ប្រទេសព័រទុយហ្គាល់ ៖ បើតាមប្រភពពីកាសែត The Sun កាលពីថ្ងៃទី២ ខែសីហា ឆ្នាំ២០២៦ ស្រង់សេចក្តីរាយការណ៍ពីព័រទុយហ្គាល់ បានឱ្យដឹងថា កីឡាករបាល់ទាត់ឆ្នើម Cristiano Ronaldo និងគូដណ្តឹង កញ្ញា Georgina Rodriguez ត្រៀមរៀបចំពិធីមង្គលការដ៏ឱឡារិក នៅថ្ងៃសៅរ៍ ទី៨ ខែសីហា ឆ្នាំ២០២៦ ខាងមុខនេះ លើកោះ Madeira ប្រទេសព័រទុយហ្គាល់ ដែលជាកន្លែងកំណើត និងជាកន្លែងដែលកីឡាករឆ្នើមរូបនេះបានធំធាត់ឡើង។
ខ្សែប្រយុទ្ធឆ្នើមក្រុមជម្រើសព័រទុយហ្គាល់ និងក្លិប Al Nassr វ័យ៤១ឆ្នាំ ដែលធំធាត់នៅទីក្រុង Funchal កោះ Madeira និងមិត្តស្រីជាតារាម៉ូដែល Georgina វ័យ៣២ឆ្នាំ ត្រូវបានប្រព័ន្ធផ្សព្វផ្សាយក្នុងស្រុករាយការណ៍ថាបានកក់សណ្ឋាគារផ្កាយប្រាំឈ្មោះ Savoy Palace នៅកោះនោះ សម្រាប់កម្មវិធីជប់លៀងមានការទទួលភ្ញៀវ។ ប្រភពមួយបានឱ្យដឹងថា ភ្ញៀវនៅសណ្ឋាគារត្រូវបានគេជូនដំណឹងថា ជាន់ចំនួន ២ នៅសណ្ឋាគារ នឹងត្រូវបិទនៅថ្ងៃសុក្រ និងថ្ងៃសៅរ៍ រួមទាំងតំបន់បារផងដែរ។
គួរបញ្ជាក់ថា កីឡាករ Cristiano Ronaldo ដែលបច្ចុប្បន្នកំពុងប្រកបអាជីពនៅប្រទេសអារ៉ាប៊ីសាអូឌីត បានជួបជាមួយ Georgina Rodriguez ជាកូនកាត់អេស្ប៉ាញ-អាហ្សង់ទីន លើកដំបូងក្នុងឆ្នាំ ២០១៦ ហើយបានសុំនាងរៀបការ កាលពីខែសីហា ឆ្នាំមុន។
កាលពីសប្តាហ៍មុន គូស្នេហ៍១គូនេះ ត្រូវបានគេថតជាប់ដៃពាក់ចិញ្ចៀនពេជ្រ ពេលពួកគេឡើងលើនាវាកម្សាន្តឯកជនមួយ នៅកោះ Mallorca ប្រទេសអេស្ប៉ាញ។ កន្លងមក Ronaldo ធ្លាប់បាននិយាយថា ខ្លួន និងគូដណ្តឹងមានគម្រោងរៀបការ បន្ទាប់ពីចប់ភារកិច្ចការប្រកួត World Cup ឆ្នាំ២០២៦ ដែលជាលទ្ធផលព័រទុយហ្គាល់ធ្លាក់ត្រឹមវគ្គ១៦ក្រុមចុងក្រោយ ក្រោយថ្វីជើងអេស្ប៉ាញ ដែលជាម្ចាស់ជើងឯក កាលពីខែមុន។
ទោះជាយ៉ាងណាក៏ដោយ ព័ត៌មានថ្មីៗអំពីកាលបរិច្ឆេទនៃពិធីរៀបអាពាហ៍ពិពាហ៍របស់ Ronaldo និង Georgina គឺផ្អែកទៅលើការចុះផ្សាយរបស់ប្រព័ន្ធផ្សព្វផ្សាយអន្តរជាតិជាច្រើន និងការលេចធ្លាយព័ត៌មានពីសណ្ឋាគារតែប៉ុណ្ណោះ ខណៈដែលសាមីខ្លួនទាំងពីរមិនទាន់បានចេញមុខប្រកាសជាផ្លូវការនៅឡើយទេ៕
ចែករំលែកព័តមាននេះ