើឡើងនៅម៉ោង ៤ ឈានចូលព្រឹកថ្ងៃទី១៩ ខែកក្កដា (ម៉ោងនៅកម្ពុជា)៕
ចែករំលែកព័តមាននេះ