ប្រទេសហ្វីលីពីន ៖ ក្រុមបាល់ទះបុរសជម្រើសជាតិកម្ពុជា បានបង្កើតប្រវត្តិសាស្ត្រថ្មីដ៏អស្ចារ្យ ដោយបានបំបាក់ក្រុមបាល់ទះបុរសថៃ ក្នុងលទ្ធផល ៣ ទល់នឹង ១ សិត ក្នុងវគ្គពាក់កណ្តាលផ្តាច់ព្រ័ត្រ កាលពីថ្ងៃទី១៨ កក្កដា ។ ជ័យជម្នះនេះ បានធ្វើឱ្យក្រុមស្មាត់
កម្ពុជា ដណ្តើមបានកៅអីឡើងទៅកាន់វគ្គផ្តាច់ព្រ័ត្រ នៃពានរង្វាន់ជើងឯកអាស៊ីអាគ្នេយ៍ 6th SEA V-Cup 2026 (ជើងទី១) ដែលប្រព្រឹត្តទៅនៅទីក្រុង Candon ប្រទេសហ្វីលីពីន។
ចាប់ផ្តើមការប្រកួតវគ្គពាក់កណ្ដាលផ្ដាច់ព្រ័ត្រជាមួយថៃ ក្រុមកម្ពុជា ធ្វើបានយ៉ាងល្អដោយឈ្នះពិន្ទុ ២៥-២១ ខណៈសិតទី២ ថៃ បានយកឈ្នះវិញដោយពិន្ទុ ១៦-២៥ ប៉ុន្តែសម្រាប់សិតទី៣ និងទី៤ កម្ពុជា បានយកឈ្នះដោយពិន្ទុ ២៥-២៣ និង ២៥-២៧។
នេះជាលើកទី១នៅក្នុងប្រវត្តិសាស្ត្របាល់ទះកម្ពុជាដែលក្រុមជម្រើសជាតិកម្ពុជាបានយកឈ្នះថៃដោយលទ្ធផល ៣-១សិត ។ កម្ពុជាធ្លាប់ឈ្នះថៃពីរលើកក្នុងព្រឹត្តិការណ៍កីឡាស៊ីហ្គេមដែលកាលលើកទី១ ឆ្នាំ២០២១ ឈ្នះដោយលទ្ធផល ៣-២ នៅប្រទេសវៀតណាម និងលើកទី២ ឈ្នះដោយលទ្ធផល ៣-២ នៅប្រទេសកម្ពុជា ឆ្នាំ២០២៣។
វគ្គសំខាន់ៗបែបនេះ កម្ពុជា ធ្លាប់ឈ្នះ ថៃ៣លើកហើយគឺលើកទី១ ឈ្នះ ថៃ នៅវគ្គដណ្តើមមេដាយសំរឹទ្ធក្នុងព្រឹត្តិការណ៍កីឡាស៊ីហ្គេម ឆ្នាំ២០២១, លើកទី២ កម្ពុជា ឈ្នះ ថៃ វគ្គពាក់កណ្តាលផ្តាច់ព្រ័ត្រកីឡាស៊ីហ្គេម ឆ្នាំ២០២៣ និងចុងក្រោយនេះ ឈ្នះ ថៃ វគ្គពាក់កណ្តាលផ្តាច់ព្រ័ត្រ ពាន SEA V. League 2026។
សម្រាប់ជ័យជម្នះ ៣-១ ដើម្បីទម្លាក់ថៃនៅវគ្គពាក់កណ្តាលផ្តាច់ព្រ័ត្រនេះ កម្ពុជាបានឡើងទៅកាន់វគ្គផ្តាច់ព្រ័ត្រ ពានរង្វាន់ SEA V. League ឆ្នាំ ២០២៦ ដោយត្រូវជួបឥណ្ឌូណេស៊ី នៅថ្ងៃអាទិត្យ ទី១៩ កក្កដា វេលាម៉ោង៤ និង៣០នាទីល្ងាច(ម៉ោងនៅកម្ពុជា)។
ការប្រកួតដ៏ជក់ចិត្តនេះនឹងត្រូវរៀបចំឡើងនៅមជ្ឈមណ្ឌលកីឡា Candon City Arena ក្នុងប្រទេសហ្វីលីពីន។
ចំណែកកាលវិភាគប្រកួតវគ្គផ្ដាច់ព្រ័ត្រនៅថ្ងៃទី១៩ ខែកក្កដា ឆ្នាំ២០២៦ មានដូចខាងក្រោម៖
ថៃ ប៉ះ វៀតណាម ដណ្ដើមមេដាយសំរឹទ្ធ
(ចំណាត់ថ្នាក់លេខ៣) វេលាម៉ោង១រសៀល ។
កម្ពុជា ប៉ះឥណ្ឌូណេសុី ដណ្ដើមមេដាយមាស (ជើងឯក) វេលាម៉ោង ៤និង៣០ល្ងាច (ម៉ោង
នៅកម្ពុជា) ៕
ចែករំលែកព័តមាននេះ