សហរដ្ឋអាមេរិក ៖ អ្នកនយោបាយអង់គ្លេស និងអ្នកគាំទ្រមួយចំនួនបានស្នើឱ្យសហព័ន្ធបាល់ទាត់ពិភពលោក (FIFA) ចាត់វិធានការពិន័យលើកីឡាករក្រុមជម្រើសជាតិអាហ្សង់ទីនមួយចំនួន មុនការប្រកួតវគ្គផ្តាច់ព្រ័ត្រព្រឹត្តិការណ៍ World Cup ឆ្នាំ២០២៦ នៅវេលាឈានចូលព្រឹកថ្ងៃទី២០ ខែកក្កដា (ម៉ោងនៅកម្ពុជា) ចូលមកដល់ ជុំវិញការលើកបដាពាក់ព័ន្ធនយោបាយ ក្រោយចប់ការប្រកួតវគ្គពាក់កណ្តាលផ្តាច់ព្រ័ត្ររបស់ពួកគេ។ នេះបើតាមប្រភពពី The Guardian, Yahoo Sport, GiveMeSport និងប្រភពផ្សេងទៀតបានចេញផ្សាយ។
ក្រុមពពកសអាហ្សង់ទីនបានតស៊ូឡើងដល់វគ្គផ្តាច់ព្រ័ត្រ បន្ទាប់ពីបានវាយបកយកឈ្នះក្រុមតោកំណាត់អង់គ្លេសនៅចុងម៉ោង ដោយលទ្ធផល ២-១ នៅវគ្គពាក់កណ្តាលផ្តាច់ព្រ័ត្រ កាលពីព្រឹកថ្ងៃទី១៦ ខែកក្កដា (ម៉ោងនៅកម្ពុជា) នោះគឺជាជ័យជម្នះដ៏ស្វិតស្វាញមួយនៅលើទីលាន ប៉ុន្តែរឿងទាំងនោះមិនអាចប្រៀបធៀបនឹងបញ្ហាដែលបានកើតឡើងនៅក្រៅទីលានឡើយ។
ជាក់ស្តែង ក្រោយកញ្ចែបញ្ចប់ការប្រកួតបន្លឺឡើង កីឡាករអាហ្សង់ទីនមួយចំនួនបាននាំគ្នាអបអរសាទរដោយដៃកាន់បដាមានខ្លឹមសារជាភាសាអេស្ប៉ាញថា «Las Malvinas son Argentinas» ដែលប្រែថា «កោះម៉ាល់វីណាស (ភាសាអេស្ប៉ាញ) ឬកោះហ្វកឡែន (Falkland Islands) គឺជារបស់អាហ្សង់ទីន»។ បន្ទាប់ពីបដាអបអរត្រូវបានលើកបង្ហាញ អ្នកគាំទ្រ និងអ្នករាយការណ៍ព័ត៌មានជាច្រើនបានចង្អុលបង្ហាញថា ទង្វើនេះគឺផ្ទុយដោយផ្ទាល់ទៅនឹងច្បាប់របស់ FIFA ពាក់ព័ន្ធនយោបាយដែលត្រូវបានមហាឃាត់នៅក្នុងកីឡាបាល់ទាត់។
ការលើកបដានេះ កើតឡើងចំពេលកោះហ្វកឡែន ដែលជាដែនដីក្រៅប្រទេសរបស់ចក្រភពអង់គ្លេសស្ថិតនៅភាគនិរតីនៃមហាសមុទ្រអាត្លង់ទិក នៅតែជាប្រធានបទនៃជម្លោះអធិបតេយ្យភាពរវាងអង់គ្លេស និងអាហ្សង់ទីន។ ប្រទេសទាំងពីរធ្លាប់បានធ្វើសង្គ្រាមលើប្រជុំកោះនេះ ដែលមានចម្ងាយជាង ៤៨០គីឡូម៉ែត្រពីឆ្នេរសមុទ្រខាងកើតរបស់ប្រទេសអាហ្សង់ទីន ចាប់ពីខែមេសា ដល់ខែមិថុនា ឆ្នាំ១៩៨២។ ជម្លោះរយៈពេល ៧៤ ថ្ងៃនោះ បានបណ្តាលឱ្យទាហានអាហ្សង់ទីន ៦៥៥ នាក់ និងទាហានអង់គ្លេស ២៥៥ នាក់ រួមទាំងប្រជាជនលើកោះចំនួន ៣ នាក់ បានស្លាប់បាត់បង់ជីវិតផងដែរ។
បដានោះបានរំលោភផ្ទាល់លើច្បាប់ទី ៤ នៃការប្រកួតរបស់ IFAB ដែលជាអង្គភាពអន្តរជាតិឯករាជ្យមួយ ដែលមានតួនាទីតែមួយគត់ក្នុងការកំណត់ កែប្រែ និងថែរក្សាច្បាប់នៃការប្រកួតបាល់ទាត់ដែលបានចែងយ៉ាងច្បាស់ៗថា កីឡាករមិនអាចប្រើប្រាស់ ឬបង្ហាញសម្ភារៈណាមួយមានសារនយោបាយឡើយ។
សកម្មភាពនេះក៏ត្រូវបានហាមឃាត់ផងដែរដោយក្រមវិន័យរបស់ FIFA ដែលបានហាមប្រើប្រាស់កាយវិការ ពាក្យសម្តី វត្ថុ ឬមធ្យោបាយផ្សេងទៀត ដើម្បីបញ្ជូនសាមិនសមរម្យសម្រាប់ព្រឹត្តិការណ៍កីឡា។ ស្របពេលក្រមសីលធម៌ក្នុងកីឡដ្ឋានរបស់ FIFA សម្រាប់ព្រឹត្តិការណ៍ World Cup 2026 ក៏ហាមឃាត់ផងដែរនូវបដា ទង់ជាតិ ខិត្តប័ណ្ណ សម្លៀកបំពាក់ និងសម្ភារៈផ្សេងៗទៀតមានលក្ខណៈនយោបាយផងដែរ ហើយច្បាប់នេះ អនុវត្តយ៉ាងចម្បងចំពោះអ្នកគាំទ្រ។
កាលពីឆ្នាំ២០១៤ FIFA ធ្លាប់បានផាកពិន័យសហព័ន្ធបាល់ទាត់អាហ្សង់ទីនជាទឹកប្រាក់ ២ ម៉ឺនផោន (ជាង ២៧ ០០០ដុល្លារអាមេរិក) បន្ទាប់ពីកីឡាករពួកគេបានកាន់បដាដែលមានសារដូចគ្នានេះ មុនការប្រកួតមិត្តភាពជាមួយស្លូវេនី។ FIFA បញ្ជាក់ថា សកម្មភាពនោះបានល្មើសនឹងច្បាប់ស្តីពីសកម្មភាពនយោបាយ និងការប្រព្រឹត្តមិនសមរម្យ។
ជុំវិញបញ្ហានេះ យោងតាមសេចក្តីថ្លែងការណ៍របស់ការិយាល័យនាយករដ្ឋមន្ត្រីចក្រភពអង់គ្លេសបានឱ្យដឹងថា លោកនាយករដ្ឋមន្ត្រី Keir Starmer ក៏បានគាំទ្រគំនិតដែលថា FIFA គួរតែស៊ើបអង្កេតកីឡាករអាហ្សង់ទីន ដែលបានបង្ហាញបដាទាមទារអធិបតេយ្យភាពកោះហ្វកឡែនផងដែរ។ លោក Starmer ដែលបានទស្សនាការប្រកួតនេះ អំឡុងពេលធ្វើដំណើរតាមរថភ្លើងទៅកាន់ប្រទេសអ៊ុយក្រែន បានគាំទ្រអេស្ប៉ាញក្នុងការប្រកួតវគ្គផ្តាច់ព្រ័ត្រ ហើយចក្រភពអង់គ្លេសបានបញ្ជាក់ជាថ្មីថា ប្រជុំកោះហ្វកឡែន គឺជារបស់ខ្លួនដាច់ខាត បន្ទាប់ពីមានជម្លោះរឿងបដានយោបាយនៅក្នុងព្រឹត្តិការណ៍ World Cup 2026៕
ចែករំលែកព័តមាននេះ