សហរដ្ឋអាមេរិក ៖ ការប្រកួតព្រឹត្តិការណ៍ FIFA World Cup ឆ្នាំ២០២៦ ដែលសហរដ្ឋអាមេរិក កាណាដា និងម៉ិកស៊ិកធ្វើជាម្ចាស់ផ្ទះរួមគ្នា បានចប់សព្វគ្រប់កាលពីវេលាឈានចូលព្រឹកថ្ងៃទី២០ ខែកក្កដា (ម៉ោងនៅកម្ពុជា) ដោយអេស្ប៉ាញគឺជាម្ចាស់ជើងឯកនៅក្នុងចំណោម ៤៨ ក្រុមដែលចូលរួម ខណៈដែលអាហ្សង់ទីនបរាជ័យការពារតំណែងជើងឯក និងបញ្ចប់ជាមួយស្ថិតិដ៏អាក្រក់មិនធ្លាប់មានមួយក្នុងប្រវត្តិសាស្ត្រព្រឹត្តិការណ៍បាល់ទាត់ធំបំផុតលើពិភពលោកនេះ។
ខ្សែប្រយុទ្ធ Ferran Torres ក្លាយជាតួឯកក្នុងការប្រកួតវគ្គផ្តាច់ព្រ័ត្រដ៏អស្ចារ្យនេះ នៅឯកីឡដ្ឋាន MetLife ទឹកដីសហរដ្ឋអាមេរិក ដោយសម្រេចបានគ្រាប់បាល់បញ្ចូលទីនៅនាទី ១០៦ នៅក្នុងម៉ោងបន្ថែម ១៥ នាទី ២ ដង ដើម្បីជួយក្រុមគោជល់អេស្ប៉ាញយកឈ្នះក្រុមពពកសអាហ្សង់ទីនដែលនៅសល់គ្នាត្រឹមតែ ១០ នាក់ ក្រោយខ្សែបម្រើ Enzo Fernandez បង្កកំហុសទទួលបានកាតលឿង ២ ដង ស្មើនឹងកាតក្រហមនៅនាទី៩០+៣នោះ ដោយលទ្ធផល ១-០ ដើម្បីគ្រងជើងឯក World Cup ឆ្នាំ២០២៦ និងជាលើកទី ២ នៅក្នុងប្រវត្តិសាស្ត្រ។
អេស្ប៉ាញបង្កើតភាពភ្ញាក់ផ្អើល ដោយគ្រប់គ្រងបាល់រហូតដល់ ៦៥% និងដាក់សម្ពាធលើអាហ្សង់ទីនស្ទើរតែពេញមួយការប្រកួតទៅហើយ។ ក្រុមរបស់លោកគ្រូបង្វឹក Luis De la Fuente មានឱកាសស៊ុតចំគោលដៅដល់ទៅ ២០ ដង ចំណែកអាហ្សង់ទីនធ្វើបានត្រឹមតែ ២ ដងប៉ុណ្ណោះ ហើយបានកើតឡើងនៅចុងម៉ោងបន្ថែម ១៥នាទី ២ ដងថែមទៀត។ ប្រសិនបើគ្មានទម្រង់លេងលេចធ្លោរបស់អ្នកចាំទី Emiliano Martinez ដែលសង្គ្រោះបាល់យ៉ាងអស្ចារ្យ ១១ ដងទេនោះ ម្ល៉េះអេស្ប៉ាញប្រហែលជាអបអរជ័យជម្នះក្នុងម៉ោងប្រកួត៩០នាទីបាត់ទៅហើយ ដោយមិនចាំបាច់រង់ចាំរហូតដល់ទម្លុះសំណាញ់ទីអាហ្សង់ទីននៅនាទី ១០៦ នោះទេ។
ជំនួបរវាងក្រុមខ្លាំងទាំងពីរ ក៏បញ្ចប់ទៅនៅក្នុងរូបភាពប៉ះទង្គិចគ្នា ក្រោយអាជ្ញាកណ្តាលផ្លុំកញ្ចែបញ្ចប់ការប្រកួត។ កីឡាករអាហ្សង់ទីនមួយចំនួនក៏បានបន្សល់ទុករូបភាពដ៏ចម្រូងចម្រាស ជាមួយអាកប្បកិរិយាមិនល្អមួយចំនួន បន្ទាប់ពីបរាជ័យ។ តួយ៉ាង ខ្សែការពារ Nahuel Molina បានប៉ះទង្គិចគ្នាជាមួយ Rodri ហើយខ្សែបម្រើ Leandro Paredes ថែមទាំងទទួលបានកាតក្រហមទៀតផង ក្រោយដាល់កីឡាករអេស្ប៉ាញមួយចំនួន ភ្លាមៗបន្ទាប់ពីការប្រកួតបានបញ្ចប់។
អាហ្សង់ទីនបានបិទបញ្ចប់ព្រឹត្តិការណ៍ World Cup ឆ្នាំ២០២៦ នៅក្នុងនាមក្រុមរងជើងឯក ជាមួយនឹងស្ថិតិដ៏អាក្រក់មិនធ្លាប់មានពីមុនមក ដោយក្លាយជាក្រុមដំបូងគេបង្អស់ក្នុងប្រវត្តិសាស្ត្រវគ្គផ្តាច់ព្រ័ត្រ World Cup ដែលមិនអាចបង្កើតឱកាសស៊ុតចំគោលដៅសូម្បីតែម្តង នៅក្នុងម៉ោងប្រកួតផ្លូវការ៩០នាទី៕
ចែករំលែកព័តមាននេះ