ប្រធានសហព័ន្ធកីឡាប្រដាល់គុនខ្មែរប្រាប់មូលហេតុដែលនាំឱ្យកើតមានហេតុការណ៍ប្រទូស្តរ៉ាយគ្នានៅក្រៅសង្វៀនប្រទេសអូស្ត្រាលី
- ភ្នំពេញ
រាជធានីភ្នំពេញ ៖ ហេតុការណ៍ប្រទូស្តរ៉ាយគ្នានៅក្រៅសង្វៀនប្រទេសអូស្ត្រាលី បានកើតឡើងក្នុងព្រឹត្តិការណ៍ប្រកួតគុនខ្មែរអន្តរជាតិមួយដែលមានឈ្មោះថា Cambodia Kun Khmer Best of the Best នៅទីក្រុងស៊ីដនី កាលពីថ្ងៃទី១៧ កក្កដា ។
ជម្លោះនេះបង្កឡើងដោយភាគីកីឡាករថៃ ដែលមិនចុះសម្រុងគ្នានៅលើសង្វៀន ។ ជម្លោះបានផ្ទុះឡើងក្រោយពេលដែលភាគីខាងកីឡាករថៃមិនព្រមទទួលស្គាល់លទ្ធផល និងមានការតវ៉ា។ ស្ថានការណ៍បានឈានដល់ការរុញច្រានគ្នារវាងក្រុមអ្នកគាំទ្រ ហើយបក្ខពួករបស់កីឡាករថៃបានបើកការវាយតប់ជាមួយអ្នកទស្សនា។ ក្នុងភាពចលាចលនោះ កីឡាករថៃម្នាក់ឈ្មោះ Songraw បានស្ទុះចេញពីសង្វៀនទៅលួចវាយលោកគ្រូ ពេជ្រ សុផាន់ (គ្រូបង្វឹករបស់កីឡាករ ពេជ្រ សម្បត្តិ) ពីក្រោយខ្នង ។ ទង្វើនេះត្រូវបានសាធារណជនកម្ពុជាថ្កោលទោសយ៉ាងខ្លាំងថា ជាទង្វើខ្វះវិជ្ជាជីវៈ និងសីលធម៌កីឡាករ។
ឯកឧត្តមខូវ ឆាយ ប្រធានសហព័ន្ធកីឡាប្រដាល់គុនខ្មែរ បានប្រាប់មូលហេតុដែលនាំឱ្យកើតមានភាពចម្រូងចម្រាស់នៅមុនការប្រកួតគឺដោយសារកីឡាករថៃសុង ត្រា ដែលប្រកួតតំណាងឱ្យប្រទេសអូស្ត្រាលី មិនព្រមសម្រកទម្ងន់តាមការបង្គាប់បញ្ជារបស់មន្ត្រីបច្ចេកទេស ធ្វើឱ្យអ្នកគាំទ្រកីឡាករកម្ពុជាឡុង សំណាងផ្ទុះការតវ៉ា រហូតឈានដល់ការវាយតប់គ្នាផ្អើលសង្វៀនប្រកួត។
តាមការលើកឡើងរបស់លោកប្រធានសហព័ន្ធកីឡាប្រដាល់គុនខ្មែរ បានឱ្យដឹងថា រវាងកីឡាករឡុង សំណាង និងកីឡាករថៃសុងត្រា ត្រូវប្រកួតគ្នាក្នុងប្រភេទទម្ងន់៦៨គីឡូក្រាម។
ប៉ុន្តែកីឡាករសុងត្រា មិនបានសម្រកទម្ងន់តាមគណៈកម្មការរៀបចំការប្រកួតទើបផ្ទុះការតវ៉ា។តាមការឯកភាពគ្នា គឺកីឡាករទាំងពីរត្រូវរក្សាឱ្យបាននូវប្រភេទទម្ងន់ដែលបានកំណត់ ។ ប៉ុន្តែកីឡាករថៃមិនព្រមធ្វើតាម ធ្វើឱ្យទម្ងន់របស់គេឡើងរហូតដល់ទៅ៦៩.៩គីឡូក្រាម តែគេនៅព្យាមយាមចង់ឡើងសង្វៀនប្រកួត ទើបធ្វើឱ្យកើតមានការតវ៉ាពីអ្នកគាំទ្រកីឡាករកម្ពុជា រហូតឈានទៅដល់ការវាយតប់គ្នារវាងអ្នកគាំទ្រទាំងពីរ។
តាមពិតកីឡាករថៃរូបនេះមានចិត្តអន្ទះសារចង់ប្រកួតខ្លាំង ដោយសារឃើញកីឡាកររបស់ខ្លួនទាំង២រូបប្រកួតមុនៗចាញ់កីឡាករកម្ពុជាទាំងអស់ ។ ក្នុងចំណោមគូប្រកួតទាំង៦គូ គឺគណៈកម្មការរៀបចំបានឯកភាពគ្នាដាក់គូប្រកួតកីឡាករឡុង សំណាង និងឡាករSongrawឱ្យប្រកួតចុងក្រោយគេ ក្នុងគោលបំណងបើមានបញ្ហាកើតឡើង គឺត្រូវបញ្ចប់តែម្ដង។
គួររំលឹកផងដែរថា ក្នុងចំណោមកីឡាករកីឡាការិនីកម្ពុជាទាំង៦រូបដែលបំពេញបេសកកម្មទៅប្រកួតនៅប្រទេសអូស្ត្រាលី ជាលទ្ធផលកីឡាករពេជ្រ សម្បត្តិ ឈ្នះកីឡាករថៃ-អូស្ត្រាលីឈ្មោះជុនឡាគិត ឆុមប្រាម នៅក្នុងទឹកទី២។កីឡាករពេជ្រ អាទិទេព ឈ្នះកីឡាករអូស្ត្រាលី អាលី ណាហ្សារី នៅត្រឹមទឹកទី១។ កីឡាករបឺត សង្ឃឹម ឈ្នះកីឡាករអូស្ត្រាលីសូឡៃម៉ាន់ ហាសេមីដោយពិន្ទុ ។ កីឡាការិនីទូច ចន្ទវត្តីចាញ់ពិន្ទុកីឡាការិនីអូស្ត្រាលី ហ្វូវ៉ារូ ។ កីឡាករគឹម វាសនា ចាញ់កីឡាករអូស្ត្រាលីជឹមមី ហ្វ័ស្ទ័នៅត្រឹមទឹកទី៤ ខណៈការប្រកួតរវាងកីឡាករ ឡុង សំណាង និងកីឡាករថៃ-អូស្ត្រាលីSongrawត្រូវលុបចោល៕
ចែករំលែកព័តមាននេះ