សហរដ្ឋអាមេរិក ៖ បន្ទាប់ពីបារាំងបានចាញ់អេស្ប៉ាញដោយលទ្ធផល ០-២ ធ្លាក់ចេញពីព្រឹត្តិការណ៍ FIFA World Cup ឆ្នាំ២០២៦ ត្រឹមវគ្គពាក់កណ្តាលផ្តាច់ព្រ័ត្រហើយនោះ លោក Didier Deschamps បានបង្កឱ្យមានការភ្ញាក់ផ្អើលយ៉ាងខ្លាំង ដោយសារតែការចោទសួរអំពីសមត្ថភាពរបស់អាជ្ញាកណ្តាលកាត់សេចក្តីការប្រកួតដ៏សំខាន់។
គ្រូបង្វឹកក្រុមមាន់គកបារាំង បានប្រាប់ទូរទស្សន៍បារាំង M6 បន្ទាប់ពីចប់ការប្រកួតដ៏ខកចិត្តនៅទីក្រុងដាឡាស់ (Dallas) រដ្ឋតិចសាស់ (Texas) សហរដ្ឋអាមេរិក កាលពីវេលាឈានចូលព្រឹកថ្ងៃទី១៥ ខែកក្កដា ឆ្នាំ២០២៦ (ម៉ោងនៅកម្ពុជា) ដូច្នេះថា «ពួកយើងខកចិត្តយ៉ាងខ្លាំង។ កីឡាករទាំងអស់កំពុងខូចចិត្តខ្លាំង ដោយសារពួកគេមានមហិច្ឆតាខ្ពស់ណាស់។ ប៉ុន្តែយើងក៏ត្រូវតែទទួលយកការពិត និងទទួលស្គាល់ថា ថ្ងៃនេះយើងមានបច្ចេកទេសខ្សោយជាងគូប្រកួត ក្នុងការលេងទល់នឹងក្រុមដែលគ្រប់គ្រងការប្រកួតបានយ៉ាងល្អ។ មុនដំបូងបង្អស់ វាគឺជាកំហុសរបស់យើងផ្ទាល់។ ខ្ញុំមិនចង់បន្ទោសនរណាម្នាក់ឡើយ»។
ទោះយ៉ាងណាក៏ដោយ គ្រូបង្វឹកជនជាតិបារាំងវ័យ៥៧ឆ្នាំរូបនេះ នៅតែចោទជាសំណួរទៅកាន់ក្រុមអាជ្ញាកណ្តាល ដោយលោកបាននិយាយថា «ខ្ញុំមានសំណួរមួយ ប៉ុន្តែខ្ញុំនឹងមិនឆ្លើយវាដោយខ្លួនឯងទេ។ តើអាជ្ញាកណ្តាលរូបនេះមានសមត្ថភាពគ្រប់គ្រាន់ក្នុងការកាត់សេចក្តីការប្រកួតវគ្គពាក់កណ្តាលផ្តាច់ព្រ័ត្រ World Cup ដែរឬទេ? ខ្ញុំមិនមែននិយាយបែបនេះដោយសារតែយើងចាញ់នោះទេ ប៉ុន្តែមានស្ថានភាពជាច្រើនដែលមិនអំណោយផលដល់យើងទាល់តែសោះ»។
ការរិះគន់របស់លោក Deschamps ត្រូវបានគេមើលឃើញថា ទំនងជាកើតចេញពីការរបូតគ្រាប់បាល់ទី១ នៅពេលដែលអាជ្ញាកណ្តាលជនជាតិអែលសាល់វ៉ាឌ័រ លោក Ivan Barton បានផ្តល់បាល់ពិន័យប៉េណាល់ទីឱ្យអេស្ប៉ាញ បន្ទាប់ពីខ្សែការពារឆ្វេង Lucas Digne បានទាត់ជើងកីឡាករ Lamine Yamal ក្នុងប្រអប់គ្រោះថ្នាក់ ហើយខ្សែប្រយុទ្ធ Mikel Oyarzabal ជាអ្នកសម្រេចគ្រាប់បាល់នោះនៅនាទី២២ ដើម្បីបើកការនាំមុខ។ ដ្បិតគ្រាប់បាល់ទី២ សម្រេចបានដោយខ្សែការពារ Pedro Porro នៅនាទី៥៨។
នៅពេលថ្លែងទៅកាន់ទូរទស្សន៍ beIN Sports បន្ទាប់ពីការប្រកួត លោក Deschamps បានបន្តលើកឡើងអំពីបញ្ហាអាជ្ញាកណ្តាល ប៉ុន្តែប្រើសម្តីប្រុងប្រយ័ត្ន និងថ្លឹងថ្លែងជាងមុនលោកបានចែករំលែកថា «ប្រសិនបើខ្ញុំនិយាយច្រើនជាងនេះ អ្នកគ្រប់គ្នានឹងថា ខ្ញុំគ្រាន់តែជាអ្នករអ៊ូរទាំដោយសារការចាញ់តែប៉ុណ្ណោះ។ វាមិនមែនមានតែរឿងប៉េណាល់ទីនោះទេ ប៉ុន្តែមានស្ថានភាពជាច្រើនទៀតដែលបានបូកបញ្ចូលគ្នា។ ខ្ញុំគ្មានគំនិតមិនល្អចំពោះអាជ្ញាកណ្តាលនៅយប់នេះទេ ប៉ុន្តែអ្នកគួរតែសួរខ្លួនឯងនូវសំណួរមួយចំនួន»។
លោកអាជ្ញាកណ្តាល Barton ដែលបានកាត់សេចក្តី ៤ ប្រកួតរួចហើយក្នុងព្រឹត្តិការណ៍ World Cup ឆ្នាំ ២០២៦ នោះ ក្រៅពីបាល់ពិន័យប៉េណាល់ទីដ៏ចម្រូងចម្រាសហើយនោះ លោកក៏ត្រូវបានគេមើលឃើញពីការសម្រេចចិត្តមិនផ្តល់កាតលឿងដល់ Yamal ចំពោះការបង្កកំហុសដេញទាក់ជើងខ្សែប្រយុទ្ធ Kylian Mbappe ពីក្រោយ នៅនាទី ៧៦ ផងដែរ។
ទោះយ៉ាងណាក៏ដោយ ការប្រកួតបានបញ្ចប់ទៅដោយជោគជ័យ ហើយអេស្ប៉ាញគឺជាក្រុមបន្តឡើងទៅវគ្គផ្តាច់ព្រ័ត្រនៃព្រឹត្តិការណ៍ World Cup ឆ្នាំ២០២៦ និងជាលើកទី២របស់ខ្លួន ចាប់តាំងពីការឈ្នះជើងឯកក្នុងឆ្នាំ ២០១០។ ចំណែកបារាំងនៅក្នុងនាមក្រុមជើងឯក២សម័យកាល (១៩៩៨ និង ២០១៨) ទោះជាអស់ឱកាសត្រឹមនេះ ប៉ុន្តែពួកគេក៏មិនទាន់ត្រឡប់ទៅផ្ទះវិញនោះទេ ដោយត្រូវបន្តប្រកួតដណ្តើមចំណាត់ថា្នក់លេខ ៣៕ ប្រភព ៖ ESPN, VnExpress និងប្រភពផ្សេងទៀត
ចែករំលែកព័តមាននេះ