សហរដ្ឋអាមេរិក ៖ តាមការបញ្ជាក់របស់លេខាធិការសារព័ត៌មានសេតវិមាន លោកស្រី Karoline Leavitt នៅក្នុងសន្និសីទសារព័ត៌មានកាលពីថ្ងៃទី១៦ ខែកក្កដា ឆ្នាំ២០២៦ (ម៉ោងនៅសហរដ្ឋអាមេរិក) បានឱ្យដឹងថា ប្រធានាធិបតីអាមេរិក លោក ដូណាល់ ត្រាំ នឹងចូលរួមទស្សនាការប្រកួតវគ្គផ្តាច់ព្រ័ត្រ ព្រឹត្តិការណ៍ World Cup ឆ្នាំ២០២៦ ហើយវត្តមានលោកក៏ចូលរួមក្នុងពិធីប្រគល់ពានរង្វាន់ ក្រោយបញ្ចប់ការប្រកួតផងដែរ។ នេះបើយោងតាមប្រភពពី The New York Times, Forbes និង Reuters បានចេញផ្សាយនៅថ្ងៃទី១៧ ខែកក្កដា។
មុនចូលរួមការប្រកួតវគ្គផ្តាច់ព្រ័ត្រ នៅវេលាម៉ោង ២ ឈានចូលព្រឹកថ្ងៃទី២០ ខែកក្កដា (ម៉ោងនៅកម្ពុជា) រវាងក្រុមគោជល់អេស្ប៉ាញ និងក្រុមការពារជើងឯកអាហ្សងទីននោះ លោក ត្រាំ នឹងជួបជាមួយមន្ត្រីពីសហព័ន្ធបាល់ទាត់ពិភពលោក នៅឯអគារពាណិជ្ជកម្មរបស់លោក Trump Tower ផងដែរ។
ការចូលរួមរបស់ប្រធានាធិបតីអាមេរិក ត្រូវបានធ្វើឡើងចំពេលដែលព្រឹត្តិការណ៍នេះ ត្រូវបានសហការរៀបចំដោយសហរដ្ឋអាមេរិក កាណាដា និងម៉ិកស៊ិក ដែលលោក ត្រាំ បានចាត់ទុកព្រឹត្តិការណ៍នេះជានិមិត្តរូបដ៏សំខាន់សម្រាប់អាណត្តិដឹកនាំរបស់លោក ក៏ដូចជាអបអរសាទរខួបលើកទី ២៥០ នៃទិវាបុណ្យឯករាជ្យសហរដ្ឋអាមេរិកផងដែរ។
បើតាមលោកស្រី Leavitt បានថ្លែងថា លោកប្រធានាធិបតី ត្រាំ នឹងធ្វើដំណើរទៅទីក្រុងញូវយ៉ក (New York) នៅថ្ងៃសុក្រ (ម៉ោងក្នុងស្រុក) ដើម្បីចូលរួមកម្មវិធីទទួលស្វាគមន៍របស់មន្ត្រី FIFA នៅ Trump Tower បន្ទាប់មកលោកនឹងមានវត្តមាននៅក្នុងការប្រកួតនៅថ្ងៃអាទិត្យ (ម៉ោងក្នុងស្រុក) នៅកីឡដ្ឋាន MetLife ក្នុងទីក្រុងអ៊ីស រ៉ាដឺហ្វត (East Rutherford) រដ្ឋញូវជើស៊ី (New Jersey)។
លោកស្រីមិនបានបញ្ជាក់ច្បាស់ថា លោក ត្រាំ នឹងជាអ្នកប្រគល់ពាននោះទេ ប៉ុន្តែលោកត្រូវបានគេរំពឹងថាជាមនុស្សដ៏សំខាន់ដែលនឹងធ្វើបែបនោះ។ ស្របពេលដែលប្រធាន FIFA លោក Gianni Infantino កាលពីខែមុនធ្លាប់ប្រកាសហើយថា លោក និងលោក ត្រាំ នឹងរីករាយទស្សនាការប្រកួតវគ្គផ្តាច់ព្រ័ត្រ ហើយនឹងប្រគល់ពានរង្វាន់ទៅឱ្យអ្នកឈ្នះជាមួយគ្នាជាមិនខាន។
កាលវិភាគប្រកួតចុងក្រោយព្រឹត្តិការណ៍ World Cup ឆ្នាំ២០២៦ (ម៉ោងនៅកម្ពុជា) ៖
-បារាំង ប៉ះ អង់គ្លេស (ដណ្តើមចំណាត់ថ្នាក់លេខ៣) នៅម៉ោង ៤ ឈានចូលព្រឹកថ្ងៃទី១៩ ខែកក្កដា នៅឯកីឡដ្ឋាន Hard Rock រដ្ឋផ្លរីដា (Florida)
-អេស្ប៉ាញ ប៉ះ អាហ្សង់ទីន (ដណ្តើមជើងឯក) នៅម៉ោង ២ ឈានចូលព្រឹកថ្ងៃទី២០ ខែកក្កដា នៅកីឡដ្ឋាន MetLife៕
ចែករំលែកព័តមាននេះ